གསང་བ་སྔགས་ཀྱི་ཐེག་པའི་ལུགས་ལ་སྐྱབས་སུ་འགྲོ་ཚུལ་དང་ཇི་ལྟར་འཇུག་དགོས་སམ།

མཛད་པ་པོ། འ་ཞ་འགྲོ་མགོན་བླ་གྲོས་རྒྱལ་མཚན། དྲི་བ་གཏོང་མཁན། ཤེས་རབ།

དྲི་བ། གསང་བ་སྔགས་ཀྱི་ཐེག་པའི་ལུགས་ལ་སྐྱབས་སུ་འགྲོ་ཚུལ་དང་ཇི་ལྟར་འཇུག་དགོས་སམ།
ལན། རྗེ་འགྲོ་བའི་མགོན་པོ་འ་ཞ་བློ་གྲོས་རྒྱལ་མཚན་གྱིས་མཛད་པའི་ (གསང་སྔགས་ལམ་གྱི་འཇུག་ཆོག་མུ་ཏིག་འཕྲེང་བ།) ལས་བསྡུས་འདྲེན་བྱ་ན། “སྐྱབས་སུ་འགྲོ་བ་ལ་དོན་ལྔས་བསྟན་ཏེ། སྐྱབས་སུ་འགྲོ་བའི་ཡུལ་དང༌། རྟེན་དང༌། སྐྱབས་སུ་སོང་མ་སོང་གི་སྐྱོན་ཡོན་དང༌། ལས་ཆོག་བརྗོད་པ་དང༌། བསླབ་བྱ་བསྟན་པའོ།། དང་པོ་ཡུལ་ནི་ཡུལ་མཆོག་རྣམ་པ་བཞི་སྟེ། དེ་ཡང་བླ་མ་བདེར་གཤེགས་དང༌། རྟེན་གསུམ་དང༌། ཕྱོགས་བཅུའི་གཤེན་རབ་རྣམས་ཡིན་ཏེ། འཁོར་བའི་འཇིགས་པ་ལས་སྐྱོབ་ཅིང་ལམ་གྱི་རྟེན་ལ་འཁོད་པའི་ནུས་པ་དང་ལྡན་པ་དེའོ།།
གཉིས་པ་སྐྱབས་སུ་འགྲོ་བའི་རྟེན་ནི། འཁོར་བའི་སྡུག་བསྔལ་ལས་ཐར་བར་འདོད་པའི་རྟེན། གསང་སྔགས་ཀྱི་སྒོར་འཇུག་པ་རང་ཅག་རྣམས་ལགས།
གསུམ་པ་སྐྱོན་ཡོན་ལ། སྐྱབས་སུ་མ་སོང་བའི་སྐྱོན་དང། སོང་བའི་ཡོན་ཏན་གཉིས་སོ།། དང་པོ་ལ་སྤྱི་དང་བྱེ་བྲག་གཉིས་ལས། དང་པོ་ཡུལ་ཁྱད་པར་ཅན་ལ་སྐྱབས་སུ་མ་སོང་ན་འཁོར་བའི་འཇིགས་པ་ལས་སྐྱོབ་པར་མི་ནུས། ཐར་པའི་འབྲས་བུ་བསྒྲུབ་པར་མི་ནུས། ཚུལ་ཁྲིམས་གྱི་སྡོམ་པའི་རྟེན་དུ་མི་འགྱུར། ལམ་གྱི་བར་ཆོད་ཞི་བར་མི་ནུས་ཤིང༌། འཁོར་བའི་གནས་སུ་བརྒྱུད་པར་འགྱུར་བ་ཡིན་ཏེ། སེམས་ལུང་ལས། གཡུང་དྲུང་གནས་བཞིར་སྐྱབས་སུ་མ་སོང་ན། བདུད་དང་མུ་སྟེགས་འཁོར་བའི་བསླུ་ཁྲིད་འབྱུང་། ཞེས་གསུངས་སོ།། གཉིས་པ་བྱེ་བྲག་ལ། དཔོན་གསས་བླ་མ་ལ་སྐྱབས་སུ་མ་སོང་ན། འཁོར་བའི་རྒྱ་མཚོ་ལས་མི་སྒྲོལ། བདེར་གཤེགས་ལ་སྐྱབས་སུ་མ་སོང་ན། བྱིན་རླབས་དང་མཐུ་རྩལ་མི་འབྱུང༌། རྟེན་གསུམ་ལ་སྐྱབས་སུ་མ་སོང་ན། བག་ཆགས་དང་སྒྲིབ་པ་མི་བྱང༌། གཤེན་རབ་ལ་སྐྱབས་སུ་མ་སོང་ན་བར་ཆོད་བགེགས་ཀྱི་དབང་དུ་འགྱུར་བའོ།།
གསུམ་པ་སྐྱབས་སུ་སོང་བའི་ཡོན་ཏན་ལ་ཡང་གཉིས་ལས། དང་པོ་སྤྱིའི་ཡོན་ཏན་ནི། དེའི་ཕྱིར་ཡུལ་ཁྱད་པར་ཅན་ལ་སྐྱབས་སུ་སོང་ན་ཡོན་ཏན་དུ་མ་འབྱུང་སྟེ། འཁོར་བའི་འཇིགས་པ་ལས་སྐྱོབ་ཅིང་ངན་འགྲོར་མི་ལྟུང་བ་དང༌། རྐྱེན་ཕྱི་ནང་གི་བར་དུ་གཅོད་པ་ཞི་བར་ནུས་པ་དང༌། ཚུལ་ཁྲིམས་སྡོམ་པའི་རྟེན་དུ་འགྱུར་བ་དང༌། ལམ་གྱི་རྟེན་དུ་འགྱུར་ཞིང་གཞན་དོན་ཕུན་སུམ་ཚོགས་པ་ནུས་པའི་ཡོན་ཏན་འབྱུང་བའོ།། གཉིས་པ་བྱེ་བྲག་ལ། བླ་མར་སྐྱབས་སུ་སོང་ན། འཁོར་བའི་རྒྱ་མཚོ་ལས་ཐར་པར་སྒྲོལ་བའི་ཡོན་ཏན་འབྱུང༌། དུས་གསུམ་བདེར་གཤེགས་ལ་སྐྱབས་སུ་སོང་ན་བྱིན་རླབས་དང་མཐུ་རྩལ་འབྱུང༌། རྟེན་གསུམ་ལ་སྐྱབས་སུ་སོང་ན། བག་ཆགས་དང་སྒྲིབ་པ་བྱང༌། སེམས་དཔའ་ལ་སྐྱབས་སུ་སོང་ན། བར་ཆོད་བགེགས་ཀྱིས་མི་ཚུགས། གཡུང་དྲུང་གནས་བཞིར་སྐྱབས་སུ་སོང་བ་ན། བསྲུང་བ་དམ་པའི་མཆོག་དུ་དེ་འགྱུར་རོ།། ཞེས་གསུངས་སོ།།
བཞི་པ་ཆོ་ག་ལ་དང་པོ་དམིགས་པའི་ཡུལ་གསལ་བཏབ་སྟེ། དེ་ཡང་རང་གི་མདུན་གྱི་བར་སྣང་ལ་རྩ་བའི་བླ་མ་རྫོགས་སྐུའི་ཆ་ལུགས་ལ། བླ་མ་བརྒྱུད་པ་དང་བཅས་པས་བསྐོར་བ། དེ་ལ་དུས་གསུམ་གྱི་བདེ་བར་གཤེགས་པ་དང་གཡུང་དྲུང་སེམས་དཔའི་ཚོགས་དཔག་ཏུ་མེད་པ་དང༌། བདེ་བར་གཤེགས་པ་རྟེན་གསུམ་དང༌། བོན་སྐྱོང་རྣམས་ཀྱིས་བསྐོར་ནས་བཞུགས་པར་བསམ། དེ་ལ་བདག་དང་སེམས་ཅན་ཐམས་ཅད་ཀྱིས་མོས་པ་དང་གུས་པས་སྐྱབས་སུ་འགྲོ་སྟེ། དེ་ཡང་བླ་མ་དང་བདེར་གཤེགས་མིན་པའི་རེ་ས་མེད་སྙམ་པའི་མོས་པས། བླ་མ་བདེར་གཤེགས་ཀྱི་ཐུགས་རྗེས་བདག་དང་སེམས་ཅན་ཐམས་ཅད། འཁོར་བ་སྡུག་བསྔལ་གྱི་རྒྱ་མཚོ་ལས་སྐྱོབ་ཏུ་གསོལ་སྙམ་པ་དང༌། རྐྱེན་ཕྱི་ནང་གི་བར་ཆོད་ལས་ཀྱང་སྐྱོབ་ཏུ་གསོལ་སྙམ་དུ་བསམ་ལ་ཆོ་ག་བརྗོད་དེ། བདག་དང་འགྲོ་བ་སེམས་ཅན་ཐམས་ཅད་དུས་གསུམ་གྱི་བླ་མ་དང་བདེ་བར་གཤེགས་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ།། ནོར་བུ་ལྟ་བུ་གཙུག་གི་རྒྱན་དུ་དཀོན། མ་རིག་མིག་འབྱེད་སྣང་གསལ་སྒྲོན་མེ་མཆོག། སྐུ་གསུམ་འབྱུང་གནས་དཔོན་གསས་བླ་མ་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོྃ་ཧཱུྃ། ཉིན་སྐར་ལྟ་བུ་ཐུགས་རྗེའི་འབྱུང་གནས་དཀོན། ཐར་ལམ་བདེ་འབྱེད་ས་མཁན་ལམ་པའི་མཆོག འགྲོ་བའི་མགོན་སྐྱབས་དུས་གསུམ་བདེར་གཤེགས་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོྃ་ཧཱུྃ། གཞའ་ཚོན་ལྟ་བུ་སྣང་སྲིད་རྒྱན་དུ་དཀོན། ལྐུགས་པ་ཁ་འབྱེད་གྲོལ་བ་ལྗགས་ཀྱི་མཆོག། བསྟན་པའི་རྒྱལ་མཚན་སྐུ་གདུང་གསུང་རབ་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོྃ་ཧཱུྃ། ། ཨུད་འབར་ལྟ་བུ་དགེ་ལ་འདུན་སྤྱོད་དཀོན། བློ་སྒྲམ་སྒོ་འབྱེད་འཕྲུལ་གྱི་ལྡེ་མིག་མཆོག འགྲོ་བའི་འདྲེན་སྟོན་ཕྱོགས་བཅུའི་གཤེན་རབ་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོྃ་ཧཱུྃ། ཞེས་ལན་གསུམ་དུ་རྗེས་ཟློས་བྱ་སྟེ། བརྗོད་པ་རྣམ་གསུམ་སྡོམ་པ་ཐོབ་པའི་དུས་ཞེས་གསུངས་སོ།།
ལྔ་པ་བསླབ་བྱ་ལ་དེ་ལྟར་བླ་མ་ལ་སྐྱབས་སུ་སོང་ན། སྐྱེ་བོ་དྲེགས་པ་ཅན་ལ་སྨོན་པ་མི་འབུལ། ཞེས་གསུངས་པས་འཇིག་རྟེན་གྱི་སྐྱེ་བོ་བཙན་པ་དང༌། ཕྱུག་པ་དང་ལྡན་པ་ལ་བླ་མའི་སྨོན་པ་མི་བྱ། རང་ཡང་སྨོན་པ་མི་བཏིང༌། བདེ་བར་གཤེགས་པ་ལ་སྐྱབས་སུ་སོང་ན། འཇིག་རྟེན་པའི་ལྷ་ལ་ཕྱག་མི་འཚལ། ཞེས་གསུངས་པས། འཇིག་རྟེན་པའི་ལྷ་ཕྱྭ་དང་དབང་ཕྱུག་ཚངས་པ་དང༌། བདུད་དང༌། དམུ་དང༌། འཚམས་དང༌། བཙན་ལ་སོགས་པ་རྣམས་ལ་སྐྱབས་ཡུལ་དང་ཕྱག་མི་བྱའོ།། བདེ་བར་གཤེགས་པའི་རྟེན་གསུམ་ལ་སྐྱབས་སུ་སོང་ན། ལྷ་སྲིན་རྡོལ་པའི་རྟེན་ལ་རྒྱལ་མཚན་མི་བཙུགས་ཅེས་གསུངས་པས༌། འཇིག་རྟེན་པའི་ལྷ་ཀླུ་དྲེགས་པ་ཅན་གྱི་རྟེན་དང༌། ཕྱི་རོལ་པའི་རྟེན་ལ་ཕྱག་སྐྱབས་ཀྱི་ཡུལ་མི་བྱའོ།། ཕྱོགས་བཅུའི་གཤེན་རབ་ལ་སྐྱབས་སུ་སོང་ན་མུ་སྟེགས་ཅན་དང་མི་འགྲོགས་ཞེས་གསུངས་པས། ལྟ་བ་ལོག་པར་གོལ་བའི་མུ་སྟེགས་བྱེད་དང༌། སྡིག་པ་ཅན་དང་ལོག་ལྟ་ཅན་གྱི་གང་ཟག་ལ་ཕྱག་སྐྱབས་ཀྱི་ཡུལ་མི་བྱའོ།། དེའི་ཕྱིར་དེ་དག་ལས་འདས་ན་སྐྱབས་འགྲོ་ཉམས་པར་འགྱུར་ལ། ཡུལ་གོང་མ་དག་ལ་དུས་དྲུག་གམ་བཞི་འམ་གཉིས་སུ་སྐྱབས་སུ་འགྲོ་ཞིང་མོས་པ་བྱ། དེ་ལྟ་བུའི་སྐྱབས་འགྲོ་བྱེད་པ་དང་བྱས་པ་དང་འདུན་པ་དག་ལ། རྗེས་སུ་ཡི་རངས་བའི་མོས་པ་ཡང་ཡང་བསྐྱེད་པར་བྱ་སྟེ། རྗེས་སུ་ཡི་རངས་དགེ་རྩ་བསམ་མི་ཁྱབ། ཅེས་གསུངས་པས་སོ།།” ཞེས་གསུངས་པས་འདིའི་སྐབས་སྐྱབས་སུ་འགྲོ་ཚུལ་དེ་གསང་སྔགས་ལ་སྦྱར་ནས་གསུངས་འདུག་ཀྱང་སྤྱིར་བོན་སྒོར་ཞུགས་ནས་གཡུང་དྲུང་བོན་ལ་སྐྱབས་སུ་འགྲོ་ཚུལ་ཡང་འདི་ལས་མ་འདས་སོ། །