ཧི་མ་ལ་ཡ་ཡི་མི་རིགས་དང་དེ་དག་གི་ཆོས་ལུགས་དང་རིག་གཞུང་ལས་སོགས་ཇི་ལྟར་ཡིན།

མཛད་པ་པོ།  ༧སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ། རྩོམ་ཡོང་ཁུངས་གཏོ་ཡི་བཀའ་སྒྲོམ།

ལན། ཧི་མ་ལ་ཡཱ་ཡི་རི་རྒྱུད་ཀྱི་མི་རིགས་ནི་བོད་མི་དང་ཕལ་ཆེར་ངོ་གདོང་དམར་ལ་སྣུམ་མདངས་ཆེ་ཞིང་སྣ་བཟོ་ལེབ་མོ་དང་མགོ་སྐྲ་ནག་པོ་ཡོད་པ་ཕལ་ཆེར་མཐུན། མི་རིགས་དེ་རྣམས་ཀྱི་དད་ཡུལ་གྱི་ཆོས་ལུགས་དེ་ལའང་དུས་ཀྱིས་འགྱུར་ལྡོག་ལ་བརྟེན་ནས་འདི་ཞེས་ངོས་བཟུང་བར་དཀའ་བར་གྱུར་ཡོད། འོན་ཀྱང་སྔོན་རབས་ཀྱི་དུས་སུ་ཕལ་ཆེ་བ་ཞང་ཞུང་གི་མངའ་ཁོངས་སུ་ཡོད་ཅིང་ཆོས་ལུགས་དད་མོས་ཀྱང་བོན་ལ་བྱེད་པ་ལོ་རྒྱུས་སོགས་ནས་དཔོག་ཐུབ། རྗེས་སུ་རིམ་པས་ཕྱི་ནང་གི་ཆོས་ལུགས་ཇི་སྙེད་ཅིག་དར་བར་མ་ཟད། ལྟ་གྲུབ་ལས་སོགས་སྲོལ་གསར་དུ་གཏོད་པ་པོ་མེད་པའི་ཤ་མན་ནམ་རང་བྱུང་གི་ཁམས་ལ་ལྷ་རུ་བལྟ་བའི་སྲོལ་ཀྱང་ཇི་སྙེད་ཅིག་དར་ཡོད་འདུག མི་རིགས་དེ་དག་གི་རིག་གཞུང་སྟེ། ཆ་ལུགས་ཆས་གོས་སྐད་ཡིག་སོགས་ཀྱང་ཆོས་ལུགས་ལ་འགྱུར་ལྡོག་བྱུང་བ་ལྟར་དེ་དག་ལའང་འགྱུར་བ་སྣ་ཚོགས་སུ་ཕྱིན་ཏེ་ད་ལྟ་ཐུན་མིན་གྱི་རིག་གཞུང་འདི་ཞེས་ངོས་འཛིན་དཀའ་བའི་གནས་སུའང་འགྱུར་བཞིན་ཡོད་འདུག འོན་ཀྱང་ཕལ་མོ་ཆེ་ད་ལྟའང་བོད་སྐད་དང་བོད་ཡིག་ལ་བེད་སྤྱོད་བྱེད་བཞིན་ཡོད།།