གཡུང་དྲུང་བོན་སྒོར་ཞུགས་པའི་མི་སྐྱ་ཕོ་མོ་རྣམས་ཀྱིས་བོན་སྤྱོད་ཚུལ་གྱི་རྩ་བའི་འགན་འཁྲི།

རྩོམ་བྲིས་པ།  དགེ་བཤེས་ལུང་རྟོགས་བསྟན་འཛིན་རྣམ་རྒྱལ།

འཁོར་བའི་སེམས་ཅན་ཐམས་ཅད་ཐུགས་རྗེས་ཐར་པར་འདྲེན་པའི་དཔལ།   གཤེན་རབ་སྟོན་པའི་མཆོག་ལ་ཕྱག་འཚལ་ལོ།།

འོ་ལགས་སོ།  ངས་ཐོག་མར《གཤེན་བསྟན་གླེང་སའི》འཕྲིན་སྟེགས་སུ་བཞུགས་གནང་བའི་བླ་སྤྲུལ་དགེ་བའི་གཤེས་གཉེན་རྣམས་དང་དེ་བཞིན་ས་སྒང་རིལ་མོའི་ཤར་ནུབ་གང་སར་འཁྲས་བཅས་པའི་ལས་དང་སྨོན་ལམ། ཁམས་དང་མོས་པ། རིགས་དང་སློབ་གསོ་གཅིག་ཏུ་གྱུར་པའི་འབྲེལ་ཡོད་མི་སྣ་ཡོངས་ལ་སྔ་དགོང་དུས་གསུམ་དུ་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག ཁྱེད་རྣམ་པ་དང་མཉམ་དུ་འདི་ལྟ་བུ་སོ་སོའི་བསམ་ཚུལ་ལྷུག་པོར་སྙན་སྒྲོན་ཞུ་རྒྱུའི་སྐལ་བཟང་བྱུང་བ་ལ་སྙིང་ཐག་པ་ནས་བཀའ་དྲིན་ལན་བརྒྱར་ཆེ་ཞེས་ཞུས་དང་ཞུ་བཞིན་པ་ཡིན། དེ་ཡང་ངོས་ནས་ཆེས་མཐོའི་ཚོགས་པ་འདི་འདྲ་ལ་གྲོས་འགོ་འདོན་པར་རྔོ་ཐོགས་པའི་རེ་བ་མེད་པ་ཀུན་གྱིས་མཁྱེན་གསལ་ལགས་མོད། འོན་ཏེ་རིག་པའི་གནས་ལ་སྤྱན་དཀྱུས་མཁའ་ལྟར་ཡངས་ཤིང་བསྟན་པ་སྤྱི་ལ་ལྷག་བསམ་གཡས་འཁྱིལ་མདངས་ལ་འགྲན་པའི་༧དཔལ་རྒྱལ་བ་སྨན་རི་བའི་དགེ་བའི་བཤེས་གཉེན་ཆེན་མོ། འཕྲིན་ལམ་འདིའི་གཙོ་གཟིགས་པ་གཤེན་ཚེ་ཚང་འོད་ཟེར་རྒྱལ་མཚན་རིན་པོ་ཆེ་མཆོག་ནས་གུས་པར་བརྗོད་གཞི་འདི་ལྟ་བུའི་གཏམ་བཤད་དགོས་པའི་བཀའ་ཆབ་བདུད་རྩིའི་ཟེགས་མ་སྤྱི་བོར་བསྩལ་བར་ཆུད་ཟོས་གཏོང་བར་མ་ཕོད་ནས་ཅི་ཤེས་གང་དྲན་ཞིག་ཐལ་བ་ལ་བླང་དོར་ཇི་དགོས་ཁྱེད་རྣམ་པ་ནས་གཟིགས་སྐྱོང་ཡོང་བར་མཁྱེན།

དེ་ལ་སྤྱིར་དེང་སྐབས་འཛམ་བུ་གླིང་འདིར་མི་གྲངས་དུང་ཕྱུར་བདུན་ཅུ་ལྷག་ཙམ་ཡོད་སྐད་ལས་གཡུང་དྲུང་བོན་གྱི་བསྟན་པ་རིན་པོ་ཆེ་ལ་དད་པའི་མི་གྲངས་ནི་ལྟོས་བཅས་ཀྱིས་ཤིན་ཏུ་ཉུང་ཉུང་ཡིན་པར་མ་ཟད།  དེ་དག་ལས་བོན་གྱི་བསྟན་པའི་ཡིན་ལུགས་ཇི་བཞིན་དགོངས་མཁན་ཉུང་ཤས་ལས་ཕལ་ཆེར་སྲོལ་རྒྱུན་ནམ་ཁོར་ཡུག་སློབ་གསོ་སོགས་ཀྱི་དབང་གིས་བསྟན་པ་ལ་དད་མོས་ཆེ་ཙམ་ཡོད་པ་ནི་རྣམ་འདྲེན་རྒྱལ་བ་གཤེན་གྱི་ཐུགས་རྗེའི་བྱིན་མཐུ་སྟེ་བོད་ཆོས་ལྡན་ཞིང་དུ་སྐྱེས་པའི་བསོད་ནམས་ཀྱི་བགོ་སྐལ་བཟང་པོ་ཞིག་ཡིན་པ་སྨོས་མེད་ལ། རྩ་བའི་བོན་གྱི་ལོ་རྒྱུས་སྤྱི་དང་། བསྟན་པ་འཕེལ་འགྲིབ་ཀྱི་གཉན་འཕྲང་།  དུས་རབས་ཀྱི་འགྲོས་དང་བསྟུན་པའི་ཉམས་ལེན་བྱེད་ཐབས། ཆོས་ལུགས་གཞན་དང་མཉམ་དུ་དཔུང་པ་མཉམ་བཤིབས་ཀྱིས་མི་རིགས་དང་སྤྱི་ཚོགས་ཡོངས་ལ་འཆམ་མཐུན་མཉམ་གནས་ཀྱིས་ཕན་ནུས་འདོན་ཐབས།  བསྟན་པའི་སྙིང་པོ་རང་གི་རྒྱུད་ལ་སྦྱར་ཐབས་སོགས་ལ་བྱང་ཚད་ཇི་ཙམ་ཡོད་མེད་ནི་ཕྲན་རང་སོམ་ཉི་ཙམ་དུ་གནས་མོད། ཕྱོགས་གཞན་ཞིག་ནས་བསམ་ན་ཕྱི་ནང་གྲུབ་མཐའ་ཀུན་གྱི་རྒྱལ་པོ་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེ་འདི་བཞིན་མར་འགྲིབ་བསྐལ་ངན་འདི་ལྟ་བུ་ལ་ཡང་དར་ཞིང་རྒྱས་པ་ནི་སྤྱི་མཐུན་བསོད་ནམས་ཀྱི་ལས་འཕྲོ་མ་ཟད་ཅིང་།  སྔོན་གཤེགས་གོང་མ་རྣམས་ཀྱི་ཐུགས་བསྐྱེད་སྨོན་ལམ་དང་དཀའ་སྡུག་ཁྲི་ཕྲག་དུ་མའི་འཕྲང་ལམ་བརྟོལ་ཏེ་ང་ཚོས་སྤྱོད་ཆོག་ཆོག་ཏུ་ཕ་ནོར་བུ་ལ་སྤྲད་པ་བཞིན་ཡོད་པ་འདི་ནི་འུ་ཚོས་ནམ་ཡང་རྗེས་དྲན་ཞུ་འོས་པ་དང་དགོས་པ་ཞིག་ཀྱང་ཡིན།  སྤྱིར་ན་ཆོས་ལུགས་སུ་དང་གང་ཞིག་ལ་དད་པ་ཡོད་མེད་ནི་རང་དབང་ཡིན་པ་ལས་བཙན་གྱིས་བཀས་བཀོད་ཀྱིས་དབང་བསྒྱུར་མི་རིགས་མོད།  རང་ཉིད་ནས་བསྟན་པ་རྣམ་དག་ཞིག་དང་འཕྲད་ཐབས་སམ་འཕྲད་ཚེ་དེ་ཉིད་ཀྱི་ཡིན་ལུགས་ཚུལ་བཞིན་ཤེས་རྒྱུ་དང་མ་འོངས་མི་རབས་རྗེས་མར་རྩིས་སྤྲད་ཐུབ་པ་ཞིག་དགོས་པ་ནི་ལྕི་ཡང་མེད་པར་ཀུན་གྱི་ཕྲག་ཏུ་བབ་པའི་འོས་འགན་དང་ལྷག་པར་གཞོན་སྐྱེས་རྣམས་ནས་དེ་བས་ཤེས་དགོས་པའི་གནད་དོན་ཉག་གཅིག་དེ་ཡིན།

འདས་པའི་ལོ་རྒྱུས་ལ་ཕྱི་མིག་ཅིག་བྱས་ན་སྤྱི་ལོའི་དུས་རབས་བདུན་པའི་ཡར་སྔོན་དུ་བོད་ཡོངས་ཀྱི་མི་ཕལ་ཆེ་བ་གཡུང་དྲུང་བོན་ལ་སྤྱོད་མཁན་ཡིན་ཚོད་ནས་ད་ལྟའི་ཆར་འདི་འདྲའི་གྲངས་ཉུང་གི་གྲངས་ཉུང་དུ་གྱུར་འདུག་པ་འདི་ལ་བསམ་ན། སྤྱིར་ནི་བསྐལ་པ་མར་འགྲིབ་དང་དགོས་སུ་ཆོས་སྲིད་གཞན་གྱིས་དངོས་ཤུགས་རྒྱུད་གསུམ་གྱིས་དབང་བསྒྱུར་ལས་བྱུང་བ་ཡིན་མོད།  དེ་གཅིག་པུར་ཁག་དཀྲི་རྒྱུ་མ་ཡིན་པར་འགལ་རྐྱེན་གཞན་ཞིག་ནི་བོན་པོ་རང་ངོས་ནས་ཀྱང་ཡོད་པར་དོགས་ཏེ། དམ་པའི་སྐྱེས་མཆོག་མང་པོ་ཞིག་ནི་གཡའ་རི་གངས་བྲག་སོགས་སུ་ཚེ་དང་སྒྲུབ་པ་མཉམ་བསྐྱལ་གྱིས་གྲུབ་པའི་གོ་འཕང་མངོན་དུ་གཤེགས། གཞན་ཤེས་ལྡན་རིག་གནས་པ་འགའ་ཞིག་བྱུང་བ་དག་གིས་བསྟན་པ་གང་ལ་གང་འཚམ་ཞིག་བསྐྱངས་ཡོད་པ་ཕུད། བྱིངས་རྣམས་བཅའ་འབྲི་འདོན་ཚོགས་སམ། དབང་ཞུ་ཁྲུས་གསོལ། བར་ཆད་རྐྱེན་སེལ། སྐོར་ཕྱག་གསོལ་སྨོན་ཁ་འདོན་སོགས་ཤུགས་ཆེ་ཙམ་ལས་རང་བསྟན་རྣལ་མའི་ངོ་བོ་གང་ཡིན་དང་། རྩ་བའི་ལུང་རྟོགས་ཀྱི་བོན་རིན་པོ་ཆེ་མ་ཉམས་གོང་འཕེལ་དང་ཉམས་པ་སོར་ཆུད་ཀྱི་འཛིན་སྐྱོང་བྱེད་པའི་ཐབས་ལམ་སྟེ་ཚད་ལྡན་ཐོས་བསམ་གྱིས་དྲངས་པའི་ངེས་ཤེས་རང་རྐྱ་ཕེར་བའི་བག་ཆགས་བརྟན་པོ་ཞིག་འཇོག་ཐུབ་པའི་ལུགས་སམ་གོམས་གཤིས་དེ་ཙམ་མ་བྱུང་བས་ལན་པ་མིན་འགྲོ་སྙམ། དེས་ན་ང་ཚོས་སྔོན་གྱི་ལོ་རྒྱུས་ལས་ཉམས་མྱོང་ཕྱོགས་བསྡོམས་དང་། ད་ལྟའི་དུས་རབས་ཀྱི་འགྱུར་འགྲོས། མ་འོངས་བསྟན་འགྲོའི་མདུན་ལམ་སོགས་ལ་རྟོག་དཔྱོད་མི་བྱེད་ཀ་མེད་རེད་འདུག་ཅིང་། དེ་ཡང་སྐྱ་སེར་དང་དྲག་ཞན་མེད་པར་མི་རེ་ངོ་རེའི་འགན་འཁྲི་དང་ནུས་ཤུགས་འདོན་སྤེལ་གྱིས་བོན་པོས་བོན་ལ་ཚུལ་བཞིན་སྤྱོད་དགོས།

དེ་ཡང་ང་ཚོ་ཚང་མས་རྩིས་པོ་ཆེ་བྱེད་རྒྱུ་སངས་རྒྱས་གཡུང་བོན་ཞེས་སྲས་བཅས་རྒྱལ་བའི་བཀའ་ལུང་དང་དེའི་བརྗོད་བྱ་རྟོགས་པའི་བསྟན་པ་གཉིས་ཡིན་པ་ལྟར་དེ་དག་གཙོ་བོའི་འཛིན་སྐྱོང་གནང་མཁན་བླ་སྤྲུལ་དགེ་བའི་བཤེས་གཉེན་དང་རབ་བྱུང་ཕོ་མོའི་སྡེ་རྣམས་ཡིན་པ་སྨོས་མེད་ཐོག གོང་གི་བསྟན་བདག་རྣམ་པས་ཀྱང་ཁྱིམ་པ་ཕལ་རྣམས་རྒྱུན་ལྡན་མཐོང་ཆུང་ངམ་ལྷོད་གཡེང་ལྟ་བུས་དབང་སྐུར་ཁྲུས་གསོལ། མཆོད་འབུལ་ཚོགས་བསགས། ཕྱག་སྐོར་ཁ་འདོན་ཙམ་བྱུང་ན་ཆོག་རབས་གསུངས་པ་ལས་འདི་དག་ལ་གལ་ཆེའི་གནད་རྣམས་བཤད་ཀྱང་ཅི་ཡང་མི་ཤེས་སྙམ་སྟེ་བཏང་སྙོམས་སུ་ལུས་པའམ། མི་སྐྱ་ཕོ་མོ་རང་ངོས་ནས་ཀྱང་ང་ཚོས་ཅི་ཡང་མི་ཤེས་གང་ཡང་མི་ཐུབ་སྙམ་པའི་སྒྱིད་ལུག་གི་བསམ་པ་ཐབས་རྡུག་དེ་དག་དོར་ཅི་ཐུབ་བྱས་ཏེ། ང་ཚོས་དེ་དག་བསླབས་ན་ཤེས་ཀྱང་དཀའ་ལ་དེ་སྔོན་ལུགས་སྲོལ་དེ་འདྲ་མེད་ཀྱང་མི་འགྲིགས་པ་ཅི་ཡང་བྱུང་མི་འདུག་སྙམ་པ་སོགས་སྲོལ་ངན་དང་རྗེས་ལུས་ཀྱི་བསམ་བློ་བསྒྱུར་བཅོས་བྱས་ཏེ་ད་ལན་སྐྱེ་དཀའ་བ་འཛམ་གླིང་དབུས་སུ་སྐྱེ་བ་སོགས་དཀའ་བ་བཞི་ལྡན་གྱི་མི་ལུས་རིན་པོ་ཆེ་འདི་ལྟ་བུ་ཞིག་ནི་རྙེད། དེའི་སྟེང་ཁ་བཟེ་མིག་གྲུང་། སྨྲ་ཤེས་དོན་གོ རང་དབང་རང་ལ་ཡོད་པའི་མི་ལུས་མཚན་ཉིད་ཚང་བ་འདི། དོན་མེད་དལ་འབྱོར་སྟོང་ལོག་མ་ཡིན་པར་ཅིས་ཀྱང་མི་ཚེའི་རིན་ཐང་ཡོད་པ་ཞིག་བྱེད་སྙམ་པའི་སེམས་ཤུགས་དང་དམ་བཅའ་བྱེད། དེ་བཞིན་བྱ་བའི་འཇུག་རིམ་ཡང་། མ་རྟོགས་སེམས་ཅན་ཚིག་གིས་མ་ཁྲིད་ན། །མུན་པའི་མཛུབ་གཡུགས་དེས་ནི་བརྡ་མི་འཕྲོད། །ཅེས་པ་ལྟར་བོན་གང་ཞིག་སྤྱོད་ཀྱང་ཐོག་མཐའ་ཀུན་ཏུ་འཆད་ཉན་ཡང་དག་པས་ཟིན་པ་ཞིག་བྱེད་དགོས། དེ་ནི་བསྟན་པའི་གསལ་བྱེད་འཆད་ཉན་ཡིན།། ཞེས་དང་།  འཆད་ཉན་མེད་པས་གོ་བ་མེད།  །གོ་བ་མེད་པས་སྒྲུབ་པ་མེད།  །སྒྲུབ་པ་མེད་པས་བྱང་ཆུབ་ཐོབ་པ་ག་ལ་འགྱུར།  །དཔེར་ན་ཏ་ལའི་མགོ་བཅད་འདྲ། །ཞེས་དང་། བསླབས་ན་མི་ཤེས་གང་ཡང་མེད།  །མ་བསླབས་ཤེས་པ་གཅིག་ཀྱང་མེད། །ཅེས་གསུངས་པ་ལྟར་ཡིན། སྤྱིར་རྒྱུན་ལྡན་ཞིང་འབྲོག་ཞོར་གསུམ་གྱི་ལས་སྒོ་ཡོད་པའི་ཁྱིམ་པ་ཞིག་ཡིན་ཡང་ནམ་ཟླ་དུས་བཞིའི་དལ་ཁོམ་དང་སྟབས་བསྟུན། རང་གི་བློ་རིག་ལ་དཔག་པའི་ལོ་ལྟར་ཟླ་བ་རེ་གཉིས་སམ་ཐ་ན་བདུན་ཕྲག་ཁ་ཤས་རིང་ཤེས་བྱའི་གཞི་མ་ཡི་གེ་འབྲི་ཀློག་ནས་སུམ་རྟགས་དག་གསུམ་སོགས་ཀྱི་རྨང་གཞིའི་ཐོག བསྟན་པ་སྤྱི་ཡི་ཡིན་ལུགས་དང་། དུས་དང་སྤྱི་ཚོགས་ཀྱི་འགྲོ་སྟངས། ཆོས་ལུགས་སོ་སོའི་བར་མཐུན་སྒྲིལ་དང་རྒྱུས་ལོན།  ཐབས་སམ་ལེགས་ཆ་བསྡུ་ལེན། རྩ་བའི་རང་བསྟན་རང་གིས་སྐྱོང་དགོས་པའི་འགན་འཁྲི། སྐད་ཡིག་ཡུལ་སྲོལ་གཙང་མའི་དགོས་ཆེད། ཡ་རབས་རང་ཚུགས་འཛིན་པའི་སྲོལ་བཟང་། བསྟན་པ་རང་གི་རྒྱུད་ཐོག་ཏུ་སྦྱར་ལུགས་སོགས་ཀྱི་སློབ་སྦྱོང་རེ་དང་། དེ་ནས་རིམ་པས་བྱུང་ན་སྔོན་འགྲོ་དངོས་གཞི་སོགས་ཀྱིས་མཚོན་རང་དང་འབྲེལ་ཡོད་བླ་མའམ་དགོན་པ་སོགས་ནས་བསླབ་རྒྱུ་ནི་བོན་འབངས་རྣམས་ཀྱི་རྩ་བའི་འགན་འཁྲི་ཟེར་ནའང་འདྲ།   བོན་པོས་བོན་ལ་སྤྱོད་པའི་ཚུལ་མ་ནོར་བ་དེ་ཀ་ཡིན། དེ་བཞིན་འབྲེལ་ཡོད་བླ་དགོན་དག་གིས་ཀྱང་རང་དང་ལྟོས་བཅས་ཀྱི་མང་ཚོགས་རྣམ་པའི་སྐབས་བབ་རེ་འདོད་སྐོང་ཐོག་གཙོ་བོ་རང་བསྟན་གྱི་ངོ་བོའི་ཡིན་ལུགས་དང་། སྟོན་པ་བཀའ་དྲིན་ཅན་གྱི་མཛད་རྣམ།  དེ་ཉིད་འཁྲུངས་འདས་ཀྱི་དུས་མཆོད་དང་།  སྐུ་ཡི་ཆ་ལུགས་སོགས་རྩ་བའི་ཤེས་བྱ་ཁག་ནས།  བསྟན་པའི་སྒོར་འཇུག་པའི་རིམ་པ། དབང་ལུང་ཁྲིད་གསུམ་གྱི་དགོས་པ་དང་རྒྱུ་མཚན། དེ་དག་གི་བརྒྱུད་རིམ་དང་ལག་ཏུ་ལེན་ཐབས།  མཐའ་གཉིས་སུ་མ་ལྷུང་བའི་ཡུལ་དུས་དང་འཚམས་པའི་སྤྱི་ཚོགས་ཀྱི་སློབ་གསོ་སོགས་གཙོ་བོར་བཟུང་སྟེ། དགོན་སྡེ་ནི་སློབ་གསོའི་ཁོར་ཡུག་ཅིག་དང་། བླ་མ་དགེ་བཤེས་རྣམས་ནི་སློབ་གྲྭའི་དགེ་རྒན། དད་ལྡན་མང་ཚོགས་རྣམས་ནི་སློབ་ཕྲུག་གི་ཚུལ་ལྟ་བུ་ཞིག་ཆགས་ཐབས་ལ་འབད་དགོས། གཞན་སྤྱི་རིམ་དང་། རི་བསྟོད། ཁྲོམ་དབང་། དུང་སྒྲུབ། སྒྲུབ་ཆེན་སོགས་ཐ་ན་མི་གཉིས་འཕྲད་པ་ཡན་གྱིས་མང་ཚོགས་རྣམས་ལ་ཅི་ཤེས་གང་ཕན་གྱི་བཀའ་སློབ་རེ་གནང་དགོས།

དེ་ལས་ལྡོག་སྟེ་མི་སྐྱ་ཕོ་མོ་རྣམས་ནི་རྩ་བའི་ཡིག་རྨོངས་སམ་ཡི་གེ་ཙམ་ཤེས་ཀྱང་བོན་ཚུལ་བཞིན་བཤད་ཀྱང་གོ་ཐབས་དཀའ་ལ། ཁོ་རང་ཚོ་ཡང་དུས་རྒྱུན་འཁོར་བའི་ལས་གྱིས་བྲེལ་བས་དལ་ཁོམ་མེད་པའི་ཁར། བསླབ་པ་ཚུལ་བཞིན་སྦྱོང་འདོད་ཀྱི་མོས་པ་ཡང་མི་འདུག་པས་ནམ་ཞིག་དེ་ལྟར་འགྲུབ་པའི་གསོལ་འདེབས་སྨོན་ལམ་ཙམ་དང་གནས་སྐབས་མོས་ངོ་མ་བཅག་པ་ལྟ་བུ་འདོན་བསྐུལ་འདྲ་ལེན། འབྱོར་ཚོགས་བྱུང་རིགས་རྟེན་བཞེངས་དང་ཚོགས་འཁོར་འདྲ་མཛད། དད་ལྡན་རྣམས་ལ་དབང་བསྐུར་བྱང་བཞུ་འདྲ་གནང་། མང་ཚོགས་ངོས་ནས་ཀྱང་དེ་དག་གིས་སེམས་མགུ་ཐག་ཆོད་ནས་གནའ་ནས་བོན་སྤྱོད་ཚུལ་འདི་ལས་གཞན་མེད། འདི་ལས་གཞན་པ་ཤེས་ཀྱང་མི་ཤེས་ལ་དགོས་ཀྱང་མི་དགོས་སོགས་རང་སེམས་རང་གིས་གསོས་སྟེ་མི་ཚེ་ཕུལ་ན་ཡུལ་དུས་གང་ལ་གཞིགས་ཀྱང་འཚམས་པོ་དེ་ཙམ་ཞིག་ཨེ་ཡིན་ནམ་སྙམ་པས་ཞིབ་ཏུ་བརྟག་པར་འཚལ་ལོ།། དེ་ལྟར་ཞུས་པ་རྣམས་ནི་རྩ་བའི་བོན་པོས་བོན་སྤྱོད་སྟངས་སམ་དད་ལྡན་བོན་འབངས་ཤིག་གི་འགན་འཁྲིའི་སྐོར་མི་སྒེར་གྱི་བསམ་ཚུལ་མདོ་ཙམ་ཞུས་པའི་ཁུལ་ལགས་མོད་དེ་ལ་ཡུལ་དུས་རང་བཞིན་གང་གི་ཆ་ནས་དགེ་སྐྱོན་གཉིས་ཀ་ཡོད་སྲིད་པས་དེ་ལུགས་གསན་གཟིགས་པ་རྣམས་ནས་སྙིགས་དོར་བཅུད་ལེན་མཛད་རྒྱུ་མ་བསྙེལ་བར་གནང་བའི་རེ་བ་རྩེ་གཅིག་ཏུ་ཆེའོ།།

ཚང་མ་བཀྲ་ཤིས་བདེ་ལེགས། བཀའ་དྲིན་ཆེ།།