བོད་ཡུལ་དུ་གཡུང་དྲུང་བོན་གྱི་བསྟན་པ་སྔ་དར་རྒྱལ་ཐོག་གང་ཞིག་གི་རིང་ཡིན་ནམ།

རྩོམ་བྲིས་པ། སྲིད་པའི་མིག དྲི་བ་གཏོང་མཁན། ཉི་མ།

དྲི་བ། བོད་ཡུལ་དུ་གཡུང་དྲུང་བོན་གྱི་བསྟན་པ་སྔ་དར་རྒྱལ་ཐོག་གང་ཞིག་གི་རིང་ཡིན་ནམ།

ལན། བོན་གྱི་བསྟན་འབྱུང་ལོ་རྒྱུས་རྣམས་སུ་བོད་རྒྱལ་གྲི་གུམ་བཙན་པོའི་ཡན་ཆད་དུ་བོན་གྱི་བསྟན་པ་དར་བར་བཤད་ཅིང་། བོད་ཀྱི་ཆོས་འབྱུང་ལོ་རྒྱུས་ཀྱི་དབང་དུ་བཏང་ནས་བཤད་ན་སྤུར་རྒྱལ་གདུང་རབས་དང་པོ་གཉའ་ཁྲི་བཙན་པོ་ནས་བཟུང་ཏེ་གདུང་རབས་བདུན་པ་གྲི་གུམ་བཙན་པོའི་བར་དུ་བོན་གྱི་བསྟན་པ་དར་བར་བརྗོད། སྐབས་དེར་ལྷག་པར་བོད་རྒྱལ་གཉིས་པ་མུ་ཁྲི་བཙད་པོའི་སྐབས་སུ་(བྱམས་མ་སྐྱོན་གྱི་འཇིགས་སྐྱོབ་ལས།) “རྒྱལ་པོ་མུ་ཁྲི་བཙན་པོ་ཞེས་བྱ་བ། གསང་སྔགས་གསང་བའི་ཐིག་ལེ་མངོན་པར་བཞེས་ནས། གྲུབ་པའི་རྟགས་བསྙེས་པ་དུ་མ་དང་ལྡན་ཞེས་དང་།” ཡང་། “ཞང་ཞུང་ཡུལ་ནས་མཁས་པ་ཆེན་པོ་བརྒྱ་རྩ་གདན་དྲངས། འདུ་གནས་ཆེན་པོ་བཞི་བཅུ་རྩ་ལྔའམ་བཞི་བཅུ་ཙམ་བཙུགས།” ཞེས་དང་། ཡང་(རྒྱལ་རབས་བོན་གྱི་འབྱུང་གནས་ལས) ”སེང་ཁྲི་བཙན་པོའི་དུས་ཡན་ཆད་གནམ་གྱི་ཁྲི་བདུན་གྱི་རིང་ལ། བླ་མ་ཆེ་དྲུག་གི་བོན་དར་ནས་ཕ་ཆེན་བླ་ན་མེད་པའི་བོན་དང་། མ་ཆེན་བླ་ན་མེད་པའི་བོན་དང་། ཐེག་པ་བླ་ན་མེད་པའི་བོན་དང་། སྤྱོད་པ་བླ་ན་མེད་པའི་བོན་དང་། འབྲས་བུ་བླ་ན་མེད་པའི་བོན་དང་། དོན་དམ་བླ་ན་མེད་པའི་བོན་རྣམས་དར་རོ།” སོགས་གསུངས་པ་ལྟར་ཡིན།།