ཁྱུང་ཡུལ་སྟོད་ཀྱི་སྒྱུ་རྩལ་མི་སྣ་གལ་ཆེན་འགའ་ངོ་སྤྲོད།

      འདིར་ད་ལན་ཁྱུང་ཡུལ་སྤུ་རྒྱལ་ཁུལ་གྱི་ཡིག་བྲིས་པ་མཁས་ཅན་རིག་ཚ་གཡུང་དྲུང་བསྟན་རྒྱལ། ལྷུན་གྲུབ་ཕུན་ཚོགས། རིག་ཚ་ཨོ་དྭངས་དང་། རིག་ཚ་ལྷ་རྗེ་རྣམ་རྒྱལ་དོན་གྲུབ་བཅས་ཀྱི་སྐུ་ཚེའི་མཚམས་སྦྱོར་ཉུང་ངུ་འབུལ་གྱི་ཡིན། ཁོང་རྣམས་དུས་ཀྱི་གཉན་ཕྲང་ཛ་དྲག་པོའི་ཁྲོད་དུ་མི་རིགས་ཀྱི་རིག་གནས་ལ་བྱས་རྗེས་ཤུགས་ཆེར་འཇོག་གནང་མཁན་ཞིག་དང་། ལྷག་པར་དུ་ཁྱུང་པོའི་ཡིག་གཟུགས་འཕེལ་རྒྱས་དང་བོད་སྨན་གྱི་ལག་ལེན་ཐད་ལ་གལ་ཆེའི་ནུས་པ་འདོན་སྤེལ་གནང་མཁན་ཞིག་ཡིན། གཡུང་དྲུང་བསྟན་རྒྱལ་དང་། ལྷུན་གྲུབ་ཕུན་ཚོགས། རྣམ་རྒྱལ་དོན་གྲུབ་གསུམ་ནི་གོ་ཡི་རིག་ཆུང་ཚང་ལ་ཕ་བུ་དུ་བྱུང་བའི་མི་རབས་གསུམ་གྱི་མི་སྣ་ཡིན། ཁོང་རྣམས་ཀྱི་སྐུ་རིང་རིག་ཚ་ཚང་གི་ཡིག་བྲིས་རིག་གནས་དང་སྨན་རྩིས་ལག་ལེན་བཅས་ཀྱི་འཕེལ་རྒྱས་ཆེན་པོ་བྱུང་བ་དང་ལྷག་ཏུ་ཡིག་བྲིས་སྒྱུ་རྩལ་གྱིས་ཁྱུང་ཡུལ་གྱི་ཡིག་སྣ་དུ་མའི་ཁྲོད་དུ་བྱས་རྗེས་འབུར་དུ་ཐོན་པ་བྱུང་ཡོད། 

   ཡུལ་གྲུ་རེ་ལ་ཐུན་མིན་གྱི་རིག་གནས་མི་འདྲ་བ་རེ་ཡོད་སྟབས་ངེད་ཁྱུང་ཡུལ་ལ་མཚོན་ན། ལྷ་བྲིས་དང་། གསོ་རིག ཡིག་བྲིས་སྣ་ཚོགས་བཅས་སྲོལ་རྒྱུན་གྱི་རིག་གནས་འདི་ཉིད་དུས་སྔ་མོ་ནས་བྱུང་ཞིང་སྤྱི་ཚོགས་སུ་བྱས་རྗེས་གང་འཚམས་འཇོག་མྱོང་ཡོད་པས། རིག་གནས་དེ་དག་ལ་དཔྱད་ཞིབ་ཚགས་ཚུད་བྱེད་རྒྱུ་ཧ་ཅང་གལ་ཆེན་པོར་གྱུར་ཡོད། ད་ལན་བདག་གིས་གཤམ་དུ་མི་སྣ་དེ་དག་གི་ངོ་སྤྲོད་ཉུང་ངུ་འབུལ་བ་འདི་སླད་ཕྱིན་ཁྱུང་ཡུལ་གྱི་རིག་གནས་ཞིབ་འཇུག་གི་དཔྱད་གཞིའི་ས་བོན་ཙམ་དུ་ཕུལ་བ་ཡིན། ། 

 

 

   དང་པོ། རིག་ཚ་གཡུང་དྲུང་བསྟན་རྒྱལ་ནི་གནའ་དུས་ཞང་ཞུང་སྒོ་པ་དེང་བོད་ཆབ་སྟེང་ཆེན་རྫོང་གི་བྱང་རྒྱུད་གནས་མཆོག་སྤུ་རྒྱལ་གངས་རིའི་ཉེ་འཁྲིས་ག་ཐ་གོ་གཞུང་ཞེས་པའི་འབྲོག་སྡེ་རུ། རབ་བྱུང་བཅོ་ལྔ་པའི་མེ་ཡོས་ཕྱི་ལོ་ ༡༩༠༣ ལོར་ཡབ་རིག་ཚ་གཡུང་དྲུང་ཚེ་བརྟན་དང་། ཡུམ་ཨ་མཁར་བཟའ་ཚེ་རིང་དགའ་སྐྱིད་གཉིས་ཀྱི་བུ་རུ་རིག་ཚ་ཚང་ཞེས་པའི་དུད་ཁྱིམ་དུ་འཁྲུངས། གོ་ཡི་རིག་ཚ་ཚང་ནི་ལོ་རྒྱུས་ཐོག་འབྱོར་ཕྱུག་ལྡན་པའི་ཁྱིམ་ཚང་ཞིག་ཡིན་ཁར་མི་རྣམས་དགེ་སེམས་ཆེ་ཞིང་ཡ་རབས་ཀུན་སྤྱོད་ལྡན་པ་ཤ་སྟག་ཏུ་ཡོད། གཡུང་དྲུང་བསྟན་རྒྱལ་ནི་ཆུང་བྱིས་དུས་ནས་ཡོན་ཏན་ཀུན་གྱི་གཞི་མ་འབྲི་ཀློག་ལེགས་པར་བསླབས་ནས་རིག་པའི་སྒོ་ཡངས་པོར་ཕྱེས། 

དམུ་མཁས་གྲུབ་ཀྱི་དྲུང་དུ་ཡིག་བྲིས་ཟབ་སྦྱོང་མཛད་པས་ཁྱུང་གཟབ་ལ་འགྲན་དུ་མེད་པའི་དམིགས་བསལ་གྱི་ཡིག་གཟུགས་བྱུང་བ་དང་། ཁྱུང་བྲིས་འབྲུ་མ་ལ་ཡང་རིག་ཚའི་མི་རབས་དེར་ཡིག་གཟུགས་འཕེལ་རྒྱས་ཕྱིན་ནས་མི་རྣམས་ངོ་མཚར་སྐྱེ་བར་གྱུར། མ་ཟད་ཞང་བོད་ཀྱི་ཡིག་གཟུགས་འབྲུ་དང་། ལྗིབ། སྨར་ཡིག འཁྱུགས་ཡིག་སོགས་ཡིག་སྣ་དུ་མར་མཁས་པར་གྱུར། ཁོང་གིས་ཕྱག་བྲིས་གནང་བའི་ཡིག་རྙིང་པོ་ཏི་ཁ་ཤས་ཀྱང་དུས་ད་དུང་ཡང་མཇལ་དུ་ཡོད། དམ་པ་ཁོང་ཉིད་བོད་ཀྱི་ས་གནས་དུ་མར་གསུང་རབ་འབྲི་བཞེངས་བྱེད་དུ་ཕེབས་ནས་ཡིག་བྲིས་སློབ་ཁྲིད་དང་གསུང་རབ་བཞེངས་བསྐྲུན་གྱི་ཁྲོད་དུ་བྱས་རྗེས་ཆེ་ཆེར་འཇོག་གནང་ཡོད་ལ། ལྷག་དུ་ག་ཤེལ་ཁྲི་རིན་པོ་ཆེས་ཤར་གྲོལ་སྨིན་གླིང་དགོན་དུ་གསུང་རབ་སྟོང་ཕྲག་དུ་མ་བཞེངས་སྐབས་ཁོང་ཉིད་ཀྱི་ཡིག་གཟུགས་ཚད་འཛིན་ས་དང་ཡིག་བྲིས་པ་རྩེར་སོང་ཞིག་ཏུ་ངོས་འཛིན་གནང་གི་ཡོད་འདུག་ལ། རིག་ཚ་བསྟན་རྒྱལ་གྱི་ཕྱག་བྲིས་ལ་རབ་གནས་མི་དགོས་ཞེས་ཁྲི་རིན་པོ་ཆེས་བསྟོད་བསྔགས་ཆེ་ཆེར་མཛད་མྱོང་ཡོད། མ་ཟད་བོད་ཀྱི་གསོ་བ་རིག་པ་དང་རྩིས་རིག་སོགས་རིག་གནས་གཞན་གྱི་ཐད་ལ་ཡང་མཁྱེན་རྒྱ་ཆེན་པོ་ལྡན་པ་ཞིག་ཞིང་། བོན་གྱི་ཆོ་ག་བཅའ་འདོན་དང་གྱེར་དབྱངས་འཕྲིན་ལས་ལ་དབུ་མཛད་རྩེར་སོང་ཞིག་ཀྱང་ཡིན། ག་ཤེལ་དགོན་གྱི་དབུ་མཛད་ལོ་མང་མཛད་པས་མཚན་ལ་རིག་ཚ་དབུ་མཛད་ཅེས་ཐོགས། མཐར་ཕྱི་ལོ་ ༡༩༦༩ ལོར་སྐུ་ཞི་བར་གཤེགས། ། 

 

 

   གཉིས་པ། རིག་ཚ་ལྷུན་གྲུབ་ཕུན་ཚོགས་མཆོག་ནི། རབ་བྱུང་བཅུ་དྲུག་པའི་ཕྱི་ལོ་ ༡༩༢༧ ལོར་ཡབ་རིག་ཚ་གཡུང་དྲུང་བསྟན་རྒྱལ་དང་། ཡུམ་ཨ་སེར་བཟའ་གཡང་ཆེན་དཔལ་མོ་གཉིས་ཀྱི་སྲས་སུ་ཁྱུང་ཡུལ་ག་ཐ་གོ་གཞུང་དུ་འཁྲུངས། ཆུང་བྱིས་དུས་ནས་ཡབ་ཀྱི་དྲུང་ནས་ཡི་གེ་འབྲི་ཀློག་ཆོ་ག་བཅའ་འདོན་སོགས་བསླབས། ཆེ་ཆེར་ཕྱིན་དུས་སྨན་དང་ཡིག་གཟུགས་སོགས་ལ་སྦྱོང་པ་རྒྱ་ཆེར་མཛད་པས་རང་གི་ཡབ་ལྟར་རིག་གནས་དུ་མར་མཁས་པར་གྱུར། ཁོང་ཉིད་ནི་སྤྱིར་ཡིག་རིགས་དབུ་ཅན། དབུ་མེད། སྨར་ཡིག་སོགས་ཡིག་སྣ་དུ་མ་ལ་མཁས་ཀྱང་། འབྲུ་དང་གཟབ་གཉིས་ལ་མགྱོག་ཚད་ཆེ་ཞིང་མཛེས་ཆོས་དོད་པ་ཀུན་ལས་ངོ་མཚར་ཆེ་བར་གྱུར། ཡིག་བྲིས་མགྱོག་ཚད་ཀྱི་ཐོག་ནས་ཉིན་རེར་ཀློང་རྒྱས་སྟོང་འཛབ་ཚར་ ༢༤༥ རེ་ཙམ་འབྲི་བ་དང་། བྱམས་མ་སྔགས་བསྟོད་ཚར་རེ་ཇ་འཐུང་ཡུན་ཙམ་དུ་འབྲི་ཐུབ་པ་དང་། ཡིག་གཟུགས་ཀྱི་ཟབ་ཚད་ལ་མཛུག་གུའི་སོར་མོ་གཅིག་གི་ཐོག་ཏུ་ ” གྱི་གྲན་ཤུ་ནིག་མ་ར་ཡ་ཨུ་ཙ་ཏ་ཡ་ཕད ” ཅེས་པའི་ཡིག་འབྲུ་རྣམས་ཚང་མས་འདོན་རྒྱུ་ཡོད་པ་གསལ་པོར་འབྲི་ཐུབ་པ་སོགས་ཁོང་ལ་ཡིག་བྲིས་སྒྱུ་རྩལ་དམིགས་བསལ་ཡོད་པ་ཡིན། 

   ཁོང་ཉིད་ནི་བོད་ཀྱི་གསོ་བ་རིག་པར་ཧ་ཅང་མཁས་པ་ཞིག་ཡིན་འདུག རིག་གནས་གསར་བརྗེའི་སྐབས་ས་གནས་མང་པོར་སྨན་སྦྱིན་མཛད་དུ་ཕེབས་པ་དང་། མུག་གེས་མནར་བའི་ནད་པ་མང་པོ་ཐབས་ལམ་དུ་མས་གསར་བཅོས་བྱས་པ་དང་། ཕྲུ་གུའི་གློ་ནད་ལ་འོ་ཁོལ་དང་སྨན་སྣ་བསྲེ་སྦྱོར་གྱིས་དྲག་སྐྱེད་ཐུབ་པ་སོགས་དམིགས་བསལ་གྱི་བཅོས་ཐབས་སྣ་ཚོགས་ལྡན་པའི་ལྷ་རྗེ་གྲགས་ཅན་དུ་གྱུར། ཁོང་བོན་གྱི་ཆོ་ག་བཅའ་འདོན་སྣ་ཚོགས་ལ་མཁས་སྟབས་ཤར་གྲོལ་སྨིན་གླིང་དགོན་དུ་དབུ་མཛད་ལོ་མང་མཛད་པས་མི་རྣམས་ཀྱིས་རིག་ཚ་དབུ་མཛད་ཅེས་བླ་མ་ལྟ་བུའི་བརྩི་མཐོང་ཆེན་པོ་བྱས་པ་ཡིན། 

གནའ་དུས་བོན་གྱི་སྔགས་འཆང་གཞན་ལྟར་གསང་སྔགས་སྒོམ་སྒྲུབ་ཀྱི་ཉམས་ལེན་རྒྱུན་སྐྱོང་གནང་མཁན་ཞིག་ཡིན་སྟབས་མཐར་དུས་རབས་ཉི་ཤུ་པའི་ལོ་རབས་བརྒྱད་ཅུ་ཕྱི་ལོ་ ༡༩༨༧ ལོར་སྐུ་ཞི་བར་གཤེགས་སྐབས་རིང་བསྲེལ་སྣ་ཚོགས་འཁྲུངས་པར་དུས་ད་ལྟ་ཡང་གོ་ཡི་རིག་ཆུང་ཚང་དུ་ཡོད། ཁོང་གི་བུ་རིག་ཚ་ལྷ་རྗེ་རྣམ་རྒྱལ་དོན་གྲུབ་དང་། རིག་ཚ་དབུ་མཛད་བུ་དབང་སྐེས་བཅས་ཕ་ཤུལ་བུ་འཛིན་གྱི་རིག་གནས་རྒྱུན་སྐྱོང་མཛད་པའི་ཤེས་ལྡན་མང་དུ་བྱུང་ཡོད་ལ། ཁྱིམ་ཚང་གི་གནས་བབས་ཀྱང་དར་རྒྱས་སུ་འགྲོ་མུས་ཡིན། ། 

 

 

   གསུམ་པ། རིག་ཚ་ཨོ་དྭངས་མཆོག་ནི་རབ་བྱུང་བཅོ་ལྔ་པའི་ཤིང་བྱི་ཕྱི་ལོ་ ༡༩༢༥ ལོར་ཡབ་རིག་ཚ་བསམ་པ་དང་། ཡུམ་རྨེ་བཟའ་ཨོ་སྐྱིད་གཉིས་ཀྱི་བུ་རུ་ཁྱུང་ཡུལ་ག་ཐར་སྐྱེས། སྐུ་ན་ཅུང་ཟད་སླེབས་དུས་རབ་ཏུ་བྱུང་སྟེ་ཤར་རྫ་ཁོག་ཏུ་སློབས་གཉེར་ལ་ཕེབས་ཤིང་། ཀུན་མཁྱེན་ཤར་རྫ་པའི་མཛོད་ཆེན་ལྔ་སོགས་ནང་དོན་རིག་པའི་གཞུང་ཆེན་ཁག་ལ་སྦྱོང་བརྩོན་མང་ཙམ་མཛད། སླར་རང་ཡུལ་དུ་ཕེབས་ནས་མཚམས་བཞུགས་གནང་། རིག་གསར་སྐབས་དམངས་བཙུག་སློབ་གྲྭའི་དགེ་རྒན་བྱེད་བཞིན་བཞུགས། སྐབས་དེར་ཁོང་ལ་གོ་གནས་ཅུང་ཙམ་ཡོད་སྟབས་ཞོར་ནས་ཡུལ་སྡེའི་གསུང་རབ་མང་པོ་ཉར་ཚགས་མཛད་པ་དང་རིག་གནས་ཀྱི་མི་སྣ་དུ་མར་གསོ་སྐྱོང་མཛད་པས་སྤྱི་ཚོགས་ལ་ཞབས་འདེགས་ཆེན་པོ་ཞུས། 

   ཞང་ཞུང་སྐལ་བཟང་ནོར་བུའི་དྲུང་དུ་ཡིག་བྲིས་བསླབས་ནས་ཡིག་བྲིས་ཀྱི་མཚན་སྙན་ཕྱོགས་གང་སར་མཆེད། ཁོང་ཉིད་ཁྱུང་ཡུལ་གྱི་ཡིག་བྲིས་པ་རྩེ་ཕུད་ཞིག་ཏུ་ངོས་འཛིན་པ་ཡིན། ཁོང་གིས་བྲིས་པའི་པོ་ཏི་བཅུ་སྐོར་བོན་གྱི་བཀའ་བརྟེན་འགྱུར་ཁྲོད་དུ་བཞུགས་ཡོད་ལ། བྲིས་པའི་ཡིག་གཟུགས་མཛེས་ཤིང་བརྙེན་ལྕུགས་དོད་པ། ཆད་ལྷག་ཉུང་བ་སོགས་ངོ་མཚར་འབུར་དུ་ཐོན་པ་ཡོད། ལྗོངས་རིམ་པའི་ཡིག་གཟུགས་འགྲན་བསྡུར་སྐབས་ཨང་དང་པོའི་བྱ་དགའ་མང་དུ་ཐོབ་ནས་ཕྱོགས་གང་སར་སྙན་གྲགས་མེ་ལྕེ་ལྟར་མཆེད། རིག་གསར་རྗེས་སླར་ཡང་མཚམས་བཞུགས་མཛད་དེ་བླ་མེད་རྫོགས་པ་ཆེན་པོའི་ལྟ་བའི་དོན་ལ་རྩེ་གཅིག་གཞོལ་ནས་གྲུབ་ཆེན་གོང་མའི་རྣམ་ཐར་ཐུགས་ལ་འཛིན། ཞོར་དུ་ཡུལ་མི་གཞོན་སྐྱེས་མང་པོར་ཡིག་གེ་དང་བྲིས་སོགས་བསླབས་པས་ད་ཆ་ཁོང་གི་སློབ་མ་དང་སློབ་རྒྱུད་ཡིག་བྲིས་པ་སྙན་གྲགས་འབར་བ་མང་དུ་ཡོད། མཐར་བོད་རབ་བྱུང་བཅུ་བདུན་པའི་ས་ཡོས་ཕྱི་ལོ་ ༡༩༩༩ ལོར་ག་ཐ་གཡུ་ལུང་རི་ཁྲོད་དུ་གཟིམས་ཁྲི་མཐའ་ཅན་དུ་གྱུར། ། 

 

 

   བཞི་པ། རིག་ཚ་ལྷ་རྗེ་རྣམ་རྒྱལ་དོན་གྲུབ་མཆོག་ནི་བོད་ཆབ་སྟེང་ཆེན་རྫོང་གི་བྱང་རྒྱུད། བླ་རི་སྤུ་རྒྱས་གངས་དཀར་ཀྱི་ཤར་ཕྱོགས་གོ་པ་ཞེས་པའི་འབྲོག་སྡེ་རུ། རབ་བྱུང་བཅུ་དྲུག་པའི་ཆུ་ཡོས་ཕྱི་ལོ་ ༡༩༦༣ ལོར་ཡབ་རིག་ཚ་ལྷུན་གྲུབ་ཕུན་ཚོགས་དང་ཡུམ་དཔོན་ཚང་བཟའ་བཀྲ་ཤིས་གཡང་སྐྱིད་གཉིས་ཀྱི་བུ་རུ་རིག་ཚ་ཚང་དུ་སྐུ་འཁྲུངས། ལོ་ན་ཆུང་དུས་ཡབ་ཀྱི་དྲུང་དུ་ཡིག་བྲིས་དང་སྨན་གཞུང་བཅས་ལ་སློབ་གཉེར་གང་ཐུབ་ཞུས། ལོ་ན་སོང་རྗེས་ཡུལ་གྱི་སྨན་པ་རྒན་རིགས་དུ་མའི་ཞབས་ལ་བཏུག་ནས་གསོ་རིག་ལ་ལག་ལེན་ཕུལ་ཕྱིན་ཡོང་བར་མཛད། 

   ༡༩༨༦ ལོར་རང་ལོ་ཉེར་བཞིའི་ཐོག་སྨན་དཔྱད་དངོས་སུ་ཕྱག་བསྟར་མཛད་ནས་ཡུལ་གྱི་མང་ཚོགས་ལ་སྨན་སྦྱིན་རྒྱ་ཆེར་གནང་བ་དང་། ལྷག་ཏུ་དམ་པ་ཁོང་ལ་གཞན་དང་མ་འདྲ་བའི་ནད་པའི་ཐོག་ཏུ་བརྩེ་སེམས་དང་སྙིང་རྗེ་ཆེན་པོ་ཡོད་ལ། འཚོ་བ་ཕྱུག་དབུལ་གྱི་བཟང་ངན་ལ་མི་བལྟ་ནས་ཀུན་ལ་སྨན་སྦྱིན་གནང་རྒྱུ་ནི་ཁོང་གི་ཐུགས་གཤིས་སུ་གྱུར། མ་ཟད་ལོ་ན་བཅུ་ཕྲག་དུ་མར་རིན་མེད་དུ་སྨན་སྦྱིན་བསྩལ་བ་དང་ཛ་དྲག་གི་ནད་པ་གང་དུ་བྱུང་ན་མཚན་མོ་ཡིན་རུང་དཀའ་ཚེགས་ཀྱི་ལམ་འཕྲང་གང་ལ་མི་འཛེམས་ནས་ནད་པར་བལྟ་རུ་ཕེབས་གནང་གི་ཡོད། 

   སྤྱིར་ཡིག་བྲིས་དང་འབྱུང་རྩིས་བཅས་མང་ཚོགས་ལ་ཁ་ཚ་དགོས་གཏུག་ཏུ་མཁོ་བའི་ཤེས་བྱ་མང་པོ་མཁྱེན་སྟབས་དེར་མཐུན་གྱིས་ཡུལ་སྡེ་ལ་སྲིད་ཞུ་རྒྱ་ཆེར་གནང་མྱོང་། ལྷག་ཏུ་དམ་པ་ཁོང་ཉིད་བོད་ལུགས་གསོ་རིག་ལག་ལེན་ཐད་ཉམས་མྱོང་ཚད་མཐོར་སོང་མཁན་ཞིག་ཡིན་པ་དང་། ནད་བཅོས་ཐད་ནས་མཁལ་མ་དང་། མཆིན་པ། ཕོ་བ་བཅས་ལ་ཧ་ཅང་གི་མཁས་པོ་ཡིན་པས། ཕྱི་ལུགས་སྨན་ཁང་ཁག་ནས་དྲག་སྐྱེད་བྱུང་མ་ཐུབ་པའི་ནད་པ་མང་པོ་འཇམ་བཅོས་གནང་ནས་དྲག་སྐྱེད་ཐུབ་པ་ཡང་བྱུང་ཡོད། 

   ༢༠༠༢ ལོར་ནས་གཞུང་གི་སྨན་པའི་ཕྱག་ལས་གནང་སྟེ་གོ་སྡོམ་ཚུན་གྱི་སྨན་པའི་འགན་ཁུར་བ་དང་། བོད་ཕྱི་ཟུང་འབྲེལ་གྱིས་མི་མང་ལ་སྨན་ལས་གནང་ནས་ཀུན་གྱིས་བསྟོད་བསྔགས་ཡུལ་དུ་གྱུར་པ་མཛད། 

༢༠༠༨ ལོ་ནས་ག་ཐ་ཤང་གི་འཕྲོད་བསྟེན་སྨན་ཁང་དུ་ཡང་ཀྲང་གྱི་འགན་བཞེས་ནས་སྨན་པའི་ཕྱག་ལས་མུ་མཐུད་དུ་གནང་། མང་ཚོགས་ཀྱི་ཐུགས་འདུན་བསྐང་ཞིང་ལས་དོན་ཚགས་ཚུད་གནང་སྟབས་སྲིད་གཞུང་གིས་བྱ་དགའ་རིམ་པ་མང་པོ་བསྩལ་བ་དང་། བོད་རང་སྐྱོང་ལྗོངས་སྨན་རྩིས་ཁང་ནས་སྨན་པ་བཀའ་བཅུ་པའི་ཕྱག་འཁྱེར་ཡང་བསྩལ་གནང་ཡོད། 

   དམ་པ་ཁོང་གིས་སྐུ་ཚེ་ཧྲིལ་པོར་ནད་པ་བརྟག་དཔྱད་དང་ཉམས་ཐག་སྨན་སྦྱིན་གྱི་ཕྱག་ལས་རླབས་ཆེན་བསྐྱངས་ཤིང་། གསོ་རིག་སློབ་མ་བཅུ་ཕྲག་ལྷག་ཙམ་བསྐྱེད་བསྲིང་གནང་བའི་ཁྲོད་ནས། སྨན་པའི་ལག་རྩལ་ཚད་མཐོར་སོང་བའི་བསོད་ནམས་འབྲུག་དགེ་ལགས་དང་། ཁོང་གི་བུ་ཁྲོ་གསས་མཁའ་འགྱིང་། ཁྲི་གཅེས་སྐལ་ལྡན་བཅས་ད་ལྟ་སྨན་པའི་ཕྱག་ལས་སྤུས་དག་གནང་ཐུབ་པ་བྱུང་ཡོད། ཁོང་ཉིད་སྐུ་འཚོ་བཞུགས་སྐབས་སུ་ས་གནས་སྤ་ཟླ་དང་། གཡམ་ཐ། ག་ངས། འབོ་ཐ། དམུ་ཐ། ག་ཐ་བཅས་ས་ཐག་ཉེ་རིང་འདྲ་མིན་ནས་རྒྱུན་མ་ཆད་པར་སྨན་བསྟེན་དུ་ཡོང་མཁན་ཡོད། ཕངས་སེམས་ཤོར་བ་ཞིག་ལ་ཁོང་གིས་སྨན་པའི་ཕྱག་ལས་རླབས་ཆེན་བསྒྲུབ་མུས་སུ་གློ་བུར་དུ་སྐུ་ཚེ་མ་ཟིན་ནས་ཕྱི་ལོ་ ༢༠༡༨ ལོར་དགུང་ལོ་ང་དྲུག་ཐོག་སྐུ་གཤེགས་པ་ནི་གཞུང་མང་གཉིས་ལ་གྱོན་གུན་དུ་གྱུར།

 

གོང་གསལ་ལོ་རྒྱུས་ཉུང་ངུ་དེ་བདག་གི་ཨ་ཞང་ཁྲོ་གསས་མཁའ་འགྱིང་གྱིས་བསྐུལ་མ་གནང་བ་ལྟར་འཕྲིན་མིང་ལ་ཞང་ཚུལ་མི་འབོད་པས་གནས་མཆོག་ཁྲི་བརྟན་ནོར་བུའི་རྩེ་རུ་ཕྱི་ལོ་ ༢༠༡༨ ལོར་སློབ་ཚན་གྱི་བར་གསེང་དུ་མགྱོགས་བྲིས་བྱས་སོ།། །།