ཞང་ཞུང་སྐད་དུ་དགེ་རྒན་ནམ་དགེ་བའི་བཤེས་གཉེན་ལ་གང་ཟེར།

ལན་གནང་མཁན། རྒོལ་མདའ། བཀའ་དྲི་གནང་མཁན། རིག་པའི་མེ་ལྕེ།

དྲི་བ། ཞང་ཞུང་སྐད་དུ་དགེ་རྒན་ནམ་དགེ་བའི་བཤེས་གཉེན་ལ་གང་ཟེར།

ལན། ཞང་སྐད་ནི་བཙན་པོའི་རྒྱལ་རབས་ཀྱི་སྔ་ས་ཞིག་ལ་ཆེས་ཁྱབ་ཆེ་བའི་རང་རིགས་ཀྱི་ཕ་སྐད་དངོས་ཞིག་ཡིན་པ་བོན་དཔེ་རྙིང་ཁག་ལས་ཀྱང་ར་སྤྲོད་པའི་གནས་སྟངས་ཞིག་རེད་སྙམ། དེ་བས་ན་བོད་བཙན་པོའི་རྒྱལ་ཁབ་འཐོར་ལ་ཉེ་བའི་དུས་ཡུན་ཞིག་ལ་ཆ་བཞག་ན་ཞང་སྐད་ཡང་དེ་བཞིན་དུ་ཡར་ལུང་གི་བོད་མི་ཚོས་ངག་ལམ་ནས་དོར་ལ་ཉེ་བའི་དུས་ཞིག་ལ་ཐུག་འདུག་པ་མིན་འགྲོ་བསམ་བསམ་ཞིག་རེད་འདུག
དེ་ལྟར་གནའ་བོའི་ཕ་སྐད་དམ་ཞང་སྐད་དེ་ཡང་བོད་བཙན་པོའི་རྒྱལ་ཁབ་འཐོར་འཇིགས་སུ་སོང་ཆར་སྐད་དེའི་ཚེ་སྲོག་ཡང་མེད་བརླག་ལ་འགྲོ་དགོས་པར་ཕྱི་ནང་གི་རྐྱེན་མང་མང་ཞིག་ཡོད་ཙང་རེ་ཞིག་འདིར་མི་གླེང་བར་བྱ་རྒྱུ་ཡིན་ལ། མདོར་དྲིལ་ན་ “ དགེ་རྒན། ” དང་ “ བཤེས་གཉེན། ” ཟེར་བའི་མིང་འདི་དག་ཕྱིས་བྱུང་གི་ཐ་སྙད་འབའ་ཞིག་རེད་སྙམ། ད་ལྟ་ཐ་སྙད་འདི་དག་ལ་འཐུས་པའི་ཞང་སྐད་དངོས་ཞིག་སྙེད་མི་རུང་ནའང་སྤུ་རྒྱལ་བོད་ཀྱི་ཐ་སྙད་རྙིང་པ་ཁག་ལ་སྦྱར་ནས་དེ་དང་ཆ་མཐུན་གྱི་ཞང་སྐད་ཡོད་པར་སྙམ། གང་ཞེ་ན་བོད་སྐད་ཀྱི་སློབ་དཔོན་ལ་ཞང་སྐད་ཀྱིས་ “ གུ་ཞིན་ ” རུ་འབོད་པ་དང་། གསར་དར་ཐ་སྙད་དགེ་རྒན་ལ་གནའ་དུས་སུ་སློབ་དཔོན་ཞེས་སུ་འབོད་པ་མིན་འགྲོ་སྙམ།
གཞན་ཡང་བོད་སྐད་ཀྱི་སྟོན་པ་ལ་ཞང་སྐད་ཀྱིས་ “ སྤུངས་སོ་ ” ཞེས་འབོད་པ་དང་། ཕྱིས་དར་དགེ་བཤེས་དང་བཤེས་གཉེན་ལ་གནའ་བོ་ལྟར་ན་སྟོན་པ་ཞེས་འབོད་པ་མིན་འགྲོ་སྙམ། དེ་ལྟར་གཅིག་རྗེས་གཉིས་བསྡུར་བྱས་ཡོང་ཚེ་ཁོ་བོར་དེ་འདྲའི་འཆར་སྣང་ཙམ་མ་གཏོགས་མངོན་རྒྱུ་མི་འདུག