ལོ་བཞིའི་ནང་ཁ་པར་སོགས་ལ་འགྱུར་བ་འདི་ལྟར་འཐེབ་རྒྱུ་རེད།

ལོ་བཞིའི་ནང་ཁ་པར་སོགས་ལ་འགྱུར་བ་འདི་ལྟར་འཐེབ་རྒྱུ་རེད།

ང་ཚོའི་ད་ལྟའི་མཐོང་ལམ་དུ་གྱུར་པའི་ཁ་པར་དང་གློག་པང་ (Tablet) །གློག་ཀླད་དང་པར་ཆས།གློག་སྤྱོད་རྐང་འཁོར་དང་སྒེར་འཁོར་སོགས་མང་པོ་ཞིག་གི་གློག་རྫས་མཉམ་སྦྱར་ཡིན་པ་ལས་སྤོ་ཆོག་གློག་རྫས་ (Removable Battery) རིགས་ཧ་ཅང་ཉུང་།ལྷག་དོན་ཁ་པར་དང་གློག་པང་རིགས་ལ་གློག་རྫས་ཕལ་ཆེར་བརྒྱ་ཆ་བརྒྱ་མཉམ་སྦྱར་ཅན་ཡིན།

འདི་ནས་ཡར་བརྩིས་པའི་མི་ལོ་ ༡༦ གོང་སྟེ་ཕྱི་ལོ་ ༢༠༠༧ ལོར་ཀུ་ཤུ་བཟོ་གྲྭས་ཀུ་ཤུ་ཁ་པར་ཐོན་རིམ་དང་པོ་ཟེར་ན་འདྲ་   iPhone 2G ཞེས་པ་གློག་རྫས་མཉམ་སྦྱར་ཅན་ཕྱིར་བཏོན་པ་ནས་བཟུང་དེང་གི་བར་མི་ལོ་བཅུ་ཕྲག་གཅིག་ལྷག་ནང་ཁ་པར་སོགས་ནི་གློག་རྫས་མཉམ་སྦྱར་ཅན་ཁོ་ནར་གྱུར།དེའི་གོང་དུ་ཁ་པར་རིགས་ཀྱི་གློག་རྫས་ནི་སྤོ་ཆོག་གློག་རྫས་ཁོ་ན་ཡིན།

སྐབས་དེ་ཚོར་གལ་ཏེ་ཁྱེད་ལ་ཁ་པར་ཞིག་ཡོད་ན་ཁྱེད་ལ་གློག་རྫས་ཐེ་བ་རེ་གཉིས་ཞིག་ཀྱང་ཕལ་ཆེར་ཡོད་ཡོད་པ་ཡིན།ཡིན་ནའང་གོང་ཞུས་ཕྱི་ལོ་ ༢༠༠༧ ལོར་ཀུ་ཤུས་གློག་རྫས་ཁ་པར་མཉམ་སྦྱར་ཅན་བཟོས་པ་དེས་ཁ་པར་བཟོ་གྲྭ་ཡོངས་རྫོགས་ལ་ཤུགས་ཅན་ཧ་ཅང་ཐེབས་པར་མ་ཟད།གློ་རྫས་ཁོ་ན་བཟོ་མཁན་གྱི་བཟོ་གྲྭ་ཁག་མང་པོ་ཞིག་ལ་གྱོན་གུན་ཕོག

གློག་རྫས་ཐེ་བ་མི་དགོས་པར་མཉམ་སྦྱར་བྱས་པ་དེས་ཁྲོམ་རའི་འཛད་སྤྱོད་པ་རྣམས་ལ་ལས་ཀ་ཉུང་བ་དང་སྟབས་བདེ་རུ་བཏང་ཡོད་ཀྱང་།ཁ་པར་གྱི་རིན་གོང་སོགས་ཀྱང་རང་བཞིན་འཕར་བ་མ་ཟད།འཁོར་ཡུག་ལ་སྦག་བཙོག་མང་དུ་སོང་ཡོད།

རྒྱུ་མཚན་གཉིས་ཏེ།དང་པོ།གློག་རྫས་མཉམ་སྦྱར་ཅན་གྱི་ཁ་པར་བཟོ་བར་དམིགས་བསལ་གློག་རྫས་ཀྱི་རྒྱུ་ཆ་སྤུས་ལེགས་རིགས་བེད་སྤྱོད་དགོས་པ་དང་།དེས་མ་ཚད་ལོ་རེ་བཞིན་ཁ་པར་གྱི་བཟོ་བཀོད་སྲབ་མཉེན་ལྡན་པ་གཅིག་ལས་གཅིག་ལེགས་པ་འདོན་བཞིན་ཡོད་རྩང་།དེའི་གློག་རྫས་ཀྱི་རྒྱུ་ཆ་དང་ཇུས་འགོད་ལ་དཔགས་པའི་འགྲོ་སོང་ཡང་དེ་བཞིན་གནས་ཀྱིན་ཡོད།

གཉིས་པ།ཁ་པར་རིགས་ཀྱི་འཕྲུལ་ཆ་གློག་རྫས་མཉམ་སྦྱར་ཅན་ཞིག་ལ་སྐྱོན་ཤོར་ཚེ་དེར་བསྐྱར་གསོ་བྱེད་པའི་འགྲོ་སོང་ཧ་ཅང་ཆེ་བས་འཛད་སྤྱོད་པ་རྣམས་ཀྱིས་རྙིང་པར་འགྲོ་སོང་འཕོན་ཆེན་གཏོང་བ་ལས་གསར་པ་ཞིག་ཉོ་བར་འདེམས་ཀྱིན་ཡོད།རྐྱེན་དེས་ཁ་པར་བཟོ་གྲྭ་ཁག་གི་ཐོན་རྫས་གསར་པའི་གྲངས་འབོར་ཧ་ཅང་མགྱོགས་པོ་འཕེལ་བཞིན་ཡོད་ལ།བཟོ་གྲྭས་གསར་པ་ཇི་ཙམ་མང་བ་གཏོང་པ་དེ་ཙམ་གྱིས་རྙིང་པ་རྣམས་རང་བཞིན་གྱིས་བེད་མེད་དུ་འགྱུར་ནས།ལོ་རེར་གློག་རྫས་མཉམ་སྦྱར་ཅན་གྱི་ཁ་པར་དུང་ཕྱུར་ 1.5 ལྷག་ཐད་ཀར་གད་སྙིགས་སུ་གཡུག་བཞིན་ཡོད།རྒྱུ་མཚན་དེ་དག་གིས་ད་ལྟའི་ཆར་འཛམ་གླིང་འདིར་དཀའ་ཁག་ཐེ་བ་ཞིག་སྟེ།E-Weste (གློག་རྡུལ་གད་སྙིགས) ཞེས་པས་འཁོར་ཡུག་ལ་གཏོར་སྐྱོན་ཚབ་ཆེན་གཏོང་བཞིན་ཡོད།

གློག་རྡུལ་གད་སྙིགས་ལས་བྱུང་བའི་གློག་རྫས་ཀྱི་དུག་རིགས་དང་གཤའ་རྫས་སོགས་ཀྱིས་གོ་ལ་ཧྲིལ་པོའི་ཚ་དྲོད་འཕར་བར་ཤུགས་རྐྱེན་ངན་པ་ཐེབ་བཞིན་ཡོད་པར་མ་ཟད།གློག་རྫས་གང་སར་གཡུག་པའི་རྐྱེན་གྱིས་ལོ་རེར་མི་དང་སེམས་ཅན་གཞན་གྱི་ཚེ་སྲོག་འབུམ་ཕྲག་མང་པོ་འཕྲོག་བཞིན་ཡོད།

འཛམ་གླིང་སྟོབས་ཆེན་རྒྱལ་ཁབ་མང་པོ་ཞིག་གིས་དཀའ་ངལ་འདི་དག་ལས་གྲོལ་ཐབས་བྱེད་བཞིན་ཡོད་ཀྱང་ཁ་པར་གཙོ་བོ་བྱས་པའི་བཟོ་གྲྭ་རྣམས་ནས་ལོ་རེའི་ཁྲོམ་རར་བསྐྱར་གསོ་བྱེད་དཀའ་བའི་གློག་རྫས་སྤུངས་ཚད་དང་།རྒྱལ་ཁབ་རིམ་པའི་འཁོར་ཡུག་སྲུང་སྐྱོབ་ཀྱི་ལས་གཞིའི་མྱུར་ཚད་གཉིས་དོ་མཉམ་ཐུབ་ཀྱིན་མེད་སྟབས་དཀའ་ངལ་འདི་དག་ལོ་རེ་བཞིན་འཕར་གྱིན་ཡོད་པ་རེད།

གློག་རྫས་ཀྱི་ཁྲིམས་ལུགས་གསར་པ།

གནད་འདི་དག་ལ་དམིགས་ཏེ་འཐུས་མི་ ༧༠༥ ལས་གྲུབ་པའི་ཡུ་རོབ་མཉམ་འབྲེལ་གྲོས་ཚོགས་ (The  European Parliament) ཀྱིས་འདི་ལོའི་ཕྱི་ཟླ་ ༦ ནང་ཡུ་རོབ་མཉམ་འབྲེལ་མངའ་ཁུལ་དུ་ཁ་པར་གཙོ་བོ་བྱས་པའི་གློག་གསོག་ལྡན་པའི་ཡོ་ཆས་རྣམས་ལ་སྤོ་ཆོག་གློག་རྫས་བཀོལ་རྒྱུ་ཡོད་པ་བཟོ་དགོས་པའི་གྲོས་འཆར་ཞིག་བཏོན་པར།གྲོས་ཚོགས་འཐུས་མི་ ༥༨༧ གྱིས་རྒྱབ་བསྐྱོར་བྱས་ཏེ་གྲོས་འཆར་དེ་ཡུ་རོབ་མཉམ་འབྲེལ་བཟོ་ལས་བཅའ་ཁྲིམས་སུ་ཚུད་ཡོད།

བཅའ་ཁྲིམས་གསར་པ་དེའི་འཆར་གཞི་ལྟར་ན་ཕྱི་ལོ་ ༢༠༢༧ བར་ཁ་པར་བཟོ་གྲྭ་རྣམས་ཀྱིས་རང་ཉིད་ཀྱི་ཐོན་རྫས་ལ་གློག་རྫས་སྤོ་ཆོག་ཁོ་ན་སྟེ།དཔེར་ན།ཁ་པར་ཞིག་གི་གློག་རྫོགས་ཚེ་གློག་བསགས་ཡོད་པའི་གློག་མེ་ཐེ་བ་མི་བྱིང་གིས་བརྗེ་ཆོག་པ་བཟོ་དགོས་རྒྱུ་ཡོད་པ་དེ་རེད།དེའང་བཅའ་ཁྲིམས་གསར་པ་དེས་ཁྱབ་ཚད་ཁ་པར་ཁོ་ན་མིན་པར་དཔེར་ན།གློག་པང་ (Tablets ) གི་རིགས་དང་།གློག་སྤྱོད་རྐང་འཁོར།(E-Bike) གློག་སྤྱོད་ཤུད་འཁོར།(E-Scooter) གློག་སྤྱོད་སྒེར་འཁོར།(EV) སོགས་མདོར་ན་གློག་རྫས་མཉམ་སྦྱར་བྱས་ཡོད་པའི་ཐོན་རྫས་ཆེ་གྲལ་ཁག་ཚང་མར་ཁྱབ་ཀྱིན་ཡོད་འདུག 

ཡུ་རོབ་མཉམ་འབྲེལ་གྱི་ཐག་གཅོད་དེ་གློ་བུར་དུ་བྱུང་བ་ཞིག་གཏན་ནས་མིན་པར་ལོ་མང་རིང་ཡུ་རོབ་ཁུལ་གྱི་ཁ་པར་གཙོ་བོ་བྱས་པའི་གློག་ཆས་འཛད་སྤྱོད་པ་རྣམས་ཀྱི་ཉམས་མྱོངས་བསམ་ཚུལ་ལ་གཞི་བྱས་ཏེ་ཁྲིམས་ལུགས་དེ་གཏན་འབེབ་བྱས་པ་ཞིག་ཡིན།དེའང་ཡུ་རོབ་མཉམ་འབྲེལ་རྒྱུན་ལས་ཚོགས་ཆུང་ནས་ཡུ་རོབ་ཁུལ་གྱི་གོང་སྨྲས་འཛད་སྤྱོད་པ་རྣམས་ཀྱི་བསམ་ཚུལ་བསྡུ་ལེན་སྐབས་མི་མང་བརྒྱ་ཆ་ ༧༧ ཙམ་གྱིས་ཁ་པར་གྱི་གློག་རྫས་ལ་སྐྱོན་འབྱུང་སྐབས་དངོས་པོ་ཡོངས་རྫོགས་གསར་རྙིང་བརྗེ་མི་དགོས་པར་ཁ་པར་ལ་བདག་པོ་མི་བྱིང་བས་རང་ངོས་ནས་གློག་རྫས་བརྗེ་རྒྱུ་ཡོད་པའི་ཐབས་ལམ་ཡོད་དགོས་པའི་བསམ་ཚུལ་བཏོན་པ་དང་།འཛད་སྤྱོད་པ་བརྒྱ་ཆ་ ༧༩ ཙམ་གྱིས་ཁ་པར་གང་ཞིག་ཡིན་ཀྱང་བཟོ་གྲྭ་རང་ངོས་ནས་ཐོན་རྫས་དེའི་ཆ་ཤས་ལྷུ་ལག་རྣམས་མི་བྱིང་གིས་བརྗེ་ཐུབ་པའི་ཆ་རྐྱེན་བསྐྲུན་དགོས་པའི་བསམ་ཚུལ་བཏོན་ཡོད།

སྤྱིར་བཏང་ཁ་པར་གྱི་ལྷུ་ལག་རྣམས་ཆག་སྐྱོན་འབྱུང་སྐབས་དོ་བདག་མི་བྱིང་གིས་བརྗེ་ཐུབ་པའམ་ཡང་ན་ཆེད་ལས་བསྐྱར་གསོ་མཁན་གྱིས་ལས་སླ་པོར་བརྗེ་སྤོ་རྒྱག་ཐུབ་པ་བཟོ་དགོས་པའི་ཁྲིམས་ལུགས་ “ ཉམས་གསོའི་བདག་དབང་ ”  Right to Repair ཞེས་པ་ཡུ་རོབ་མཉམ་འབྲེལ་ནས་ཕྱི་ལོ་ ༢༠༢༡ ཟླ་ ༣ ནང་བཅའ་ཁྲིམས་སུ་བཙུད་ཡོད།

 “ ཉམས་གསོའི་བདག་དབང་ ”  Right to Repair ཞེས་པ་ནི་གོང་ཞུས་ལྟར་དེང་གི་ཆར་ཁ་པར་མང་ཕལ་ཆེར་གྱི་གློག་རྫས་དང་ལྷུ་ལག་རྣམས་ཕན་ཚུན་གཅིག་གིས་གཅིག་ལ་དམིགས་བསལ་སྤྱིན་ཆུའམ་འབྱར་ཆུ་བཀོལ་ནས་སྦྱར་ཡོད་སྟབས གལ་ཏེ་ཁ་པར་ཞིག་ལ་སྐྱོན་ཆག་འབྱུང་ན་བཟོ་གྲྭ་རང་ཉིད་ངོས་ནས་བརྗེ་མོ་རྒྱག་པའམ་ཡང་ན་སྒོར་མོ་ཅུང་ཙམ་རེ་ཁ་སྣོན་བྱ་ནས་གསར་པ་ཉོ་རྒྱུ་ལས་དོ་བདག་རང་ཉིད་དམ་ཆེད་ལས་བསྐྱར་གསོ་བས་ལས་སླ་མོར་ཞིག་གསོ་རྩ་བ་ནས་བྱེད་ཐུབ་ཀྱིན་མེད།

བཟོ་གྲྭས་དེ་ལྟར་བྱ་དགོས་པའི་དམིགས་ཡུལ་གཙོ་བོ་རང་ངོས་ཀྱི་ཐོན་རྫས་གསར་པ་གང་མགྱོགས་ཁྲོམ་རར་འཁོར་རྒྱུག་ཡོང་ཕྱིར་དང་།འཛད་སྤྱོད་པ་རྣམས་ཡང་ནས་ཡང་དུ་རང་ཉིད་ཀྱི་དངོས་རྫས་ཀྱིས་ཡིད་འགུག་པའི་སྲིད་བྱུས་སྤེལ་བཞིན་ཡོད།བཟོ་གྲྭའི་ངོས་ནས་ཁེ་བཟང་ལེགས་པའི་ཚོང་དོན་གྱི་སྲིད་བྱུས་དེ་དག་ལེགས་ཀྱང་།བྱ་བ་འདིའི་མཇུག་འབྲས་སའི་གོ་ལ་འདིའི་སྟེང་གློག་རྡུལ་གད་སྙིགས་བསམ་ཡུལ་ལས་འདས་པ་འཕེལ་བཞིན་ཡོད།འཁོར་ཡུག་འཕྲོད་བསྟེན་དང་འགྲོགས་པའི་འཛད་སྤྱོད་པ་མང་པོ་ཞིག་བཟོ་གྲྭ་དང་ཁྲོམ་རའི་བྱེད་སྟངས་དེར་བློ་ཁ་ཚིམ་གྱིན་མེད་རྩང་གོང་སྨྲས་ “ ཉམས་གསོའི་བདག་དབང་ ”  Right to Repair ཞེས་པ་འདི་གཏན་ལ་ཕབས་པ་ཡིན་འདུག

ཡུ་རོབ་མཉམ་འབྲེལ་གྱི་གློག་རྫས་བཟོ་ལས་ཁྲིམས་ལུགས་གསར་པ་དེའི་འཆར་གཞི་ལྟར་ན་ཕྱི་ལོ་ ༢༠༣༡ ནང་ཚུན་ཁྲོམ་རར་ཐོན་ཟིན་པའི་ཁ་པར་སོགས་གློག་རྫས་མཉམ་སྦྱར་ཅན་བརྒྱ་ཆ་ ༦༡ ཙམ་ཕྱིར་བསྡུ་བྱ་ཐུབ་དགོས་པ་དང་།ཁ་པར་སོགས་ཀྱི་གློག་རྫས་བརྒྱ་ཆ་ ༩༥ ཙམ་བཅའ་ཁྲིམས་དེས་གཏན་ལ་ཕབས་པའི་སྤོ་ཆོག་གློག་རྫས་བཀོལ་སྤྱོད་ཐུབ་པ་བྱ་དགོས་ཀྱི་ཡོད་འདུག དེ་ཙམ་དུ་མ་ཚད་བཅའ་ཁྲིམས་དེའི་ནང་གློག་རྫས་རྙིང་པ་རྣམས་བསྐྱར་སྤྱོད་ཡང་སྤྱོད་བྱ་ཐུབ་པ་དགོས་པ་དང་།གློག་རྫས་བཟོ་གྲྭ་རྣམས་ལའང་འཛམ་གླིང་ཀར་བོན་ཁྲིམས་ལུགས་ (GHG) དང་མཐུན་པའི་ཐོན་རྫས་སྤུས་ལེགས་བཟོ་བསྐྲུན་ཐུབ་པའི་ལག་ཁྱེར་ཡོད་དགོས་པ།དེར་མ་ཚད་ “ ཉམས་གསོའི་བདག་དབང་ ”  Right to Repair གི་གནས་བབ་སོགས་ཀྱང་ཚུད་ཡོད་པ་རེད།

བཟོ་ལས་བཅའ་ཁྲིམས་དེའི་ཕན་པ།

གལ་ཏེ་བཟོ་ལས་བཅའ་ཁྲིམས་དེའི་དམིགས་ཡུལ་ལྟར་འགྲོ་ཚེ་གློག་རྡུལ་སྦག་བཙོག་ཉུང་དུ་ཇི་ལྟར་གཏོང་ཐུབ་སྙམ་ན།འདིའི་ཐད་ཡུ་རོབ་མཉམ་འབྲེལ་གྲོས་ཚོགས་ཀྱི་འཐུས་མི་སྐུ་ཞབས་ཨ་ཆི་ལི།ཝ་རི་ཡ་ཏི་ MEP Achille Variati ལགས་ཀྱིས་གསལ་བཤད་བྱས་དོན།

” ང་ཚོས་ཐེངས་དང་པོར་ཐོན་རྫས་འཁོར་སྐྱོད་ལ་མཁོ་བའི་ཁྲིམས་ལུགས་འདི་གཏན་འབེབས་བྱས་པ་ནས་ཁོར་ཡུག་དང་དཔལ་འབྱོར་གཉིས་ཀར་ཕན་ཐོགས་འབྱུང་གི་ཡོད་ ” ཅེས་དང་།

ཡང་ཁོང་གིས་ “ ང་ཚོས་རྣམ་པ་ཀུན་ཏུ་འཛད་སྤྱོད་པར་ཕན་པའི་བྱེད་ཐབས་སྤྱོད་རྒྱུར་མོས་མཐུན་གཙོ་བོ་བྱེད་ཀྱི་ཡོད་པ་སྟེ།གློག་རྫས་གྱི་བྱེད་ནུས་སྔར་ལས་ལེགས་པོ་ཡོང་བ་དང་བདེ་འཇགས་ཀྱང་དེ་བས་ཡོང་བ་བྱ་རྒྱུ་རེད།” ཅེས་བཤད་ཡོད།

དང་པོ།ལས་གཞི་འདིའི་དམིགས་ཡུལ་ལྟར་འགྲུབ་ཚེ་ཁ་པར་གྱི་སྤྱོད་སྒོའམ་འདང་ཡུན་རིང་དུ་འགྲོ་བས་ཁ་པར་བཟོ་གྲྭ་རྣམས་ཀྱི་ཚད་ལས་བརྒལ་བའི་ཐོན་རྫས་བཟོ་བསྐྲུན་བྱེད་པའི་འཁོར་ཡུག་ཉུང་དུ་གཏོང་ནས་གད་སྙིགས་གསར་པ་ཉུང་དུ་འགྲོ་བ།

གཉིས་པ།སྤོ་ཆོག་གློག་རྫས་ནི་བསྐྱར་སྤྱོད་ཡང་སྤྱོད་བྱེད་པར་དཀའ་ཁག་དེ་ཙམ་མེད་པས་གློག་རྫས་ལ་དགོས་པའི་ཞ་རྫས་དང་ཏི་རྫས་རིགས་སོགས་འཁོར་ཡུལ་ལ་གནོད་པའི་རྫས་རིགས་གསར་སྤྱོད་ཉུང་དུ་འགྲོ་བ།

གསུམ་པ།གློག་རྫས་བསྐྱར་སྤྱོད་ཇི་ཙམ་བྱ་ཐུབ་ན་དེ་ཙམ་གྱིས་རིན་ཐང་ཆེ་བའི་ཀོ་བལྟི་(Cobalt) དང་ལི་ཐིའིམ་(Lithium) གཏེར་རྫས་རིགས་བསྔོག་འདོན་ཉུང་དུ་འགྲོ་བ།

བཞི་པ།གློག་རྫས་ཞིག་བཟོ་བསྐྲུན་བྱེད་པར་ཀར་བོན་ཁྲིམས་ལུགས་ (GHG) སོགས་དང་མཐུན་པའི་ལག་ཁྱེར་དང་ཐབས་རྩལ་ཡོད་དགོས་པས་གློག་རྫས་ཀྱི་སྤུས་ཚད་ད་སྔ་ལས་ཡག་ཏུ་འགྲོ་བས་འདང་ཡུན་རིང་བ།

ལྔ་པ།ཁ་པར་བཟོ་གྲྭ་རྣམས་ཀྱིས་དང་པོ་ནས་གློག་རྫས་སོགས་ཁ་པར་གྱི་ཆ་ཤས་ལྷུ་ལག་རྣམས་བཟོ་གྲྭ་རང་ངོས་ནས་ཚད་ལྡན་འདོན་ངེས་མཁོ་སྤྲོད་བྱ་ཐུབ་དགོས་པ་དེས་བཟོ་གྲྭ་བྱིང་མང་པོ་ཞིག་གིས་རྒྱུ་ཆ་ཞན་པའི་ཐོན་རྫས་གང་མང་ཞིག་བཟོ་བསྐྲུན་བྱེད་ཀྱིན་པ་འདི་དག་གང་འཚམས་འགོག་རྒྱུ་ཡིན་པས།ལས་འགུལ་འདིས་དེང་གི་ཆར་མི་རྣམས་ཀྱིས་དོན་མེད་རིན་ཐང་བྲལ་བའི་ཐོན་རྫས་གང་མང་ཞིག་ལ་འགྲོ་སོང་གཏོང་བཞིན་པ་ཉུང་ཕྲི་ཆག་རྒྱུ་ཡིན་པ་སོགས།གང་ལྟར་འཁོར་ཡུག་དང་དཔལ་འབྱོར་གཉིས་ཀར་ཕན་ཐོགས་རྒྱ་ཆེར་འབྱུང་རྒྱུ་ཡིན་པ་རེད།

བཟོ་ལས་བཅའ་ཁྲིམས་དེའི་གནོད་པ།

བཅའ་ཁྲིམས་གསར་པ་དེ་ལག་བསྟར་བྱེད་ཉིན་ནས་ཁ་པར་སོགས་ཀྱི་བཟོ་ལས་དང་ཇུས་འགོད་པ་རྣམས་ཀྱིས་བསམ་གཞིག་གསར་པ་དང་དཀའ་ཁག་མང་པོ་ཞིག་ལ་གདོང་གཏད་དགོས་པ་སྨྲོས་མ་དགོས་པ་རེད།དཔེར་ན།

ད་ལྟའི་ཁྲོམ་རའི་ནང་ཡོད་པའི་ཁ་པར་དང་གློག་པང་མང་ཕལ་ཆེར་སྲབ་མཉེན་ཡིད་འོང་ལྡན་པ་ཤ་སྟག་ཡིན་པས།གལ་ཏེ་དེར་དཔགས་པའི་སྤོ་ཆོག་གློག་རྫས་ཞིག་བཟོ་བསྐྲུན་བྱ་དགོས་ན་གློག་རྫས་དེའང་ཧ་ཅང་སྲབ་པོ་ཡིད་དུ་ཡོང་བ་ཞིག་བཟོ་ཐུབ་དགོས།དེས་མ་ཚད་ད་ལྟའི་ཆར་ཁ་པར་མང་པོ་ཞིག་ལ་ཆུ་འགོག་དང་རྡུལ་འགོག་གི་ནུས་པ་ཡོད་པས་གལ་ཏེ་སྤོ་ཆོག་གློག་རྫས་བཀོལ་ཚེ་དེར་ཆུ་རྡུལ་སོགས་འགོག་པའི་ཐབས་རྩལ་བསྐྲུན་ཐུབ་མིན།

རྒྱུ་ཆའི་ཐད་ནས་ད་ལྟའི་ཆར་ཁ་པར་ཕྱི་ཡི་རྒྱབ་མདུན་གཉིས་ཀ་ཤེལ་གཟུགས་བང་རིམ་གྱི་ཐབས་ཇུས་ Glass Sandwich Method བཀོལ་ཡོད་སྟབས་མཛེས་ཉམས་ཆེ་ལ་འཇམ་ཤ་དོད་པོ་ཡོད་པས་འཛད་སྤྱོད་པའི་ཡིད་འགུག་པའི་གནད་གཙོ་བོར་འཛིན་བཞིན་ཡོད།དེས་ན་སྤོ་ཆོག་གློག་རྫས་བཀོལ་སྐབས་ད་ལྟའི་རྣམ་པ་ལྟར་རང་འཇགས་གནས་ཐུབ་པའི་ཐབས་རྩལ་ཡོད་མེད་སོགས་ཀྱི་རྙོག་འཛིང་གང་འཚམས་ཡོང་གིན་ཡོད་འདུག 

ཡུ་རོབ་མཉམ་འབྲེལ་གྱི་ནུས་ཤུགས།

ཡུ་རོབ་མཉམ་འབྲེལ་གྲོས་ཚོགས་ཀྱིས་ཐག་གཅོད་བྱས་པ་ཙམ་གྱིས་རྒྱལ་སྤྱིའི་ཁ་པར་བཟོ་གྲྭ་དང་ཁྲོམ་ར་ཡོངས་ལ་གནོད་ཤུགས་དང་འགྱུར་བ་ཇི་ལྟར་འགྲོ་ཐུབ་བམ་སྙམ་ན།ཡུ་རོབ་མཉམ་འབྲེལ་གྲོས་ཚོགས་ཀྱི་ཐག་གཅོད་མང་པོ་ཞིག་གིས་འཛམ་གླིང་འདིར་ཤུགས་ཅན་ཧ་ཅང་ཐེབས་བཞིན་ཡོད།དཔེར་མཚོན་འགའ་ཞིག་ཞུས་ན།

ཕྱི་ལོ་ ༢༠༠༢ ལོར་ཡུ་རོབ་མཉམ་འབྲེལ་གྱིས་ “ གནོད་ལྡན་དངོས་པོའི་ཚོད་འཛིན་བཀའ་རྒྱ་ ” The Restriction of Hazardous Substances Directive (RoHS) ཞེས་པའི་བཟོ་ལས་ཁྲིམས་ལུགས་གཏན་འབེབས་བྱས་པ་དེས་འཛམ་གླིང་ཁྱོན་ཡོངས་ཀྱི་འཕྲུལ་རིག་བཟོ་གྲྭ་ཁག་ལ་གནམ་ས་བླ་འོག་བསྒྱུར་བ་ལྟ་བུའི་དོ་ཕོག་ཤུགས་ཅན་ཐེབས་པར་མ་ཟད་ཁྲིམས་ལུགས་དེའི་གཏན་ལ་ཕབས་པའི་དོན་ཚན་རྣམས་ལག་བསྟར་མི་བྱ་ཐུ་མེད་དུ་གྱུར་ཡོད།

ཁྲིམས་ལུགས་དེའི་ནང་འཕྲུལ་རིགས་བཟོ་གྲྭ་ཁག་གིས་འཁོར་ཡུག་ལ་གནོད་པའི་གཏེར་རྫས་དཔེར་ན།ཞ་ཉེ།Lead (Pb) དངུལ་ཆུ།Mercury (Hg) ཏི་ཚ་ Cadmium (Cd) སོགས་ཚུད་པའི་རྫས་སྦྱོར་རིགས་བཅུ་ཕྲག་ལྷག་ཅིག་བཀོལ་མི་ཆོག་པར་བཟོས་ཡོད།

ཁྲིམས་ལུགས་  (RoHS) དེ་ཐོག་མར་ཡུ་རོབ་མཉམ་འབྲེལ་ཁུལ་གྱི་འཕྲུལ་རིགས་བཟོ་གྲྭ་ཁག་ལ་ལག་བསྟར་བྱས་ཡོད་ཀྱང་།ཕྱིས་སུ་རིམ་པར་ཨ་རི་དང་དབྱིན་ཇི་སོགས་ནུབ་ཕྱོགས་རྒྱལ་ཁབ་ཆེ་གྲས་ལག་བསྟར་བྱས་པར་མ་ཚད་ཕྱི་ལོ་ ༢༠༠༧ ལོར་རྒྱ་ནག་གིས་ཀྱང་ 中国RoHS ཞེས་པ་ལག་བསྟར་བྱས་ནས་རང་ཁོངས་ཀྱི་བཟོ་གྲྭ་ཁག་ལ་སྟངས་འཛིན་བྱེད་ཀྱིན་ཡོད།

ཁྲིམས་ལུགས་དེ་དག་ལ་འགལ་བའི་རིགས་ལ་ཡུ་རོབ་མཉམ་འབྲེལ་གྱིས་ཆད་པའང་ནན་མོ་བཅད་པ་དཔེར་ན།Cola ཁུ་ནག་ཐུང་ཆུ་བཟོ་གྲྭས་འགྱིག་དམ་གྱི་ཕྱི་ངོས་སུ་ཞ་ཉེའི་རིགས་ཀྱི་དངོས་པོ་པར་བཏབ་བྱས་པའི་ནག་ཉེས་ལ་ཨ་སྒོར་ས་ཡ་ ༡།༢༥ སྤྲོད་དགོས་བྱུང་བ་དང་།དེ་བཞིན་ Pepsi ཁུ་ནག་བཟོ་གྲྭས་ཀྱང་གོང་མཚུངས་ཞ་ཉེའི་རིགས་བེད་སྤྱད་པའི་ཉེས་ཆད་ལ་ཨ་སྒོར་ས་ཡ་ ༤།༣ འཇལ་དགོས་བྱུང་ཡོད།དེས་མ་ཚད་ཀུ་ཤུ་བཟོ་གྲྭས་དུག་ལྡན་དངོས་པོ་ Toxic Material བེད་སྤྱོད་བཞིན་ཡོད་པའི་ནག་ཉེས་ཀྱང་བཙུག་ཡོད།

ཕྱི་ལོ་ ༢༠༢༠ལོར་ཡུ་རོབ་མཉམ་འབྲེལ་གྲོས་ཚོགས་འཐུས་མི་ ༦༠༢ ཡིས་རྒྱབ་བསྐྱོར་གྱིས་ཁ་པར་གྱི་གློག་གསོག་ཡོ་ཆས་གཅིག་འགྱུར་ཡོང་ཆེད་རང་ཁོངས་ཀྱི་ཁ་པར་དང་གློག་པང་སོགས་འཕྲུལ་རིག་བཟོ་གྲྭ་ཁག་གིས་གློག་གསོག་མཐུད་ཁ་ UBS-C ཁོ་ནར་གཅིག་འགྱུར་ཡོང་དགོས་པའི་ཁྲིམས་ལུགས་གཏན་ལ་ཕབས་ཏེ་ལག་བསྟར་བྱས་པར་མ་ཚད།ཀུ་ཤུའི་བཟོ་གྲྭ་ཁག་ཏུའང་ཁྲིམས་ལུགས་དེ་ལག་བསྟར་བྱ་དགོས་པའི་གནོད་ཤུགས་རིམ་པར་སྤྲད་ཡོད།

སྤྱིར་བཏང་གློག་གསོག་མཐུད་ཁ་ USB-C དེ་ཕྱི་ལོ་ ༢༠༡༤ ལོར་ཕྱིར་ཐོན་པ་དང་།ཁ་པར་རིགས་ལ་བཀོལ་སྤྱོད་ཐོག་མ་ཕྱི་ལོ་ ༢༠༡༥ ལོར་བྱས་པར་མ་ཟད་ལོ་དེར་ཀུ་ཤུ་བཟོ་གྲྭས་ཀྱང་ཀུ་ཤུའི་ལག་ཁྱེར་གློག་ཀླད་ Macbook 2015 ལ་གློག་གསོག་མཐུད་ཁ་ USB-C བཀོལ་ཡོད།

ཡིན་ནའང་ཀུ་ཤུའི་བཟོ་གྲྭར་རང་ཉིད་ཀྱི་ཐོན་རྫས་ཁ་པར་དང་གློག་པང་སོགས་ལ་ཁོ་ནར་མཁོ་བའི་གློག་གསོག་མཐུད་ཁ་ “ གློག་ཞག ” (Lghtning) ཞེས་པ་དང་།“ ཐོག་མདའ ” (Thounderbolt) ཞེས་པ་སོགས་ཡོད་པས་གློག་གསོག་མཐུད་ཁ་ USB-C བེད་སྤྱོད་པར་འདོད་མོས་བྱེད་ཀྱིན་མེད།

ཡིན་ནའང་ཡུ་རོབ་མཉམ་འབྲེལ་དང་ཀུ་ཤུའི་བཟོ་གྲྭའི་བར་ཕན་ཚུན་རྩོད་གླེང་གང་མང་བྱུང་རྗེས་མཐར་འདི་ལོ་སྟེ་ཕྱི་ལོ་ ༢༠༢༣ ཀུ་ཤུའི་བཟོ་གྲྭས་ཁ་པར་ཐོན་རིམ་ ༡༥ པར་གློག་གསོག་མཐུད་ཁ་ USB-C བཀོལ་དགོས་བྱུང་ཡོད།

ཡུ་རོབ་མཉམ་འབྲེལ་གྱི་གློག་གསོག་མཐུད་ཁ་ USB-C ཁྲིམས་ལུགས་དེའི་རྩ་འཛིན་ལྟར་ན་ལོ་ ༤ ནང་ཁ་པར་དང་གློག་པང་།གློག་ཀླད།གློག་ལྡན་སྒྲ་ཉན་ཡོ་ཆས་སོགས་མདོར་ན་གློག་གསོག་མཐུད་ཁ་ USB བཀོལ་ཆོག་རིགས་ཚང་མ་གཅིག་འགྱུར་གློག་གསོག་མཐུད་ཁ་ USB-C ཅན་བསྒྱུར་དགོས་རྒྱུ་ཡོད་སྟབས།ཕྱི་ལོ་ ༢༠༢༤ ནང་བཟོ་གྲྭ་ཁག་གིས་བྱ་བ་དེའི་མཇུག་ཡོངས་སུ་འགྲུབ་ཐུབ་དགོས་པ་རེད།

གློག་གསོག་མཐུད་ཁ་ USB-C ཡི་བཅའ་ཁྲིམས་དེའི་ཕན་ནུས་ནི།དང་པོ།འཛད་སྤྱོད་པར་གློག་གསོག་མཐུད་ཁ་ USB རིགས་བེད་སྤྱོད་པར་ཧ་ཅང་སྟབས་བདེ་སྟེ།རང་ཉིད་ལ་གློག་རྫས་ལྡན་པའི་འཕྲུལ་རིག་ཅི་ཞིག་ཡོད་པ་དང་།རང་ཉིད་རྒྱལ་ཁབ་གང་དུ་སླེབས་ཀྱང་གློག་གསོག་མཐུད་ཁ་ USB གཅིག་ཁོ་ནས་འཐུས་པ།

གཉིས་པ།གློག་གསོག་མཐུད་ཁ་ USB གཅིག་ཁོ་ན་བྱུང་ན་དེས་འཁོར་ཡུག་ལ་གློག་རྡུལ་གད་སྙིགས་མངོན་གསལ་དོད་པོ་ཉུང་དུ་འགྲོ་བ་སྟེ།དཔེར་ན།ཁྲིམས་ལུགས་འདི་གཏན་ལ་ཕབས་སྐབས་ཡུ་རོབ་མཉམ་འབྲེལ་རྒྱུན་ལས་ཚོགས་ཆུང་ནས་སྙན་ཐོ་ཞིག་བཏོན་པ་ལྟར་ན།ལོ་དེར་ཡུ་རོབ་ཁུལ་གྱི་འཛད་སྤྱོད་པ་ཁོ་ནས་གློག་རྡུལ་འཕྲུལ་ཆས་ས་ཡ་ ༤༦༠ཙམ་ཉོས་ཡོད་པ་དང་།འཛད་སྤྱོད་པ་རེར་འཕྲུལ་རིག་དེ་དག་བེད་སྤྱོད་པར་མ་མཐའ་ཡང་གློག་གསོག་མཐུད་ཁ་ USB མི་འདྲ་བ་གསུམ་ཙམ་ཡོད་པར་བཤད་ཡོད།དེ་ལྟར་ན་གལ་ཏེ་གློག་གསོག་མཐུད་ཁ་ USB གཅིག་ཁོ་ནས་འཐུས་ཐུབ་ཚེ་མི་རེ་ནས་གློག་རྡུལ་གད་སྙིགས་གཉིས་རེ་ཉུང་དུ་གཏོང་གིན་ཡོད།

གསུམ་པ།མཛད་སྤྱོད་པས་འཕྲུལ་རིག་སྣ་མང་ཇི་ཙམ་ཉོ་ནའང་དེར་དགོས་པའི་གློག་གསོག་མཐུད་ཁ་ USB གཅིག་ཁོ་ནས་འཐུས་པ་དེས་སྒོར་མོའི་འགྲོ་སོང་མང་པོ་ཞིག་རང་བཞིན་འགོག་ཐུབ་པས་དཔལ་འབྱོར་ལའང་གྲོན་ཆུང་གི་ཕན་ནུས་ལྡན་ཡོད།

དེ་ལྟར་ཡུ་རོབ་མཉམ་འབྲེལ་གྱིས་གཏན་ལ་ཕབས་པའི་བཟོ་ལས་ཁྲིམས་ལུགས་མང་པོ་ཞིག་ད་ལྟ་རྒྱལ་སྤྱིའི་བཟོ་ལས་ཀྱི་སྒྲིག་ཁྲིམས་སུ་གྱུར་ཡོད་པས།སྤོ་ཆོག་གློག་རྫས་ཀྱི་ཁྲིམས་ལུགས་འདི་ཉིད་ཀྱང་ལོ་བཞིའི་ནང་རྒྱལ་སྤྱིའི་བཟོ་ལས་ཁྲིམས་ལུགས་སུ་འགྱུར་རྒྱུ་ཡིན་པ་ནི་གདོན་མི་ཟའོ།།

དེ་ལྟར་ལོ་ ༤ ཡི་ནང་ང་ཚོས་ཁ་པར་གྱི་འགྱུར་བ་ཇི་འདྲ་ཞིག་མཐོང་ཐུབ་བམ།ཁ་པར་སོགས་ཀྱི་བྱེད་ནུས་དང་བཟོ་ལྟ་ཇུས་འགོད་རྣམས་ད་ལྟ་ནང་བཞིན་གནས་ཐུབ་བམ།ཡང་ན་འདི་ལས་ཡག་པ་དང་སྲབ་པ།སྙིང་དུ་སྡུག་པ་དང་ཡིད་དུ་འོང་བ་བཟོ་སྲིད།ཡང་ན་མི་ལོ་ ༡༦ གོང་གི་སྤོ་ཆོག་གློག་རྫས་ཁ་པར་གྱི་རྣམ་པ་དེ་ཕྱིར་རང་འཇགས་སུ་སླེབས་སྲིད།གང་ལྟར་ད་ལྟའི་ཆར་དྲི་བ་འདི་དག་འཛད་སྤྱོད་པ་བྱིང་གིས་རྟོག་བཏགས་ཙམ་གྱིས་འདི་དང་དེའོ་ཙམ་ལས་ཡང་དག་པའི་ལན་ཞིག་རྙེད་དཀའོ།།།།

ཞེས་ཉེ་ཆར་ཕྱི་ལོ་ ༢༠༣༠བར་གྱི་ཡུ་རོབ་མཉམ་འབྲེལ་གྱི་ལས་འཆར་ཞེས་པའི་རྩོམ་ཡིག་ཅིག་བཀླགས་རྗེས་ཟིན་ཐོའི་ཚུལ་དུ་དགེ་གཤེན་ཚེ་ཚང་ངམ་ཧི་མ་ལ་ཡའི་རྒྱལ་སྲས་པས་ཕྱི་ལོ་ ༢༠༢༣ ཟླ་ ༡༠ཚེས་ ༨ ཉིན་གཟའ་མཇུག་གུང་གསེང་ཉིན་འཇར་མན་ཡུལ་གྱི་ཆུ་བོ་དྷོ་ནཱའོ་གཙང་པོའི་འགྲམ་དུ་བྲིས།།།།