བླ་མ་ཡར་འབྲོག་པ་དང་འབྲེལ་བའི་དྲི་བ་འགའ།
བཀའ་དྲི་གནང་མཁན། ནེའུ་ཆུང་། ལན་འབུལ་མཁན། དགེ་ཧི་མ་ལ་ཡའི་རྒྱལ་སྲས།
བཀའ་དྲི། བླ་མ་ཡར་འབྲོག་པའི་རྣམ་ཐར་སྐབས་སུ། “ བླ་མ་དམ་པ་བྲུ་སྟོན་རྗེ་བཙུན་གཉིས། མཁན་སློབ་དབུ་བཞུགས་ཀྱི་སྐུ་མདུན་ནས་དྲང་སྲོང་ཉིས་བརྒྱ་ལྔ་བཅུའི་ཁྲིམས་རྣམས་རྫོགས་པར་ཞུས།” ཞེས་པའི་སྐབས་ཀྱི་བྲུ་སྟོན་རྗེ་བཙུན་གཉིས་གང་དང་གང་ཡིན་ནམ།
ལན། བྲུ་སྟོན་རྗེ་བཙུན་གཉིས་ནི། བྲུ་རྗེ་གཡུང་དྲུང་བླ་མ་དང་། བྲུ་འདུལ་བ་རྒྱལ་མཚན་གཉིས་ཡིན་ནམ་སྙམ་སྟེ། བླ་མ་ཡར་འབྲོག་པའི་རྣམ་ཐར་ལས། “ མི་ཆོས་བཤོལ་ནས་བླ་མ་འདུལ་བ་དང་། བྲུ་སྟོན་རྗེ་བཙུན་ལས་མཁན་སློབ་ཞུས་ནས་རབ་ཏུ་བྱུང་། ” ཞེས་དང་། བྲུ་རྒྱལ་བ་སོགས་ནི་སྐབས་དེར་ཁོང་གི་བླ་མ་དགོངས་མཛོད་རི་ཁྲོད་ཆེན་པོའི་རྩ་བའི་བླ་མ་བརྒྱད་སོགས་ཀྱི་ནང་ཚན་ཡིན་སྟབས་དགོངས་མཛོད་པས་བླ་མ་ཡར་འབྲོག་པ་ལ་རང་ཉིད་ཀྱི་རྩ་བའི་བླ་མའི་མདུན་ནས་རབ་བྱུང་ཞུ་རུ་བཅུག་པ་ནི་དོན་དང་ལྡན་པ་ཞིག་རེད་དྲན།
བཀའ་དྲི། ཤངས་ཀྱི་ཕུག་ལེབ་ཅེས་པར་གང་ན་ཡོད་དམ།
ལན། ཤངས་ཀྱི་ཕུག་ལེབ་ཅེས་པ་ནི་དེང་བོད་ལྗོངས་གཞིས་རྩེ་ས་ཁུལ་རྣམ་གླིང་རྫོང་ནང་ཡོད་པའི་དཀར་པོ་ཤངས་ཞེས་པ་དེར་ཡོད་དགོས་ཏེ། དགོངས་མཛོད་རི་ཁྲོད་པ་བཞུགས་སའི་གཡས་རུ་དཀར་པོ་བྲག་གི་སྒྲུབ་གནས་ཀྱང་དེའི་ཕྱོགས་སུ་ཡོད་པས་སོ། །
བཀའ་དྲི། འུ་ཡུག་ཡོན་པོ། ཞེས་པའི་ས་གནས་གང་དུ་ཡོད།
ལན། འུ་ཡུག་ཡོན་པོ་ནི། དེང་བོད་ལྗོངས་གཞིས་རྩེ་ས་ཁུལ་རྣམ་གླིང་རྫོང་ནང་ཡོད་པའི་འུ་ཡུག་ཅེས་པའི་ལུང་པ་དེ་བར་ཡིན་ནམ་སྙམ་སྟེ། གཅིག་ནས་དགོངས་མཛོད་པ་ཉིད་ཀྱང་དེ་ཕྱོགས་ནས་ཡིན་པ་དང་། གཉིས་ནས་ས་གནས་དེར་སྔར་འུ་ཡུག་གླིང་དཀར་རྫོང་ཞེས་དབུས་གཙང་རྫོང་ཆེན་བཅུ་གསུམ་གྱི་ཁོངས་གཏོགས་ནས་གཅིག་སྟེ་གྲགས་པ་ཡོད་མཁན་ཞིག་རེད།
བཀའ་དྲི། སྟག་ལུང་། ཞེས་པ་གང་དུ་ཡོད་དམ།
ལན། སྟག་ལུང་ཞེས་པ་ནི། བླ་མ་ཡར་འབྲོག་པ་སྐུ་འཁྲུངས་སའི་སྟག་ལུང་ར་བ་དམར་མོའི་ཕྱོགས་ཏེ། ས་ཆ་དེ་ནི་སྔོན་དུས་རབས་བཅུ་གསུམ་པར་འགྲོ་མགོན་འཕགས་པའི་དུས་སུ་བཙུགས་པའི་བོད་ཁྲི་སྐོར་བཅུ་གསུམ་གྱི་ཡ་གྱལ་ཡར་འབྲོག་སྟག་ལུང་ཁྲི་དཔོན་གྱི་མངའ་ཁོངས་སུ་གཏོགས་ལ། དེང་བོད་ལྗོངས་ལྷོ་ཁ་ས་ཁུལ་སྣ་དཀར་རྩེ་རྫོང་ཁོངས་སུ་ཡོད། སྟག་ཚང་ལོ་ཙཱ་བ་ཞེས་པའི་མཁས་པ་དེ་ཉིད་འཁྲུངས་སའང་དེར་ཡིན།
བཀའ་དྲི། གཙང་སྐྱིད་མཁར་ཞེས་པ་གང་ན་ཡོད། དེ་བཞིན་ཉང་སྟོད་སྐྱིད་མཁར་དང་གཙང་སྐྱིད་མཁར་གཉིས་གཅིག་གམ།
ལན། གཙང་སྐྱིད་མཁར་ནི་སངས་རྒྱས་ཞུ་ཆེན་ནས་ཞུ་ཚང་གི་བླ་མ་རྣམས་ཀྱི་གདན་ས་སྟེ། ལོ་རྒྱུས་རྣམས་སུ་སྐྱིད་མཁར་སྔོ་ཕུག་ཟོ་བོ་ཁྱུང་ལག་དགོན་དང་དེང་ཞུ་རི་ཞིང་ཞེས་པ་དེ་ཡིན། ཉང་སྟོད་སྐྱིད་མཁར་ཡང་དེ་ཉིད་རང་ཡིན་ཏེ། ལུང་ལས། “ ཁོད་སྤུངས་ང་ཡི་སྤྲུལ་པ་ལ། །ཉང་སྟོད་བྲག་དམར་རྩ་བ་རུ། །ཞུ་གཡས་རྒྱལ་མཚན་དར་ཞེས་འབྱུང་། །དེས་ཀྱང་བསྟན་པ་རྒྱས་པར་བྱེད། །” ཅེས་དང་། བསྟན་འབྱུང་ཕྱོགས་བསྡུས་ལས། (སངས་རྒྱས་ཞུ་ཆེན།) “ ཉང་སྟོད་སྐྱིད་མཁར་རི་ཞིང་དུ། །ཞུ་གཡས་ཇོ་འབར་སྲས་སུ་ཆུ་ཡོས་ལོར། །འཁྲུངས་ཤིང་ཡབ་ཀྱི་དྲུང་དུ་སྔགས་སེམས་ཞུས། །” ཞེས་སོགས་ཀྱིས་ཤེས་ནུས་སོ། །ས་གནས་དེ་ནི་དེང་གི་དུས་སུ་བོད་ལྗོངས་གཞིས་ཀ་རྩེ་ས་ཁུལ་པ་ནམ་རྫོང་ཁོངས་སུ་ཡོད།
བཀའ་དྲི། ཞིང་བསྲུང་ས་ཉིད་དུ། ཞེས་པའི་དོན་གང་རེད།
ལན། ཞིང་བསྲུང་ས་ནི་ཞིང་ཁ་བསྲུང་ས་རང་སྟེ། བླ་མ་ཡར་འབྲོག་པ་ཉིད་ཞིང་ཁ་སྲུང་མཁན་བྱས་པའི་ལོ་རྒྱུས་རྣམ་ཐར་ནང་གསལ་བ་ལྟར་ཡིན། །