དྭང་རའི་འགྲོ་འདྲེན་བཅུ་གསུམ་གང་དང་གང་ཡིན།

རྩོམ་བྲིས་པ།  གཡུ། ཡང་སྲིད། དྲི་བ་གཏོང་མཁན། འོལ་མོ་གླིང་།

དྲི་བ། དྭང་རའི་འགྲོ་འདྲེན་བཅུ་གསུམ་གང་ཡིན་དང་དཔེ་ཆ་ནང་དུ་འཁོད་ཡོད་མེད་སྐོར་གསུང་རོགས་གནང་།

ལན། འགྲོ་འདྲེན་དང་པོ་གནས་འགྲོ་བ་འདྲེན་པ་ནི། གཡུ་བུན་དགོན་པའི་གཡས་རི་དུང་དཀར་རི་བོ་དང། གཡོན་རི་གཡུང་དྲུང་རི་བོ་དང་བུས་རི་ཤེལ་ཕུག་རི་བོ་བཅས་ཡིན།

འགྲོ་འདྲེན་གཉིས་པ་རྟེན་འགྲོ་བ་འདྲེན་པ་ནི། བླ་ཆེན་དྲན་པའི་སྐུ་རྟེན་གསུང་བྱོན་མ་དེ་ཡིན། རྟེན་མཆོག་དེ་ནི་དྭང་ར་ཤེས་རབ་རིན་ཆེན་གྱིས་གཡུ་བུན་ནས་གཏེར་དུ་བཞེས་པ་དང་རྒྱུ་རིན་པོ་སྣ་ལྔ་ལས་གྲུབ་ཅིང་གསུང་ལན་མང་བྱོན་མྱོང་བའི་གཏེན་གྱི་འགྲོ་བ་འདྲེན་པ་ཡིན།

འགྲོ་འདྲེན་གསུམ་པ་ཆུ་འགྲོ་བ་འདྲེན་པ་ནི། གཡུ་བུན་ནས་ནུབ་ཕྱོགས་སྤྱི་ལེ་གཅིག་ཙམ་གྱི་སར་ཡོད་པའི་འགྲོ་འདྲེན་ཆུ་མིག་ཞེས་པ་དེ་ཡིན།

འགྲོ་འདྲེན་བཞི་པ་རྟེན་སྒམ་འགྲོ་བ་འདྲེན་པ་ནི། ཁྱུང་རྫོང་གི་བྱང་ཕྱོགས་སུ་རྡོ་ཉིད་གཏེར་སྒྲོམ་རང་བྱོན་ཡོད་པ་དེ་ཡིན།

འགྲོ་འདྲེན་ལྔ་པ་འབྲུག་འགྲོ་བ་འདྲེན་པ་ནི། རྡོ་ཉིད་གཏེར་སྒྲོམ་རང་བྱོན་ནས་སྤྱི་ལེ་གཅིག་གི་སར་ཕ་བོང་ལ་འབྲུག་རིས་གསལ་ཞིང་གཏིང་ཟབ་པ་ཁྱད་པར་ཅན་ཞིག་ཡོད་པ་དེ་ཡིན།

འགྲོ་འདྲེན་དྲུག་པ་ཕ་བོང་འགྲོ་བ་འདྲེན་པ་ནི་འབྲུག་འགྲོ་བ་འདྲེན་པའི་བྱང་ཕྱོགས་ཕ་བོང་ངོས་སུ་ཡི་གེ་ཨ་རང་བྱོན་ཡོད་པ་དེ་ཡིན།

འགྲོ་འདྲེན་བདུན་པ་ཤྭ་བ་འགྲོ་བ་འདྲེན་པ་ནི་། ཕ་བོང་འགྲོ་བ་འདྲེན་པའི་བྱང་ཕྱོགས་སུ་བྲག་ལ་ཤྭ་བ་རང་བྱོན་ཡོད་པ་དེ་ཡིན།

འགྲོ་འདྲེན་བརྒྱད་པ་རྡོ་འགྲོ་བ་འདྲེན་པ་ནི། ཤྭ་བ་རང་བྱོན་གྱི་བྱང་ཕྱོགས་སུ་ཨར་མོ་ལི་ཀའི་རྡོ་ལེབ་ལ་མཆོད་རྟེན་ཚུལ་དུ་བང་རིམ་ཡོད་པ་དེ་ཡིན།

འགྲོ་འདྲེན་དགུ་པ་རི་འགྲོ་བ་འདྲེན་པ་ནི། རྡོ་འགྲོ་བ་འདྲེན་པའི་བྱང་ཕྱོགས་སུ་གེ་ཁོད་མགོན་པོ་རྣམ་གསུམ་ཞེས་བྲག་རི་དམར་པོ་གཟུར་གསུམ་ཅན་ཡོད་པ་དེ་ལ་འཁོར་དུ་ཞང་ཞུང་ལྷ་རིགས་ཞེས་པ་ཕ་བོང་དམར་པོ་རྩེ་ཀུན་དཀར་པོ་ཡིན་པ་མང་པོས་བསྐོར་ཡོད་པ་དེ་ཡིན།

འགྲོ་འདྲེན་བཅུ་པ་སྒོ་ལྕགས་འགྲོ་བ་འདྲེན་པ་ནི། རི་འགྲོ་བ་འདྲེན་གྱི་བྱང་ཕྱོགས་སུ་དྭང་རའི་ཕྱོགས་བཞི་ལ་ཡོད་པའི་རྟེན་སྒམ་བཞི་ཡི་སྒོ་ལྕགས་ཡིན་ཟེར་བ་ཕ་བོང་དཀར་པོའི་ངོས་སུ་གཡུ་ཡི་སྒོ་ལྕགས་རིས་འདོད་པ་དེ་ཡིན།

འགྲོ་འདྲེན་བཅུ་གཅིག་པ་རྩྭ་འགྲོ་བ་འདྲེན་པ་ནི། འོམ་བུའི་ཞིང་ཁའི་ནང་སྙ་ལོ་ཞེས་པ་དགུན་དུས་སུ་མི་སྐམ་པའི་རྩྭ་ཁྱད་པར་དེ་ཡིན།

འགྲོ་འདྲེན་བཅུ་གཉིས་པ་མི་འགྲོ་བ་འདྲེན་པ་ནི། འོམ་བུ་གྲོང་ཚོའི་གཡུང་དྲུང་བསམ་གཏན་གླིང་དགོན་གྱི་བླ་མའི་གདུང་རྒྱུད་འགུ་རུ་ཞེས་པ་དེ་ཡིན།

འགྲོ་འདྲེན་བཅུ་གསུམ་པ་ས་འགྲོ་བ་འདྲེན་པ་ནི། འོམ་བུ་གྲོང་ཚོའི་ནུབ་ཏུ་བལྟས་པས་ཐང་ཆེན་པོ་དེར་རི་རྩེ་ནས་དཔྱིད་ཀའི་དུས་སུ་བལྟས་ན་རྩྭ་ཡི་སྐྱེ་སྟངས་ཀྱི་རི་མོ་ཀ་ཁ་སོགས་གསལ་བ་མཐོང་ཟེར་བ་དེ་ཡིན། དེ་ནི་གཏེན་མ་བཅུ་གཉིས་ཀྱི་ནང་ཚན་བྱང་གི་ཀ་ཁ་གསེར་མོ་ཐང་ཞེས་པ་དེ་ཡིན། བྱིན་རླབས་ལྡན་པའི་གཏེན་གྱི་རིགས་བཅུ་གསུམ་དེ་དག་དྭང་རའི་འགྲོ་འདྲེན་བཅུ་གསུམ་ཞེས་ས ཕྱོགས་གང་གསར་རླུང་ལྟར་གྲགས་ཤིང་དྭང་ར་གཡུ་མཚོའི་བྱང་ཤར་གཡུ་བུན་ནས་རིམ་བཞིན་བྱང་ནུབ་ཀ་ཁ་གསེར་མོའི་ཐང་བར་བཞུགས་ཡོད།།