བྲུ་ཞུ་སྤ་རྨེའུ་གཤེན་དང་ལྔ། སོགས་ཀྱི་སྐོར་ལ་དྲི་བ།

རྩོམ་བྲིས་པ། དགེ་འོལ་མོ་གླིང་སོགས། དྲི་བ་གཏོང་མཁན། དགེ་དྲང་སྲོང་ཞི་བ།

དྲི་བ། བོན་རང་ལུགས་སུ་བྲུ་ཞུ་སྤ་རྨེའུ་གཤེན་དང་ལྔ། ཞེས་གདུང་རྒྱུད་བཤད་སྐབས་ཁྱུང་གི་གདུང་རྒྱུད་དེ་ལྔ་དང་འབྲེལ་བ་གང་འདྲ་ཡོད་དམ། ཡང་ན་སྡེ་མཚན་ལོགས་ལ་ཡིན་ནམ། 

ལན། བྲུ་ཞུ་སྤ་རྨེའུ་གཤེན་དང་ལྔ་ཀླད་ན་ལྡིང་བའི་ཁྱུང་དང་དྲུག དེ་འདྲ་ཞིག་གོ་མྱོང་འདུག གཞུང་གང་དུ་གསལ་མིན་ཞུ་མ་ཐེག

_____དགེ་འོལ་མོ་གླིང་།

གནས་མཆོག་འོལ་མོ་ལུང་རིང་ན་གདུང་རྒྱུད་ཀྱི་རྒྱལ་པོ་སྡེ་དྲུག་ཡོད་པ་བཞིན་བོད་གངས་ཅན་དུ་ཡང་གདུང་རྒྱུད་དེ་ཚོའི་ཚབ་ལྟ་བུར་དྲུག་དུ་རྩིས་པ་འདྲ་བསམ།

_____དགེ་བདག་མེད་འཇག་སྐྱ།

བོན་ལུགས་སུ་གདུང་རྒྱུད་བཤད་སྟངས་ལས་མཁས་གྲུབ་ལུང་རྟོགས་རྒྱ་མཚོའི་བསྟན་འབྱུང་ལྟར་ན་སྤྲུལ་སྐུ་གཤེན་ཆེན་ཀླུ་དགའི་བཀའ་བབ་ཀྱིས་དབང་དུ་བྱས་ནས། རྒྱལ་ཐེབས་བྲུ་ཞུ་སྤ་རྨེའུ་ཞེས། བྲུ་ཞུ་སྤ་རྨེའུ་བཞི་གཤེན་ཆེན་པོའི་རྒྱལ་ཐེབས་སུ་བརྩི་སྲོལ་དང་། བསྟན་པའི་རྒྱུད་འཛིན་གྱི་དབང་དུ་བྱས་ནས་སྟོད་ན་བྲུ་ཞུ་སྤ་རྨེའུ་གཤེན་དང་ལྔ་། །སྨད་ན་དམ་པ་ཁྱུང་དང་ཞིག་པོ་དགུ་ལ་སོགས་ཞེས། གསུངས་པ་ལྟར་ན། ཁྱུང་གི་གདུང་རྒྱུད་འདི་བྲུ་ཞུ་སྤ་རྨེའུ་ལས་སྡེ་ཚན་ལོགས་སུ་བསྟན་ལ། དེ་བཞིན་ནམ་རྒྱུན་ཡོངས་གྲགས་སུ་གཏེར་སྟོན་གཤེན་གྱེར་རྨ་དབྱིལ། རྒྱུད་འཛིན་བྲུ་ཞུ་སྤ་རྨེའུ་ཞེས་སུ་གྲགས་པ་ལྟར་ནའང་དམ་པ་ཁྱུང་གི་གདུང་རྒྱུད་འདི་བྲུ་ཞུ་སྤ་རྨེའུ་དང་སྡེ་ཚན་མཉམ་སྦྱར་གྱིས་ཆེ་བསྟོད་དེ་ཙམ་མེད་པར་སྣང་།

_____དགེ་བཛྲ་གུ་རུ།

བསྟན་བྱུང་སྐལ་བཟང་མགྲིན་རྒྱན་ལས། “ གཤེན་དང་བྲུ་ཞུ་སྤ་རྨེའུ་ཁྱུང་དྲུག་གི། །གདུང་རབས་བྱུང་ཚུལ་དེར་བྱོན་རྣམ་ཐར་བཅས། །མདོར་བསྡུས་བཀོད་ལས་ཐོག་མར་བོད་ཡུལ་དུ།” ཞེས་དང་། འཇུ་མི་ཕམ་གྱིས་ “བོན་གྱི་བསྟན་འབྱུང་ཁག་ལས། གཤེན་དང་བྲུ་ཞུ་སྤ་རྨེའུ་ཁྱུང་།  ཞེས་ཕྱེས་ཡོད་པ་ནི། རྒྱལ་རིགས་གཤེན། །དཔལ་ལྡན་འབྲུ། །དབང་ལྡན་ཞུ། །གྲུབ་ཐོབ་སྤ། །མཁས་པ་རྨེའུ། །དམ་པ་ཁྱུང་། །” ཞེས་གསུངས་པ་ཙམ་ལས་བོན་གྱི་བསྟན་བྱུང་གང་ཞིག་ཏུ་དེ་ལྟར་གསལ་བར་གསུངས་མེད། ཡོངས་གྲོགས་ཁ་སྐད་དུ། “བྲུ་ཞུ་སྤ་རྨེའུ་གཤེན་དང་ལྔ། །ཀླད་ན་ལྡིང་བའི་ཁྱུང་དང་དྲུག” འདྲ་ཞིག་གསུང་གིན་འདུག དེའི་ཁུངས་གང་ལ་བཏུག་འཚོལ་དགོས་འདུག་དྲན།

_____དགེ་ཧི་མ་ལ་ཡའི་རྒྱལ་སྲས།