གཡུང་དྲུང་བོན་ཆོས་དང་སྐྱེ་ཁམས་མི་ཆོས་སྐོར་གླེང་པ།

རྩོམ་བྲིས་པ།  ནོར་བུ་ཚེ་རིང་།

རྩོམ་འདི་སེང་རྡོར་དྲ་བའི་(འབྲོག་སའི་རྩྭ)་ཟིན་བྲིས་ལས་དྲངས། རྩོམ་ངོ་མ་གཟིགས་འདོད་ཡོད་ཚེ་འདིར་གནོན་ནས་ཕེབས།

༼ང་ཚོར་དབང་པའི་བདེ་བ་ནི་ཀླུས་སྦྱིན་པ་ཡིན། སྡུག་བསྔལ་ཐམས་ཅད་ཡང་ཀླུའི་ཆད་པ་ཡིན།ཡིན་ཡང་ཀླུ་ནི་ཞེ་སྡང་འཛིན་པའི་རང་བཞིན་ཅན་ནི་མིན་ཏེ། གལ་ཏེ་མིས་རང་བྱུང་ཁམས་ཆེན་པོ་ལ་བརྩི་སྲུང་བྱས་ན། ཀླུས་མི་ལ་གནོད་སྐྱོན་སྦྱིན་མི་སྲིད། གལ་ཏེ་མིས་རང་འདོད་ཀྱིས་རང་བྱུང་ཁམས་ལ་གཏོར་བཤིག་བཏང་ན། ཀླུས་མྱུར་དུ་ཆད་པ་གཅོད་ཁོ་ཐག་ཡིན།༽ <ས་བདག་ཀླུ་གཉན་གཏོད་འབུམ> ལས།

བོད་མིི་རིགས་གྱིས་རང་བྱུང་ཁམས་ལ་གུས་ཞབས་དང་དྲིན་ཞུའི་འདུ་ཤེས་ནི་གནའ་སྔ་མོ་ནས་ཆགས་འདུག    དེ་ཡང་བོན་ཆོས་གཡུང་དྲུང་བོན་གྱི་དགོངས་པ་ལས་འཕྲོས་པའི་མི་དང་རང་བྱུང་ཁམས་བར་གྱི་འཆམ་མཐུན་གྱི་བསམ་བློ།འཇིག་རྟེན་སེམས་ཅན་ཐམས་ཅད་གཅིག་བརྟེན་གཅིག་འཚོ་དང་ཡོངས་ཁྱབ་ལུས་གཅིག་གི་མཚན་ཉིད་ཀྱིི་རིག་ལམ་དང་གཅིག་མཚུངས་ཡིན།སྲོལ་རྒྱུན་གྱི་བསམ་བློ་ཡག་ཤོས་དེས་བོད་ཁམས་ཁོར་ཡུག་སྲོང་སྐྱོང་སྐོར་ལ་ངེས་གཏན་གྱིས་ནུས་པ་དཔེར་མེད་སྦྱིན།

དང་པོ། བོན་ཆོས་ལས་ཚེ་སྲོག་དང་སྐྱེ་ཁམས་སྐོར་གྱི་ལྟ་བ།

   བོད་ཡིག་ཡིག་ཆ་མང་པོ་ལས།བོན་གྱི་ཆོས་ལ་ལོ་རེར་མཆོད་ཆེན་བཞི་འདུག་སྟེ།སྟོན་ཁའི་ཤྰ་ཕོ་རུ་རྐྱང་སྟེ་ཤ་ཕོ་སྟོང་གི་ཁྲག་གིས་མཆོད་པ།དགུན་ཁའི་བོན་ལྷ་དམར་མཆོད་དེ།དཔྱིད་ཀའི་ཡུ་མོའི་བྱིན་འབྲེག་དང་དབྱར་ཁའི་བོན་སྟོན་བསངས་མཆོད་སོགས།འདི་རུ་གསལ་བོར་ཤེས་དགོས་པ་ནི།སྐབས་དེའི་བོན་ཆོས་ཟེར་པ་སྤྱི་མིང་ཙམ་ཡིན་ལ།གདོད་མའི་བོད་ཡུལ་དུ་བོན་ཆོས་ཀྱི་གྲུབ་མཐའ་ནི་མི་འདྲ་པ་མང་པོ་ཡོད།དེ་དག་ལས་གཤེན་རབ་ཀྱི་ཕྱག་བཏབ་པའི་གཡུང་དྲུང་བོན་ནི་སྲོག་དང་ཁྲག་གིས་མཆོད་པ་སྦྱིན་པའི་བོན་ཆོས་གྲུབ་མཐའ་གཞན་དག་དང་མི་འདྲ་ལ།དེ་ཉིད་ནི་རྗོགས་ཆེན་གྱི་ལྟ་བ་གཙོ་བོར་འཛིན་པ།དེའི་ཚེ་སྲོག་གི་ལྟ་བ་ནི་གདོད་མའི་བོད་མིའི་འཚོ་བའི་བརྒྱུད་རིམ་ཁྲོད་དུ་ཕྱིའི་རང་བྱུང་ཁོར་ཡུག་ལ་ཆགས་པའི་ལྟ་ཚུལ་དང་བསམ་ཚུལ་ཏེ།

གཡུང་དྲུང་བོན་གྱི་གྲུབ་མཐའ་ལ་མཚོན་ན།འཇིག་རྟེན་ནི་ཕྱིའི་དངོས་པོ་དང་ནང་གི་སེམས་ཀྱིས་གྲུབ་པ་ཡིན་ལ།དེ་གཉིས་ཀ་ཡང་གཅིག་བརྟེན་གཅིག་འཚོའི་འབྲེལ་བ་ཡིན།དེ་ཡང་ཕྱོགས་གཉིས་ནས་དཔྱད་པ།

༡ སྐྱེས་པ་སྔ་ཕྱིའི་ཆ་ནས་ཚེ་སྲོག་འདྲ་མཉམ་གྱི་ལྟ་ཚུལ།

   གཡུང་དྲུང་བོན་ཆོས་ཀྱིས་སྲོག་ལྡན་སེམས་ཅན་ཚེ་སྔ་ཕྱིའི་འཁོར་བའི་ནང་དུ་འདྲ་མཉམ་ཡིན་པར་འདོད།འཇིག་རྟེན་གྱི་བདག་པོ་ནི་མི་རྐྱང་རྐྱང་མ་ཡིན་ལ།མི་ཡང་མི་རྟག་པར་གནས།དེ་བས་མི་དང་སེམས་ཅན་གཞན་དག་བར་ནི་འདྲ་མཉམ་ཡིན་ཏེ།མིས་སེམས་ཅན་གཞན་གྱིས་སྲོག་གཅོད་པ་དང་རི་དྭགས་སེམས་ཅན་རྔོན་པ་ནི་རང་བྱུང་གི་ཆོས་ཉིད་དང་ཆོས་ཀྱི་དགོངས་དོན་སོགས་ལས་འགལ་པ་ཡིན།

༢ རྒྱུ་འབྲས་ཀྱི་ཆ་ནས་ཚེ་སྲོག་འདྲ་མཉམ་ཡིན་པའི་ལྟ་ཚུལ།

གཡུང་དྲུང་བོན་གྱིས་ཚེ་འདིའི་སྐྱེ་རྒ་ན་འཆི་ནི་རྒྱུ་འབྲས་ཀྱིས་བཀོལ་པ་ཡིན་པར་འདོད།འབྲས་བུ་གང་ཞིག་ཡིན་ཡང་རྒྱུ་ལས་མ་འབྱུང་པ་ནི་མེད་པ།དེ་བས་དགེ་བའི་ལས་ལ་དགེ་བ་དང་སྡིག་པའི་ལས་ལ་སྡིག་པ་ཞེས་པའི་རྒྱུ་འབྲས་ཀྱི་ལྟ་ཚུལ་ནི་ཆགས་འདུག བསམ་བློ་འདི་ཉིད་དང་བླ་མས་བཀའ་སློབ་མང་པོའི་རྐྱེན་གྱིས།བོད་ཡུལ་དུ་ཚེ་འདིར་གཞན་གྱི་སྲོག་ལ་གནོད་པ་བྱས་ན་ཚེ་ཕྱི་མར་རང་ཉིད་ལ་སྡིག་པའི་འབྲས་བུ་འཁོར་ནས་ཡོང་པ་ལ་ཡིད་ཆེས་དང་།འདུ་ཤེས་དེས་གཞན་སེམས་ཅན་གྱི་སྲོག་ལ་གནོད་པ་མི་བསྐྱེད་པ་ལ་ངེས་གཏན་གྱི་ནུས་པ་ཐོབ།

གཉིས་པ།བོན་ཆོས་ལས་ཁོར་ཡུག་འདུ་ཤེས་དང་བོད་ཁམས་ཀྱི་སྐྱེ་ཁམས་ཁོར་ཡུག

བོད་མིའི་ས་གནས་ཡུལ་སྲོལ་གོམས་གཤིས་དང་གཅིག་འདྲིས་ཀྱི་ཁོར་ཡུག་གི་འདུ་ཤེས་ནི་ནང་བསྟན་ཆོས་ལུགས་ཀྱི་ཤུགས་རྐྱེན་རྐྱང་རྐྱང་མིན་ཏེ།ད་དུང་བོན་ཆོས་ཀྱི་སྐྱེ་ཁམས་ཁོར་ཡུག་གི་ལྟ་ཚུལ་དང་འབྲེལ་བ་ཆེན་པོ་ཡོད།དེ་ཡང་ཕྱོགས་གཉིས་ནས།

༡ རང་བྱུང་ཁོར་ཡུག་དང་བོན་ཆོས་ཀྱི་ལྷ་གཉན་ཀླུ་གསུམ།

 བོན་ཆོས་སུ་ལྷ་ནི་གནམ་གྱི་བདག་པོ།གཉན་ནི་སའི་བདག་པོ།ཀླུ་ནི་ས་འོག་གི་བདག་པོ་སྟེ།དཔེར་ན་གཉན་ནི་ས་སྟེང་གི་རྩྭ་རྩི་ཤིང་།གངས་རི་སྤང་ཐང་།སྲོག་ཆགས་ཐམས་ཅད་ལ་བདག་གཉེར་དང་སྲུང་སྐྱོང་བྱེད་མཁན།ཀླུ་ནི་ཁ་མདོག་སྣ་ལྔའི་མཚོ་དང་མཚེའུ་ནང་དུ་ཡོད་ལ།དེའི་སྲོག་ཆགས་ཐམས་ཅད་སྲུང་སྐྱོང་བྱེད་མཁན་ཡིན་ནོ། བོན་ཆོས་སུ་ལྷ་གཉན་ཀླུ་མང་པོ་མི་ལ་ཕན་པ་དང་།མི་ལ་གནོད་པ་བསྐྱེད་པ་དང་གནོད་པ་མེད་པ་བཅས་པའི་རིགས་གསུམ་དུ་བཀར་འདུག མི་ལ་དགེ་ཕན་སྒྲུབ་པའི་ལྷ་གཉན་ཀླུ་དེ་དག་ལ་དགེ་བའི་མཆོད་པ་འབུལ་པ།མི་ལ་གནོད་པའི་དེ་དག་ལ་འཛེམ་པ།འདི་དག་ཡང་གདོད་མའི་མིའི་རིགས་ཀྱིས་མཐོ་སྒང་སྐྱེ་ཁམས་སྲོང་སྐྱོང་།མི་དང་རང་བྱུང་ཁོར་ཡུག་གཉིས་འཆམ་མཐུན་ཡོང་ཆེད་གནང་པའི་རིན་ཐང་ཅན་གྱི་བསམ་བློ་དྭངས་མ་ཡིན།

༢ བོན་ཆོས་སུ་འཁོད་པའི་ཁོར་སྲུང་སྐོར་གྱི་ཡིག་ཆ།

     བོན་ཆོས༼བཀའ་འགྱུར༽དུ་སེམས་ཅན་ཐམས་ཅད་ལ་འདྲ་མཉམ་གྱིས་ལྟ་ཚུལ་འཛིན་དགོས་པར་གསུངས་འདུག་ལ།འདི་འདྲའི་བརྗོད་བྱ་ཡིག་རྙིང་གཞན་དག་ཏུ་ཡང་མང་པོ་འཁོད་འདུག

གཡུང་དྲུང་བོན་ཆོས་སུ་ཁོར་ཡུག་སྲུང་སྐྱོང་སྐོར་གྱི་དགོངས་དོན་གཙོ་བོ་ནི།ང་ཚོས་རང་བྱུང་ཁོར་ཡུག་ལ་གུས་ཞབས་དང་བརྩི་སྲུང་གི་སྒོ་ནས་གཉིས་ཀ་འཆམ་མཐུན་གྱི་འཚོ་བ་རོལ་ན།ད་གཟོད་རང་བྱུང་ཁམས་ཀྱིས་ཕྱིར་ང་ཚོར་ཅི་ཡོད་སྦྱིན་པ་ཁོ་ཐག་ཡིན།གལ་ཏེ་ང་ཚོས་འགྲོ་བ་མི་ནི་འཇིག་རྟེན་འདིའི་བདག་པོ་ཡིན་པར་འདོད་པ་དང་རང་བྱུང་ཁམས་ལ་གང་འདོད་ཀྱི་གཏོར་བརླག་བྱས་ན།རང་བྱུང་ཁམས་ཀྱིས་ང་ཚོ་ལ་གནོད་སྐྱོན་གང་མང་བསྐྱེད་དེ་དགྲ་ཤ་སློག་པ་ཡང་ཐེ་ཚོམ་ཟ་མི་དགོས།གཞན་ཡང་ཤིང་གི་པར་མ<ས་བདག་ཀླུ་གཉན་གཏོད་འབུམ>དུ། ༼ང་ཚོར་དབང་པའི་བདེ་བ་ནི་ཀླུས་སྦྱིན་པ་ཡིན།སྡུག་བསྔལ་ཐམས་ཅད་ཡང་ཀླུའི་ཆད་པ་ཡིན།ཡིན་ཡང་ཀླུ་ནི་ཞེ་སྡང་འཛིན་པའི་རང་བཞིན་ཅན་ནི་མིན་ཏེ།གལ་ཏེ་མིས་རང་བྱུང་ཁམས་ཆེན་པོ་ལ་བརྩི་སྲུང་བྱས་ན།ཀླུས་མི་ལ་གནོད་སྐྱོན་སྦྱིན་མི་སྲིད།གལ་ཏེ་མིས་རང་འདོད་ཀྱིས་རང་བྱུང་ཁམས་ལ་གཏོར་བཤིག་བཏང་ན།ཀླུས་མྱུར་དུ་ཆད་པ་གཅོད་ཁོ་ཐག་ཡིན།༽ཞེས་གསལ་བོར་བརྗོད་འདུག

ནོར་བུ་ཚེ་རིང་གི་རྒྱ་ཡིག་དཔྱད་རྩོམ་ལས་བསྒྱུར་པ།