བྱིན་རླབས་གཤེན་དགུ་གང་ཡིན་ནམ།
ལོ་པན་མཁས་དགུའི་རྗེས་སུ་བྱོན་པའི་སྔགས་སེམས་ཀྱི་བོན་སྐོར་ལ་ཕུལ་དུ་ཕྱིན་ཞིང་ཉམས་ལེན་མཛད་པའི་གཤེན་པོ་སྟེ། དང་པོ། སྤུངས་རྒྱུང་མཐུ་ཆེན་ནི་རྒྱུང་སྲུབ་གསང་བའི་བྲག་ལ་སྒྲུབས་པ་བཞུགས་ནས་གྲུབ་པ་ཐོབ་ཅིང་གནམ་ལ་འཕུར་བ་དང་ཛྭ་འཕེན་པ་སོགས་ཀྱི་གྲུབ་རྟགས་མཛད།
གཉིས་པ། ལི་ཤུ་སྟག་རིངས་ནི་དང་ཐོག་བོན་མོ་སྟག་ཝེར་ལི་ཝེར་ཟེར་ཞིང་དེ་རྗེས་བྱམས་མ་བསྒྲུབས་ནས་ཕོ་རུ་གྱུར་ནས་ལི་ཤུ་སྟག་རིངས་ཞེས་གྲགས་པའོ།།
གསུམ་པ། མུ་ལི་མི་འགྱུར་ནི་རིགས་དམན་ཤན་པའི་མཐའ་གླིང་དུ་ཚོགས་འཁོར་བསྐོར་བས་རིགས་ངན་མང་པོ་ཐར་པ་བཀོད་པའོ།།
བཞི་པ། ཕུ་ལི་ཡ་དོར་ནི། དམན་པའི་གྲོང་ཁྱེར་དབུས་སུ་རྟུལ་ཞུགས་ཀྱི་ཉམས་ལེན་གཅེར་བུར་དང་། ཉ་རུ་སྤྲུལ་ནས་སེམས་ཅན་གཞན་གསོ་བའི་ཚོགས་མཆོད་ལ་སོགས་རྒྱ་ཆེར་ཕུལ།
ལྔ་པ། ཟ་རང་མེ་འབར་ནི། ལྷོ་མོན་པའི་ནགས་གསེབ་ཏུ་དབལ་ཆུ་བསྐོལ་ཞིང་ཐུན་རྡོ་འཕེན་པ། གནམ་ཐེའུ་ལ་ལྕགས་ཕུར་གདབ་པ་སོགས་ཀྱི་གྲུབ་པ་བརྙེས་པའོ།།
དྲུག་པ། ལྡེ་རོ་ཉམས་འཕེལ་ནི། དུར་ཁྲོད་དུ་བཞུགས་ཤིང་བམ་ཆེན་དང་ཐོད་ཁྲག་གསོལ་བ། ཕྱག་རྒྱ་བསྟེན་ཅིང་མཁའ་ལ་འཕུར་བ་སོགས་མཛད།
བདུན་པ། བྲུ་ཤའི་གྲུབ་ཐོབ་ལྷ་སྲས་ནི། བྲུ་ཤའི་རྒྱལ་མཁར་རྩེ་རུ་བསྒྲུབས་པས་མཁའ་འགྱིང་གི་ཞལ་མཐོང་ཞིང་མ་ཚོགས་བྲན་དུ་བཀོལ་བ་སོགས་མཛད།
བརྒྱད་པ། ཐོ་ལོ་རྒྱང་གྲགས་ནི། ཐོ་གར་གྱི་ཡུལ་བྲག་གསང་ཕུག་ཏུ་སྒྲུབས་པ་མཛད་ནས། བྱ་ལ་སྒོམ་རྒྱག་བཅུག་པ་དང་ཉི་ཟེར་ལ་འཇུས་པ་ལ་སོགས་མཛད།
དགུ་པ། ཉི་མ་འོད་གསལ་ནི། རྨ་རྒྱལ་ཆུ་གླིང་བྲག་ལ་ཤུག་འབྲུའི་བཅུད་ལེན་མཛད་པ་དང་། ཆུ་གནས་ལ་སོགས་ལ་ཞོན་ནས་གྲུབ་པ་ཐོབ་པའོ། །