བོན་ཤེས་པ་ཅན་བཅུ་གཉིས་གང་དང་གང་ཡིན།

བོད་རྒྱལ་གཉའ་ཁྲི་བཙན་པོའི་རིང་ནས་བོད་དུ་དར་བའི་རྒྱུ་ཡི་བོན། དང་པོ། མགོན་ཤེས་ལྷ་བོན། ལུས་ངག་ཡིད་གསུམ་གྱི་སྒོ་ནས་ཡར་ལྷ་ལ་མཆོད་བསྟོད་དང་། བསང་གསོལ་སོགས་ཀྱི་མཆོད་པ་ཅི་འབྱོར་ཕུལ་བས་ལྷ་དེ་དག་མཉེས་ཤིང་མགུ་ནས་ཚུར་སྡོང་གྲོགས་དང་མགོན་སྐྱབས་བྱེད་པ།

གཉིས། གཡང་ཤེས་ཕྱྭ་བོན། ནོར་ལྷ་སོགས་ལ་མཆོད་པས་མཉེས་ནས་འགྲོ་བ་མི་ལ་ཚེ་བསོད་དང་ཕྱྭ་གཡང་དབང་ཐང་རླུང་དཔལ་ལ་སོགས་སྟེར་བ།

གསུམ། འགྲོ་ཤེས་གླུད་གཏོང་། མི་ཡི་ཚེ་བསོད་དང་སྲོག་ལུས་བཀྲག་མདངས་ལ་རློམ་པའི་གཡེན་རིགས་ལ་ཚབ་དུ་ཡས་གླུད་དང་སྙིང་རྗེའི་མགྲོན་གྱིས་ཚིམས་པར་བྱེད་པ།

བཞི། འདུར་གཤེན་སྲིད་གཤེན། ཚེ་འདས་ཀྱི་ཤི་གཤེད་དང་བླ་ཡིད་སེམས་གསུམ་སོ་སོར་ཕྲལ་བའམ་འདུར་བ་དང་ཚེ་འདས་ལ་གནས་སྐབས་ཀྱི་ཕན་བདེ་སྟེར་བ།

ལྔ། གཙང་ཤེས་སེལ་འདེབས། མནོལ་གྲིབ་འབག་བཙོག་གི་གོས་པའི་རིགས་རྣམས་སྤོས་བསང་ཁྲུས་གསང་རླུང་བསང་སོགས་ཀྱི་སྒོ་ནས་གཙང་མར་སེལ་བ།

དྲུག བགྲོལ་ཤེས་ལྷ་བྱད། གཞན་གྱི་མཐུ་གཏད་བྱས་ཏེ་ས་འོག་ལ་སོགས་ལ་སྦས་པའི་མཐུ་རྫས་ཀྱི་གནོད་པ་འགྲོལ་ཤེས་པ།

བདུན། ཕན་ཤེས་སྨན་དཔྱད། ནད་རིགས་སུམ་བརྒྱ་དྲུག་ཅུ་ལ་སོགས་ཀྱིས་མནར་གདུང་བྱས་པའི་སེམས་ཅན་ལ་གཉེན་པོ་དེ་དང་འཚམས་པའི་སྨན་གྱི་དཔྱད་ཐབས་ལ་བརྟེན་ནས་ཟུག་རྔུའི་ནད་སེལ་བར་བྱེད་པ།

བརྒྱད། སྐོས་ཤེས་རྩིས་མཁན། མ་འོངས་ལྐོག་གྱུར་དུ་ལེགས་ཉེས་ཀྱི་བྱ་བ་ཅི་འབྱུང་གང་ཟག་གི་སྲོག་ལུས་དབང་རླུང་རྣམས་འབྱུང་རྩིས་ལ་གཞིགས་ནས་བཟང་ངན་འབྱེད་པ།

དགུ། སྨྲ་ཤེས་གཏོ་དགུ། ཡར་སྲི་ཞུ་མགྲོན་ལ་མཆོད་བསྟོད་དང་། མར་ངན་སོང་ལ་སྦྱིན་པ་ལ་སོགས་ཀྱིས་ཚིམས་པར་བྱེད་པ།

བཅུ། ལྡིང་ཤེས་ཤ་བ། ཟན་ནམ་ས་འདམ་ལ་སོགས་ལ་ཤ་བའི་གཟུགས་བརྙན་བཟོས་ནས་ཤ་བའི་གཏོ་དགུ་ལ་སོགས་ལ་བརྟེན་ནས་ནམ་མཁར་འཕུར་ཤེས་པ།

བཅུ་གཅིག འཕུར་ཤེས་ཇུ་ཐིག ཕུ་ཝེར་དཀར་པོ་སོགས་མོ་ལྷ་བདར་ནས་ལུག་གི་བལ་སྐུད་མདུད་པ་བབ་ལུགས་ལ་དཔྱད་ནས་ལེགས་ཉེས་སྟོན་པ།

བཅུ་གཉིས། སྒྲོལ་ཤེས་འཕྲུལ་བོན། སངས་རྒྱས་བསྟན་པའི་སྤྱི་དགྲ་དང་། སེམས་ཅན་གྱི་སྒོས་དགྲ་རྣམས་དྲག་པོའི་ལས་སྤྱོད་ཅི་རིགས་ཀྱི་སྒོ་ནས་བསྒྲལ་བ་བཅས་སོ།། །།