རིགས་གསར་དུས་འགྱུར་སྐབས་སུ་བོན་གྱི་བཀའ་དང་བཀའ་བརྟེན་རྣམས་ཉར་ཚག་ཇི་ལྟར་གནང་བ་ཡིན་ནམ།

རྩོམ་བྲིས་པ། མཁས་དབང་སྟོང་སྐོར་ཚེ་རིང་ཐར། དྲི་བ་གཏོང་མཁན། ཤེས་རབ།

ལན། འདི་འཐད་མཁས་དབང་སྟོང་སྐོར་ཚེ་རིང་ཐར་གྱིིས་བྲིས་པའི་(གཡུང་དྲུང་བོན་གྱི་བཀའ་དང་བཀའ་བརྟེན་ལ་དཔྱད་པ།) ཞེས་པ་ཧི་བོན་དྲ་བ་ལས་བསྡུས་འདྲེན་བྱ་ན།

“ ཁམས་ཕྱོགས་ནས་འཁྲུངས་པའི་གཡུང་དྲུང་བོན་གྱི་གཏེར་གསར་སྟོན་པ་གསང་སྔགས་གླིང་པ་མཆོག་ཧོར་ཚོ་ཆེན་སོ་དགུའི་ཡ་གྱལ་ག་རྒྱ་ཚོ་བར་གདུལ་བྱར་ཕེབས་དུས་སུ། ག་རྒྱ་ཚོ་བས་ལོ་འཁོར་བཅུ་ལྷག་གི་རིང་ལ་བོན་གྱི་བཀའ་འགྱུར་ཚར་གཅིག་བྲིས་བཞེངས་གནངས་ཏེ་ག་རྒྱ་བསྟན་དར་གྱིས་གསང་སྔགས་གླིང་པ་ལ་ཕུལ། ཁོང་ཕྱིར་ཉག་རོང་དུ་ལོག་རྗེས་སུ་བཀའ་འགྱུར་དེ་དབལ་ཁྱུང་དགོན་པར་བཞག རིག་གནས་གསར་བརྗེའི་སྐབས་སུ་དགོན་པ་དེའི་དགེ་འདུན་པ་གཡུང་དྲུང་རྒྱལ་བ་དང་། ཤེས་རབ་དབང་ལྡན། ཀུན་བཟང་རྡོ་རྗེ་གསུམ་གྱིས་སྲོག་གི་ཉེན་ཁ་ལ་མ་འཛེམ་པར་བཀའ་འགྱུར་གྱི་བྲིས་མ་འདི་སྦས་སྐོང་དང་ཉར་ཚགས་གནང་བའི་བཀའ་དྲིན་གྱིས་དེང་སང་ཀུན་གྱི་སྤྱན་ལམ་དུ་འགྲེམ་རྒྱུ་ཡོད་པར་གྱུར། དགེ་འདུན་པ་དེ་གསུམ་གྱི་སྙིང་སྟོབས་དང་མཛད་རྗེས་ལ་བསྔགས་བརྗོད་ཀྱི་མེ་ཏོག་འབུལ་བཞིན་པ་དང་འབུལ་ཡང་འོས་ལ། ལྷག་པར་དུ་ཁོ་རང་ཚོས་བསྐྱབས་པའི་བཀའ་འགྱུར་བྲིས་མ་ཚར་གཅིག་དེ་ནི་བོད་ཁ་བ་ཅན་ཏུ་ལྷག་པའི་བོན་གྱི་བཀའ་འགྱུར་བྲིས་རྒྱུན་གཅིག་པུར་གྱུར་པས། ཁོ་རང་ཚོས་བོན་གྱི་གྲུབ་མཐའ་འབའ་ཞིག་མ་ཡིན་པར་བོད་ཁ་བ་ཅན་གྱི་རིག་གནས་ཀྱི་ལོ་རྒྱུས་སྟེང་མཛད་རྗེས་སྔ་ན་མེད་པ་བཞག་པ་ལ་སྙིང་ཐག་པ་ནས་དང་བ་མི་སྟོན་པ་སུ། དུས་རབས་ཉི་ཤུ་བའི་ལོ་རབས་བརྒྱད་ཅུའི་ནང་དུ། རྒྱལ་ཁབ་སྲིད་གཞུང་གིས་ལོ་བཅུའི་གཏོར་བརླགས་ཆེན་པོ་ལས་ཐར་བའི་རིག་གནས་ཀྱི་དངོས་རྫས་དང་ཡིག་ཆ་རྣམས་ཐོ་རུ་བཀོད་པའི་སྐབས་སུ་དགེ་འདུན་པ་རྣམ་གསུམ་གྱིས་བཀའ་འགྱུར་བྲིས་མ་དེ་ཕྱིར་བཏོན་ནས་དགོན་པར་ཕུལ། དཀར་མཛེས་ཁུལ་དང་ཉག་རོང་རྫོང་སྲིད་གཞུང་གིས་རིན་ཐང་དང་བྲལ་བའི་བཀའ་འགྱུར་བྲིས་མ་དེ་ལ་རྩིས་མཐོང་ཆེན་པོ་བྱས་པ་དང་། ལྷག་པར་དུ་པཎ་ཆེན་རིན་པོ་ཆེ་སྐུ་ཕྲེང་བཅུ་བ་མཆོག་དཀར་མཛེས་ཁུལ་དུ་ཆིབས་བསྒྱུར་གནངས་དུས་འབྲེལ་ཡོད་ཀྱི་ལས་ཁུངས་ཁག་ལ་བཀའ་འགྱུར་བྲིས་མ་དེ་ལ་རྩིས་མཐོང་ཆེན་པོ་བྱེད་དགོས་པར་མ་ཟད་གང་མྱུར་ཅི་མགྱོགས་སྒོས་པར་དུ་སྐྲུན་ཏེ་དཔེ་རྒྱུན་སྤེལ་དགོས་པའི་གསུང་བཤད་ནན་ཏུ་གནངས་པའི་བཀའ་དྲིན་གྱིས། སྐབས་དེར་། དཀར་མཛེས་ཁུལ་སྲིད་གྲོས་ཀྱི་དབུ་འཛིན་གཞོན་པ་ཨ་གཡུང་རིན་པོ་ཆེ་གཡུང་དྲུང་བསྟན་པའི་རྒྱལ་མཚན་མཆོག་གིས་གཙོ་འགན་བཞེས་ཤིང་གཟན་དཀར་རིན་པོ་ཆེ་ཐུབ་བསྟན་ཉི་མ་མཆོག་གིས་ཕྱག་རོགས་བླ་ན་མེད་པ་གནངས་པའི་བཀའ་དྲིན་དང་། སི་ཁྲོན་ཞིང་ཆེན་མི་རིགས་ཞིབ་འཇུག་ཁང་གི་རྒྱབ་སྐྱོར་གང་ལེགས་ཀྱི་མཐུན་རྐྱེན་ཚོགས་པས་གཡུང་དྲུང་བོན་གྱི་བཀའ་འགྱུར་བྲིས་མ་དེ་པར་དུ་བསྐྲུན་པའི་ལས་འགོ་བརྩམས།” ཞེས་པ་ལྟར་ཡིན།