ཞང་ཞུང་ཞེས་པ་གང་ཡིན་ནམ། ཡུལ་དེ་གང་ཞིག་ཏུ་ཡོད། དེའི་རྒྱལ་རབས་ལོ་རྒྱུས་ཇི་ལྟར་ཡིན། 

རྩོམ་བྲིས་པ། རྩོམ་སྒྲིག་པ། དྲི་བ་གཏོང་མཁན། ཤེས་རབ། 

དྲི་བ། ཞང་ཞུང་ཞེས་པ་གང་ཡིན་ནམ། ཡུལ་དེ་གང་ཞིག་ཏུ་ཡོད། དེའི་རྒྱལ་རབས་ལོ་རྒྱུས་ཇི་ལྟར་ཡིན།

ལན། ཞང་ཞུང་ཞེས་པ་ནི། ཡུལ་དེའི་སྐད་དོད་ལྟར་ན་“ཞུང་”ནི་ཁྱུང་དང་།“ཞང་”ནི་ཡུལ་ལ་འཇུག་པས་དེས་ན་“ཁྱུང་ཡུལ་”ཞེས་འབོད་པར་སྣང་། བོན་གྱི་ལོ་རྒྱུས་ལ་གཞིག་ན། ཡུལ་དེ་ལ་ཞང་ཞུང་སྒོ་ཕུག་བར་གསུམ་ཞེས་ཡུལ་ཆེན་གསུམ་དུ་ཕྱེ་སྲོལ་ཡོད་པ་ལྟར། ཞང་ཞུང་ཕུག་པ་རྟག་གཟིགས་འོལ་མོ་ལུང་རིང་སྟེ་སངས་རྒྱས་སྐུ་འཁྲུངས་སའི་ཡུལ་དང་། བར་པ་ནི་དེང་གི་ཆར་ཨ་རབ་པའི་ལུང་པ་འགའ་ཞིག ཞང་ཞུང་སྒོ་པའི་སྡེ་ལ་ཡུལ་ཆེན་བཅོ་བརྒྱད་ཅེས་པ་སྟེ་དེང་སྐབས་རྒྱ་གར་བྱང་ཤར་གྱི་ས་ཁུལ་ཁུ་ནུ་དང་ལ་དྭགས། གར་ཞ། སི་པི་ཊི་དང་། བལ་ཡུལ་གྱི་ས་ཆ་མང་དག་ཅིག་དང་། དེ་བཞིན་བོད་ལྗོངས་མངའ་རིས་ས་ཁུལ་དང་ནག་ཆུ་ས་ཁུལ། ཆབ་མདོ་ས་ཁུལ་སོགས་ལ་ཞང་ཞུང་དངོས་ཀྱི་ཡུལ་ཏེ་སྒོ་པ་ཞེས་འབོད་པར་སྣང་།

རྒྱལ་རབས་ལོ་རྒྱུས་ནི། དུས་རབས་བདུན་པའི་ཡར་སྔོན་ལོ་ངོ་བརྒྱ་ཕྲག་མང་པོའི་རིང་ཞང་ཞུང་གི་ཡུལ་ཁྲི་སྡེ་བཅོ་བརྒྱད་ལ་དབང་སྒྱུར་བའི་རྒྱལ་པོ་བྱ་རུ་ཅན་བཅོ་བརྒྱད་བྱུང་ནས་ཡུལ་ཁམས་རྣམས་ལ་དབང་བསྒྱུར་ཡོད་དེ། སྐྱབས་སྟོན་ཁྲོ་འགྲེལ་ལས། སྤྱིར་ཞང་ཞུང་དང་བོད་གཉིས་དང་པོ་ས་བགོས་ལ། གཙང་ཁ་རག་ཡན་མན་ཡིན་ལ། ལིག་མི་རྐྱ་ཡི་དུས་ཞང་ཞུང་ལ་དམག་སྟོང་སྡེ་དགུ་ཁྲི་དགུ་འབུམ། སུམ་པའི་སྟོང་བུ་ཆུང་ཡང་དེའི་མངའ་རིས། ཞེས་དང་། མར་པ། སྟག་ལོ། གུ་རིབ། ཁྱུང་བྱིད། ཁྱུང་པོ། འུ་སངས། སུམ་པའོ། །ཞེས་སོ། སྦལ་ཏི། རྐང་ཕྲན། ལ་དྭགས། ཟངས་མཁར། གར་ཞྭ། ཉུང་ཏི། སྤི་ཏི། ཁུ་ནུ། ཚང་ས། དྲུག་ཉི། ཉི་ཏི། ཀྱོ་ནམ། ཤ་ཁོག མགར་ཡང་། ཚང་རོ། ཏི་དཀར། སླེ་མི། ཝོམ་གློ། སེ་རིབ། དོལ་པོ། ཀྲུག་སྐྱེས་སོགས། ཀྵོར་མང་ཡུལ་ཡན་གྱི་ལྷོ་རྒྱུད་དང་། རུ་ཐོག་གུ་གེ་སྤུ་ཧྲེང་བསྐོར་གསུམ་དབུས། བཟུང་པའི་ཁ་ཡུག་ཁ་སྐྱོར་ཁ་རག་ཡུལ། ཅི་ཤང་ཅི་ན་གུ་རུབ་ཚོ་བཅུ་དང་། ར་སངས་ནག་གཙང་ཤང་གྱེར་བྱང་རྒྱུད་བཅས། ཡུལ་ཁམས་དྲུག་ཅུ་ཁྲི་སྡེ་བརྒྱད་ཅུའི་ཞིང་། བྱ་རུ་ཐོག་པའི་རྒྱལ་པོ་བཅོ་བརྒྱད་བྱོན། ཞེས་སོ། འོན་ཀྱང་ཁྲི་སྲོང་སྐབས་ནས་ཞང་རྒྱལ་མཐའ་མ་ལིག་མིན་རྐྱ་སྐུ་བཀྲོངས་ནས་ཞང་ཞུང་སྒོ་པའི་ཡུལ་ཁམས་ཕལ་ཆེར་བོད་ཀྱི་དབང་སྒྱུར་འོག་ཏུ་ཚུད། །