བོན་ལུགས་སུ་མ་རིག་པ་ལ་ཐོག་མ་ཡོད་མེད་གསུང་རོགས།
རྩོམ་བྲིས་པ། རྩོམ་སྒྲིག་པ། དྲི་བ་འདོན་མཁན། རབ་འཕེལ།
དྲི་བ། གཞུང་ཆེན་རྣམས་ནས་སྔོན་བྱོན་གྱི་པན་གྲུབ་ཚོས་འཁོར་བ་ལ་ཐོག་མ་ཡོད་མེད་ཐད་མ་རིག་པ་ལ་ཐོག་མ་ཡོད་མེད་རྩོད་སྒྲུབ་མང་པོ་ཞིག་གནང་ཡོད་པ་ལྟར་གཡུང་དྲུང་བོན་གྱི་ལུགས་སུ་མ་རིག་པ་ཐོག་མ་ཡོད་དང་མེད།
ལན། འཁོར་བའི་ཐོག་མ་ཡོད་པར་བཞེད་མཁན་ནི། ལུང་རིགས་ཀྱི་དབང་ཕྱུག་མཁས་པ་གཉོས་རྒྱལ། བློ་གྲོས་ཀྱི་བདག་ཉིད་བྲུ་སྟོན་ཉི་རྒྱལ། དྲི་མེད་ཀྱི་སྤྱན་ལྡན་བདུད་རྩི་རྒྱལ་མཚན། འཕྲིན་ལས་ཀྱི་རྒྱ་མཚོ་འགྲོ་མགོན་བློ་གྲོས། བསྟན་པའི་མངའ་བདག་རྗེ་བཙུན་ཆེན་པོ་སོགས་ཡིན་པར་གསུང་གིན་འདུག་ལ། མཁས་གྲུབ་ཀྱི་སྐྱེས་བུ་དེ་རྣམས་ཀྱི་དགོངས་པ་ནི་འཁོར་བའི་དོན་ཉོན་མོངས་པ་ལ་བྱ་ཚེ། འབུམ་ལས། བོན་ཐམས་ཅད་སྲིད་པ་ལས་བྱུང༌། སྲིད་པ་རང་གི་རང་བཞིན་ལས་བྱུང༌། རང་གི་རང་བཞིན་ཐུགས་རྗེ་ཆེན་པོ་བྱིན་གྱིས་བརླབས། ཡེ་མ་སྐྱེས་སྐྱེ་བ་མེད་པ་གདོད་ནས་དག་པ་ལས་བྱུང༌། ཞེས་སོགས་ལ་གཞི་བཅོལ་བ་ཡིན།
འཁོར་བའི་ཐོག་མ་མེད་པར་བཞེད་མཁན་ནི། ཞུ་ཡི་མཁས་པ་སངས་རྒྱས་ཞུ་ཆེན། མཁས་མཆོག་རྨེའུ་སྟོན་ཚུལ་ཁྲིམས་དཔལ་ཆེན། རྨེའུ་རྒྱལ་མཚན་མཆོག་ལེགས། སྒ་སྟོན་ཚུལ་ཁྲིམས་རྒྱལ་མཚན་ལ་སོགས་ཡིན་པར་གསུང་གིན་འདུག་ལ། མཁས་པ་དེ་རྣམས་ཀྱིས་འཁོར་བ་ཐོག་མ་མེད་པར་སྒྲུབ་བྱེད་ནི། ལུང་ལས། འཁོར་བ་ཐོག་མ་མེད་པ་ནས། ཞེས་པ་དང༌། ཐོག་མ་དུས་མཐའ་ཅི་ཡང་མེད་པ་ནས། ཞེས་པ་དང༌། སྐྱེ་བ་དང་པོ་དཔག་ཏུ་མེད་པ་ནས། སོགས་དང་། ཡང་། མ་རིག་པ་དེ་དུས་འདི་ཙམ་ནས་འབྱུང་བར་མི་ནུས་པས་ཐོག་མ་མེད་པ་ཡིན་ནོ། ཞེས་སོགས་ཀྱི་དགག་བཞག་གྲངས་མང་ཡོད་པས་གལ་སྲིད་འདི་ཚོའི་སྐོར་རྒྱས་པར་གཟིགས་འདོད་ཚེ་འདིར་གནོན་ན་ཞིབ་ཕྲ་མཁྱེན་ཐུབ། །