བོད་རྒྱལ་ཞེ་གཅིག་པ་ཁྲི་རལ་གྱི་ལོ་ཚིགས་སྐོར་ཇི་ལྟར་ཡིན་ནམ།
མཛད་པ་པོ། མཁས་དབང་ཨ་ལགས་བོན་རྒྱ་ཚང་། དྲི་བ་གཏོང་མཁན། བསྟན་རབ།
དྲི་བ། བོད་རྒྱལ་ཞེ་གཅིག་པ་ཁྲི་རལ་གྱི་ལོ་ཚིགས་སྐོར་ཇི་ལྟར་ཡིན་ནམ།
ལན། དེའི་སྐོར་ཁ་གསལ་ཞིག་མཁས་དབང་ཨ་ལགས་བོན་རྒྱ་ཚང་གི་བཀའ་རྩོམ་འགའ་ཞིག་འདིར་བསྡུད་དྲངས་བྱས་ན། “ བོད་རྒྱལ་ཞེ་གཅིག་པ་ཁྲི་རལ་བ་ཅན་གྱི་འཁྲུངས་ལོ་ལ་མི་མཐུན་པ་གསུམ་ཙམ་དུ་འདུག
༡ རང་ལུགས་སྤྱི་ལོ༨༠༦མེ་ཁྱི་ལ་འཁྲུངས་པར་འདོད། འཇམ་དབྱངས་བཞད་པའི་བསྟན་རྩིས་ལུགས་འདིར་མཐུན། འདི་བསྟན་རྩིས་ཀུན་བཏུས་ལས་དྲུག་ཅུ་སྐོར་གཅིག་གིས་སྔ་སོང་ཞེས་བཤད་ཀྱང་སྔ་ཆེས་བའི་རྒྱུ་མཚན་མེད་དེ། ཁྲི་རལ་དགུང་ལོ་བཅུ་དྲུག་གི་ཐོག་རྒྱ་རྗེ་མུ་ཙུང་གོང་མའི་ཁྲིར་བཞུགས་ནས་རྣམ་པ་གཉིས་ཀས་དབོན་ཞང་རྡོ་རིང་བསླངས་པ་སྤྱི་ལོ༨༢༡ཡིན་པས་སོ། །
༢ སྤྱི་ལོ༨༥༥ཤིང་ཕག་ལ་འཁྲུངས་ཞེས་ས་པཎ་བཞེད་ལུགས་སྔ་མ་ལྟར་ན་ཁྲི་རལ་འདས་ནས་ལོ༡༩ཡིན།
༣ སྤྱི་ལོ༨༦༦མེ་ཁྱི་ལ་འཁྲུངས་ཟེར་བ། ས་ཆེན། བུ་སྟོན། དེབ་དམར། བསོད་གྲགས། གསལ་མེ། རྒྱལ་དབང་ལྔ་བ། དུ་ཀཱུ་ལ་དང་བཻ་དཀར། གཙུག་ཕྲེང༌། སུམ་པའི་མ་རྩིས་ཆོས་འབྱུང༌། འཇུ་མི་ཕམ་དང་རྒྱལ་བའི་མཛད་རྣམ་སོགས་ཡིན་པར་བཤད། ལུགས་ཕྱི་མ་འདི་རྒྱ་རྗེ་མུ་ཙུང་སྐབས་དབོན་ཞང་རྡོ་རིང་བསླངས་པ་ལ་འགྲིགས་ཐབས་མེད་དེ། གོང་མ་ཙིན་ཙུང་དང་འུན་ཙུང༌། གི་ཞུང་སོགས་ཁྲིར་བཞུགས་པའི་རྗེས་ཡིན་པས་ལོ་ཚིགས་འགྲིགས་དཀའ།” ཞེས་གསུངས་པ་ལྟར་ཡིན།