རྩེ་ཞྭའི་སྐོར་ལ་དྲི་བ།

རྩོམ་བྲིས་པ། ཞང་ཚུལ་མི་སོགས། དྲི་བ་གཏོང་མཁན། དྭང་ར་བ།

དྲི་བ། རྩེ་ཞྭ་འདིའི་བྱུང་ཁུངས་བོན་བན་གང་ནས་རེད། 

ལན། འདིའི་སྐོར་སྐུ་མདུན་བསོད་ནམས་བློ་གྲོས་ཀྱིས་མཛད་པའི་(བསྟན་པའི་སྲོག་ཤིང་འདུལ་བའི་བསླབ་བྱ་ཨུ་དཔལ་ཆུན་པོ)ལས། བཅོ་ལྔ་པ་རྩེ་ཞྭ་ནི། རྒྱུ་བལ་ལས་གྲུབ་པའི་དུག་པོ་ལྷན་ཆུང་ལྷ་སྐུའི་རྒྱབ་གཡོལ་གྱི་དབྱིབས། རིང་ཐུང་ལ་ཁྲུ་གསུམ་གཉིས་ལྟེབ་བྱས་པའི་དཔངས་དཀྱིལ་དུ་མཐོ་གང་། གཡས་གཡོན་མཐའ་སྣ་ན་སོགས་དྲུག ཟེར་ཚར་དཀྱིལ་དུ་སོར་བདུན་མཐའ་སྣ་སོར་གསུམ་ཡོད་པ་ལ། གཉིས་ལྟེབ་བྱེད་ཅིང་རྩེ་ཡི་ཟེར་ཚར་ཁ་སྦྱར་ཏེ་ལེགས་པར་དྲུབ་པས་རྩེ་ཞྭ་བྱུང་། ། ཞེས་སོ།།

_____Shedup Tenzin

ལན། རྩེ་ཞྭའམ་རྩོད་ཞྭ་ཞེས་པ་འདི་ཉིད་བོད་རང་གི་ཞྭ་མོ་ཞིག་ཡིན་པ་མ་ཟད། ཞྭ་འདི་དང་པོ་བོན་གྱི་འོབ་ཞྭ་སྔོན་པོ་ཞེས་པ་དེ་ཡིན་ལ་ཕྱིས་མདོག་སེར་པོར་བཅོས་ནས་ཆོགས་ཕྱོགས་སུ་དར་ཆེ་བས། ཐོས་ཆུང་རེ་འགའི་སྣང་ངོར་ཆོས་པའི་ཞྭ་མོ་ལྟ་བུར་འཆར་གྱི་ཡོད། བོན་གྱི་མཁས་པ་རེ་འགས་དྲན་པའི་ཞྭ་བཤད་ལས། “ཕྱར་བུ་སེར་པོ་ལུས་ལ་གྱོན། །གྲུམ་རྩེའི་ཞྭ་གཙུག་མགོ་ལ་གྱོན་”། ཞེས་པའི་ལུང་དྲངས་ནས་རྩོད་ཞྭ་འདི་ཉིད་བདུད་ཞྭ་ཡིན་ཚུལ་དང་སྤོང་དགོས་ཚུལ་བཤད་པ་ནི་ཞྭ་དཔེ་ལྷམ་འགེབས་ཀྱི་དཔེ་ལས་མ་འདས། དོན་ངོ་མ་ཞྭ་འདི་ཉིད་དང་པོ་བོན་གྱི་ཞྭ་ཡིན་པ་དང་ཕྱིས་དེ་ལ་ཁ་དོག་བཅོས་ནས་བོད་ཀྱི་གདན་ས་ཁག་གིས་རྩོད་པ་བྱེད་པའི་སྐབས་སུ་བེད་སྤྱོད་བཏང་སྟབས་རྩོད་ཞྭ་ཞེས་པའི་མིང་དུ་གྲགས། མདོར་ན་ཞྭ་འདི་ཉིད་བན་དྷེའི་ཡང་མིན་ལ་བདུད་ཞྭ་ཡང་མིན། ཞྭ་འདིའི་བཟོ་དབྱིབས་ལ་བལྟས་ན་གནའ་དུས་སྔགས་ཞྭ་ཞིག་སྟེ་འགུག་སྒྲོལ་སྟབས་གསུམ་སམ་མནན་བསྲེགས་འཕངས་གསུམ་བྱེད་པའི་སྐབས་ལ་གྱོན་རྒྱུ་ཞིག་ཡིན་པ་ཚོད་དཔགས་བྱས་ན་ཤེས་ནུས།

_____ཞང་ཚུལ་མི། 

ལན། གོང་དུ་རྣམ་པ་ཚོས་བླ་ཆེན་གྱིས་ཀླུ་མེ་ལ་གནང་བའི་བོན་པོའི་འོབ་ཞྭ་ཞེས་པ་དེ་དང་། ད་སྐབས་བན་བོན་ཐུན་མོང་གིས་གསོལ་སྲོལ་ཡོད་པའི་རྩེ་ཞྭ་ཟེར་བ་འདི་གཉིས་གཅིག་མིན་སྐོར་ལ་དགོངས་ཚུལ་ལྷུག་པོར་གནང་བར་སྙིང་དབུས་ནས་བཀའ་དྲིན་ཆེ་ཞུ་བ་ཆབས་ཅིག དེའི་སྐོར་ཕྲན་རང་ཉིད་ཀྱིས་བསམ་ཚུལ་ཕྲན་བུ་ཞིག་ཞུ་བར་འདོད། ཁོ་བོའི་བསམ་ཚུལ་མདོར་བསྡུས་ནས་ཞུས་ན་བླ་ཆེན་པོས་ཀླུ་མེས་ལ་གནང་བའི་འོབ་ཞྭ་ཞེས་པ་དེ་བཅོས་བསྒྱུར་མང་པོ་ཞིག་བྱས་མཐར་ད་ལྟའི་རྩེ་ཞྭ་ཞེས་པ་འདི་ཆགས་པ་ཡིན་པར་ངོས་འཛིན་གྱི་ཡོད།

དང་པོ་བླ་ཆེན་གྱིས་ཀླུ་མེས་ལ་གནང་བའི་བོན་པོའི་འོབ་ཞྭ་ཞེས་པ་དེ་བསྙེན་རྫོགས་པའི་ཞྭ་མོ་པད་ཞུ་ཞེས་གསལ་བ་དེ་རང་ལས་ཞྭ་མོ་གཞན་ཞིག་མཁན་པོས་མཁན་བུ་ལ་གནང་དགོས་དོན་ཕལ་ཆེར་མེད་ལ། ཉང་རལ་ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད་དང་། དཔལ་ཚུལ་ཆོས་བྱུང་ཀུན་གསལ་མེ་ལོང་སོགས་ལས་གྲུ་བཞི་སེར་པོ་བཏབ་པ་ཞིག་གནང་ཞེས་པས། པད་ཞུ་ནི་པད་འདབ་ཀྱིས་སྐོར་ནས་ཡོད་པས་པད་འདབ་ཡོད་སར་དབྱིབས་གྲུ་བཞིའི་རྣམ་པ་ཅན་ཡིན་ལ། འོབ་ཞྭ་དེའི་དབྱིབས་གྲུ་བཞིའི་རྣམ་པ་ཅན་ཞིག་ཡིན་པར་གསལ་བ་དེས་ཞྭ་མོ་དེ་པད་ཞུ་རང་ཡིན་པར་ཚོད་དཔག་བྱེད་ཆོག་པའི་རྒྱུ་མཚན་ཞིག་འདུག་པར་སྙམ། མ་ཟད་ཞྭ་མོ་དེ་ད་ལྟའི་རྩེ་ཞྭ་ཞེས་པ་འདི་རང་ཡིན་ན་འདི་ལ་དབྱིབས་གྲུ་བཞི་ཞེས་པའི་ཐ་སྙད་ལར་ནས་མི་འཇུག་པར་སྨྲོས་ག་ལ་དགོས།

གཉིས་པ་བོན་པོའི་འོབ་ཞྭའམ་པད་ཞུ་དེ་གཉིས་བཅོས་བསྒྱུར་བྱས་མཐར་ད་ལྟའི་རྩེ་ཞྭ་ཞེས་འདི་ཆགས་ཚུལ་ཡང་། གཙོ་བོ་ཆོས་འབྱུང་མཁས་པའི་དགའ་སྟོན་ལས་དེའི་སྐོར་ཅུང་ཟད་གསལ་བ་རྣམས་རྒྱུ་མཚན་དུ་བྱེད་ནས་ཞུ་ན། དེ་ཉིད་ལས་བོན་པོའི་ཞྭ་འོབ་ཞུ་ཕོག་ནས་ས་སེར་བཏབ་པ་གསོལ་འཕྲོ་ཞིག་གནང་ནས་འདི་གོན་ལ་ང་རྗེས་སུ་དྲན་པར་གྱིས་གསུངས་ཏེ་གསོལ་ནས་ཚད་པ་རྒྱབ་བལྟབ་སྟེ་གསོལ་བས་ཞྭ་སྣ་རིངས་སུ་གྲགས་པ་བྱུང་ལ་དབུས་གཙང་མི་བཅུ་ལས་མཆེད་པ་ཕལ་ཆེར་གྱི་ཞྭ་ཡིན་ལ། ཞེས་དང་། ཡང་དེ་ཉིད་ལས། དྭགས་པོ་སྒོམ་ཚུལ་གྱིས་འདིའི་རྒྱབ་བལྟབ་སྟེ་གསོལ་བས་སློབ་དཔོན་སྒོམ་ཚུལ་གྱི་ཞྭ་ཞེས་སྒོམ་ཞྭར་གྲགས་སོ། །ཞེས། རྒྱབ་བལྟབ་སྟེ་གསོལ་བས་སྣ་རིང་དུ་ཆགས་གསུངས་པ་དེ་ལ་བརྟག་ན། སྤྱིར་བལྟབ་ཅེས་པ་ནི་དངོས་རྫས་རིགས་ཁུག་པ་བྱས་པའམ་བཀུག་ནས་གཉིས་གཤིབ་བྱས་པ་ལ་གོ་བ་ཡིན་པས། པད་ཞུའི་གཞི་རྩའི་དབྱིབས་ཟླུམ་པོ་ཡིན་པས་དེ་ཉིད་བལྟབ་པའམ་ཁུག་པ་བྱས་ནས་བཅོས་བསྒྱུར་བྱས་ན་དབྱིབས་སྣ་རིང་ངམ་རྩེ་རིང་དུ་ཆགས་པ་རང་བཞིན་ཡིན་པས། གོང་དུ་རྒྱབ་བལྟབ་ནས་གསོལ་བས་སྣ་རིང་དུ་གྲགས་ཞེས་པ་དང་དོན་མཐུན་པར་སྙམ། མ་ཟད་ད་ལྟའི་རྩེ་ཞྭ་འདི་ཉིད་བཟོ་སྟངས་ནི་ཁུག་པའི་རྣམ་པ་ཅན་ཡིན་ལ་གསོལ་ཚུལ་ཡང་ཁུག་པ་མདུན་དང་ཁུག་པའི་སྣེ་མོ་རྒྱབ་ཕྱོགས་ལ་བྱས་ནས་གསོལ་བའི་སྲོལ་ཡོད་སྟབས། གོང་གི་དྭགས་པོ་སྒོམ་ཚུལ་གྱིས་རྒྱབ་བལྟབ་སྟེ་གསོལ་བས་སློབ་དཔོན་སྒོམ་ཚུལ་གྱི་ཞྭ་ཞེས་སྒོམ་ཞྭར་གྲགས་སོ། ཞེས་པའི་བོན་གྱི་ཞྭ་འོབ་རྒྱབ་བལྟབ་སྟེ་གསོལ་བའི་ཞྭ་མོ་དེ་དང་ད་ལྟའི་རྩེ་ཞྭ་གཉིས་དབྱིབས་དང་གསོལ་ཚུལ་གཉིས་ཆར་ཧ་ཅང་ཐག་ཉེ་བར་སེམས་སོ།། །།

_____སྒང་སྐྱེས།

ལན། དབུས་ཀྱི་ཀླུ་མེ་སོགས་མི་གསུམ་ལ་མུ་ཟིས་སྡོམ་པ་གནང་སྐབས་མཁན་པོ་མི་བརྗེད་པའི་རྟགས་སོགས་བཤད་སྐབས། བུ་སྟོན་ཆོས་འབྱུང་ལས། “དེའི་ཕྱི་ལོ་དེ་ཀླུ་མེས་ཀྱིས་མཁན་པོ་ལ་ཁོ་བོ་དབུས་གཙང་དུ་འགྲོ་བས། མཆོད་གནས་ཤིག་ཞུ་བྱས་པས། བོན་པོའི་ཞྭ་འོབ་ཞུ་ཕོག་ནས། ས་སེར་བཏབ་པ་ཞིག་གསོལ་འཕྲོ་ལ་གནང་སྟེ། འདི་གྱོན་ལ་ང་རྗེས་སུ་དྲན་པར་གྱིས་གསུང་ངོ་། །” ཞེས་སོགས་ཀྱི་སྐབས་ཀྱི་འོབ་ཞུ་ཞེས་པ་དེ་རྩེ་ཞྭ་ལ་གོ་དགོས་སམ། འགའ་རེས་དེ་ནི་རྗེ་བློ་བཟང་གྲགས་པའི་དབུ་ཞྭ་(པཎ་ཞྭའམ་བྱང་ཆུབ་སེམས་ཞྭ)དེ་འདྲ་བོ་ལ་གོ་ཚུལ་ཞིག་འཆད་ཀྱིན་འདུག ད་དུང་རྗེ་གཙང་ཁ་པའི་རྣམ་ཐར་ནང་དུ་ཀླུ་མེ་སོགས་ཀྱི་འདུལ་རྒྱུད་དར་བའི་རྟེན་འབྲེལ་ཆེད་དུ་ཞྭ་སེར་པོ་གསོལ་བར་གསུངས་འདུག་དྲན་སོང་། དེ་བཞིན་ཆོས་འབྱུང་མཁས་པའི་དགའ་སྟོན་ལས། “དེའི་ཕྱི་ལོ་ཀླུ་མེས་ཀྱིས་མཁན་པོ་བླ་ཆེན་པོ་ལ་ཁོ་བོ་དབུས་གཙང་དུ་འགྲོ་བས་རྟེན་སྐལ་ཅིག་ཞུ་བྱས་པས། བོན་པོའི་འོབ་ཞུ་ལ་ས་སེར་བསྐུས་པ་གསོལ་འཕྲོ་ཞིག་གནང་སྟེ། འདི་གོན་ལ་ང་རྗེས་སུ་དྲན་པར་གྱིས་གསུངས། དབུས་སུ་ཚད་པ་ཆེ་བས་ཀླུ་མེས་ཀྱིས་རྒྱབ་ལྟེབ་པ་གསོལ་བས་ཞྭ་སྣེ་རིང་དུ་གྲགས་པ་བྱུང་ལ། དབུས་གཙང་མི་བཅུ་ལས་མཆེད་པ་ཕལ་ཆེར་གྱི་ཞྭ་ཚུགས་དེ་ཡིན། ཕྱིས་བཀའ་གདམས་གཞུང་པ་དང༌། གདམས་ངག་པ་གཉིས་ལའང་འདི་ལས་གྱེས་པའི་ཞྭ་ཚུགས་ཅུང་ཟད་མི་འདྲ་བ་ཡོད་ཅིང༌། དྭགས་པོ་སྒོམ་ཚུལ་གྱིས་འདིའི་རྒྱབ་ལྟེབ་སྟེ་གསོལ་བ་ནས་བཟུང་སྒོམ་ཞྭ་རུ་གྲགས་ཞེས་དཔའ་བོ་གཙུག་ལག་ཕྲེང་བས་བཤད་དོ། །” ཞེས་སོགས་ལ་བརྟག་ན་སྐབས་དེའི་མཁན་པོ་མི་བརྗེད་པའི་རྟགས་ཀྱི་བོན་པོའི་འོབ་ཞྭ་དེ་རྩེ་ཞྭ་དང་འདྲ་བ་ཁྱོན་ནས་རེད་མི་འདུག་སྙམ། དེ་མིན་རྩེ་ཞྭ་འདི་བོན་པོའི་འོབ་ཞྭ་ཡིན་པའི་རང་ལུགས་ལ་ལུང་རིག་གཞན་ཡོད་དམ་ལགས། དེ་དང་ཆབས་ཅིག་ཞྭ་བཤད་པི་ཝང་དྲུག་འགྱུར་ལས། “རྩེ་ཟླུམ་རྩེ་འཁྱོག་རྩེ་གུག་དང་། །ལེབ་མོ་གོར་མོ་པར་བུའི་མགོ། །མཆུ་ཅན་རྔོག་ཅན་ལྟག་འཕྱང་ཅན། །དེ་རྣམས་རབ་ཏུ་སྤོང་བར་བྱ། །”ཞེས་གསུང་པའི་ཞྭ་དེ་ཚོ་ཇི་འདྲ་ཞིག་ཡོད་མེད་བརྟག་དགོས་པར་སྙམ།

_____ཧི་མ་ལ་ཡའི་རྒྱལ་སྲས།