གཤེན་རབ་ཉིད་ཀྱིས་འབྲེལ་སྒྲའི་སྐོར་འདི་ལྟར་གསུངས།

མཛད་པ་པོ། སྟོན་པ་ཐུགས་རྗེ་ཅན།

མདོ་གཟེར་མིག་འཁོར་སྤང་དགོན་པ་མཛད་པའི་ལེའུ་ལས། “དེ་ལྟར་སྟོང་ལ་ཡོངས་སུ་རྒྱ་མ་ཆད། དམ་པའི་དོན་དུ་ཡེ་ནས་སྟོང༌། ཀུན་རྫོབ་དངོས་སུ་མཚན་མར་སྣང༌། སྣང་སྟོང་གཉིས་ཀའི་དོན་ཚད་ནི། ཏིང་ངེ་འཛིན་གྱིས་གཟུངས་ཐེབས་ན། དེ་བཞིན་ཉིད་ཀྱི་ཏིང་ངེ་འཛིན་ཞེས་བྱ། ཏིང་ནི་མི་ཡེངས་པ་ཉིད་ཡིན། ངེ་ནི་མི་གཡོ་བ་ཉིད་ཡིན། འཛིན་ནི་གཟེར་ཐབས་མི་གཏོང་བ།

དེ་ཡང་གཟུང་འཛིན་ཟིན་དང་གསུམ། ཚིག་དྲུག་བར་ན་ཀྱི་འབྲེལ་པའི། སྒྲ་ནི་དྲུག་པ་འབྲེལ་པའི་ཀྱི། དོན་ནི་སྐྱེས་བུ་བརྟུལ་ཤུགས་དོན། ཆིག་པུས་དགོན་པར་དེ་ལྟར་བསྒོམ། དེ་ནས་ཀུན་ཏུ་སྣང་གི་ཏིང་ངེ་འཛིན། ཀུན་ནི་སྤྱི་བསྡུས་སྒོས་འབྲེལ་གཉིས། ཏུ་ནི་ཡུལ་ལ་དམིགས་པར་བསྐྱེད། སྣང་ནི་སྤྲུལ་སྐུ་བསམ་འདས་ཀྱིས། ཇི་ལྟར་མཐུན་པའི་སྐད་ཀྱིས་སྟོན། ཏིང་ངེ་འཛིན་ནི་གོང་དང་མཚུངས། དེ་ནས་རིག་པ་རྒྱུའི་ཏིང་ངེ་འཛིན་བསྒོམ། དེ་ནི་གོང་མའི་ཚིག་གཞུག་སྡུད། ནས་ནི་འོག་མའི་ཚིག་འགོ་འདྲེན། རྒྱུ་ནི་སྐྱེ་རྒྱུད་དཀར་དམར་སྤྲོ། ཡི་ནི་ཐར་པའི་ལམ་ལ་འདྲེན། ཏིང་ངེ་འཛིན་ནི་གོང་དང་མཚུངས། སྒོམ་བསྒོམ་བསྒོམས་དང་གསུམ་པོ་ཡང༌། ཐིག་ལེ་ངེས་པར་ཁྱོད་ལ་བསྟན། དོན་གྱི་ཏིང་འཛིན་རྣམ་གསུམ་ཡང༌། མི་ཡེངས་དོན་ལ་མི་རྟོག་ན། སྒོམ་པའི་གཞི་གནས་དེ་ཉིད་ཡིན། མི་རྟོག་ཡོངས་ཁྱབ་གསལ་དྭངས་ན། སྒོམ་པའི་དངོས་པོ་དེ་ཉིད་ཡིན། མི་ཆགས་བརྟུལ་ཤུགས་མཁར་གདལ་ན། སྒོམ་པའི་འབྲས་བུ་དེ་ཉིད་ཡིན། དེ་སྐད་ཅེས་སྟོན་པས་འཁོར་ལ་བཀའ་བསྩལ་པ། ” ཞེས་སོགས་གསུངས་འདུག་གོ། །