བོན་ལུགས་ལ་སྟོན་པ་བཅོམ་ལྡན་འདས་སངས་རྒྱས་དང་འཕགས་པ་སོགས་གང་ཞིག་ཏུ་འདོད།

རྩོམ་བྲིས་པ། རྩོམ་སྒྲིག་པ། དྲི་བ་འདོན་མཁན། མྱི་གངས་དཀར།

ལན། དཔྱོད་ལྡན་མྱི་གངས་དཀར་ལགས། ཁྱེད་ཀྱི་བཀའ་དྲི་དེའི་སྐོར་མཁས་དབང་འགོ་བ་དགེ་བཤེས་བསྟན་འཛིན་འབྲུག་གྲགས་ལགས་ཀྱི་གསུང་རྩོམ་ནས་སྟབས་བདེ་ཞིག་དྲངས་ཡོད་པས་ཁྱེད་ཀྱི་ཐུགས་འདོད་སྐོང་ཐུབ་པའི་རེ་བ་ཡོད། དེའང་དགེ་བཤེས་མཆོག་ནས་འདི་ལྟར་གསུངས་ཡོད། ʼʼ རྩོད་ལྡན་ཚེ་ལོ་བརྒྱ་པའི་དུས་སུ་སྟོན་པ་གཤེན་རབ་མི་བོའི་བསྟན་པ་སྐུ་གསུང་ཐུགས་ཀྱི་བསྟན་པ་རྣམ་གསུམ་ཡོད་པའི་ནང་ནས་མི་རྣམས་ཚེ་ཚད་བརྒྱ་ནས་བདུན་ཅུའི་བར་དུ་གཤེན་རབ་ཀྱི་སྐུའི་བསྟན་པས་འགྲོ་དོན་གཙོ་བོར་མཛད་པ་དང་།  དེ་ནས་མི་རྣམས་ཚེ་ཚད་བདུན་ཅུ་ནས་བཞི་བཅུའི་བར་ལ་གསུང་གི་བསྟན་པས་འགྲོ་དོན་གཙོ་བོར་མཛད་སྐབས་སུ།   ཤ་རིའི་གཏན་ཚིགས་ངེས་པའི་གལ་མདོ་ལས།

“སྟོན་པ་འདས་ཀྱང་བསྟན་པ་མི་ནུབ་ཕྱིར། །ལོག་པ་འདུལ་ཕྱིར་རྒྱལ་བའི་སྲས་བཞི་བཞག” །ཅེས་དང་།  ཡང་། “གཙུག་ལག་བུ་བཞི་གཡུང་དྲུང་བོན་དུ་ངེས།” །ཞེས་སོགས་གསལ་བ་ལྟར་ལོག་པའི་བདུད་ཆེན་སྡེ་བཞི་འདུལ་བའི་གཉེན་པོ་གཙུག་ལག་གི་བུ་བཞི་བྱུང་བའི་ནང་ནས།  བདུད་ཆེན་སྡེ་བཞིའི་ནང་ཚན་བདུད་ང་མིན་ཆོས་པོ་འདུལ་མཁན་ལྷ་བུ་དམ་པ་ཏོག་དཀར་ཞེས་པ་རྒྱ་གར་ཝ་ར་ཎ་སིར་ཤཱཀ་རིགས་རྒྱལ་པོའི་སྲས་སུ་འཁྲུངས་ཏེ་བདུད་ང་མིན་ཆོས་པོས་བོན་ལ་ʼʼའཆོས་པའི་ʼʼལོག་ཆོས་ལ་ཡང་དག་ʼʼཆོས་ʼʼཞེས་བྱ་བ་བསྒྱུར་ཏེ་གཤེན་རབ་ཀྱི་གསུང་གི་བསྟན་པའི་དཀྱིལ་སྨད་ན་དམ་ཆོས་ཀྱི་སྲོལ་ཕྱེས་ན་འགྲོ་དོན་རྒྱ་ཆེ་བ་ལུང་བསྟན་བྱས་པའི་ཚུལ་ནི། རྩ་རྒྱུད་ཉི་ཟེར་སྒྲོན་མ་ལས།  “ང་མིན་ཆོས་པོ་བདུད་ཀྱི་བུ། །ད་ལྟ་བཏུལ་བས་མ་ཐུལ་ན། །ངའི་གསུང་གི་བསྟན་པའི་དུས། །ལྷ་བུ་བམ་པ་ཏོག་དཀར་གྱིས། །ཐུལ་ནས་ཐུགས་རྗེས་འདྲེན་པར་ཤོག” །ཅེས་དང་། མདོ་དྲི་མེད་བསྟན་པ་གཉེར་གཏད་ཀྱི་མདོ་ལས་ཀྱང་།   “ལྷ་བུ་དམ་པ་ཏོག་དཀར་ཁྱེད། །འདི་ནས་འཛམ་གླིང་ལྷོ་ཕྱོགས་ཀྱི། །རྒྱ་གར་ཝ་ར་ཎ་སི་རུ། །རྒྱལ་པོ་ཤཱཀ་གི་སྲས་སུ་འཁྲུངས། །ང་མིན་ཆོས་པས་བསྒྱུར་བ་ཡི། །བོན་ལ་ཆོས་པས་ལོག་བསླུ་ལ།  །ཡང་དག་ཆོས་ཞེས་བྱ་བ་བསྒྱུར།” ཞེས་སོགས་ལུང་གིས་བསྔགས་པ་ལྟར། ཐུབ་པའི་བསྟན་པ་གཤེན་རབ་ཀྱི་གསུང་གི་བསྟན་པའི་དུས་སུ་བྱུང་བར་ངེས་ཀྱང་།  གསུང་བསྟན་མི་ལོ་ཁྲི་གཅིག་གི་ཡུན་ཚད་ནང་ནས་ཐུབ་པའི་བསྟན་པ་དེ་གཤེན་རབ་ཀྱི་གསུང་བསྟན་དཀྱིལ་སྨད་ནས་ཐུགས་བསྟན་གྱི་ཆ་སྟོད་བར་གནས་ཚུལ་རྩ་རྒྱུད་ཉི་སྒྲོན་སོགས་ལས་གསལ་བ་དང་།  བསྒྲགས་བྱང་སོགས་ལས།   “སུམ་ཅུར་གསུང་གིས་འདུལ་ཏེ་ཆོས་སུ་བསྟན། ” །ཞེས་སོགས་ཀྱི་ལུང་དོན་དང་དངོས་པའི་གནས་ཚུལ་རྣམས་དོན་ལ་མཐུན་པར་སེམས།   མདོར་ན་རྩོད་ལྡན་ཚེ་ལོ་བརྒྱ་པར་ཚེ་དམིགས་ཀྱི་ཁྱད་པར་དུ་བྱས་པའི་སྟོན་པ་ནི་གཤེན་རབ་ཁས་ལེན་ལ།  ཤཱཀྱ་ཐུབ་པ་ནི་གསུང་གི་བསྟན་པའི་ཟུར་སྡོང་དུ་འགྲོ་དོན་བྱོན་པར་ཁས་ལེན་བྱེད་པའོ།ʼʼ །ཞེས་པ་ལྟར་གཡུང་དྲུང་བོན་གྱི་ལུགས་སུ་སྟོན་པ་ཟས་གཙང་སྲས་མཆོག་ལ་དད་གུས་ཞུ་སྟངས་འདི་ལྟར་ཡིན་པར་སྙམ་ཞུ།། །།