ཁྲོ་བོ་དབལ་གསས་རྔམ་པ་ཞེས་པའི་དོན་བསྡུས་ན་ཅི་རེད།

རྩོམ་བྲིས་པ། རྩོམ་སྒྲིག་པ། དྲི་བ་གཏོང་མཁན། འབྲོག་ཁ་མང་།
དྲི་བ། ཁྲོ་བོ་དབལ་གསས་རྔམ་པ་ཞེས་པའི་དོན་བསྡུས་ན་ཅི་རེད། མཚོན་བྱ་གང་། ལེགས་བཤད་མཛོད་དུ་མིང་རེ་རེར་འགྲེལ་བས་དོན་བྱ་མ་གོ།
ལན། དེ་ཡང་འགོ་མགོན་བློ་གྲོས་རྒྱལ་མཚན་གྱིས་མཛད་པའི་(ཁྲོ་བོ་སྐུ་གསུང་ཐུགས་ཀྱི་སྒྲུབ་ཐབས་ཀྱི་འགྲེལ་བ་གསལ་བྱེད་འཕྲུལ་གྱི་མེ་ལོང་)ལས། “དབལ་ཞེས་པ། ཁྲོ་བོ་གཟི་བརྗིད་ཀྱི་དབལ་གྱིས་ལས་ཀྱི་དགྲ་བགེགས་སྲེག་པ་དང༌། ཡེ་ཤེས་རོལ་པའི་དབལ་གྱིས་ཉོན་མོངས་ཀྱི་མཚན་མ་སྲེག་པ་དང༌། རྣམ་པར་མི་རྟོག་པའི་དབལ་གྱིས་རྣམ་རྟོག་གི་བག་ཆགས་སྲེག་པ་དང༌། གསས། ཞེས་པ་གང་ཟག་ལས་འདས་པ་སྟེ་ཕྱི་ནང་གསང་བའི་བར་ཆོད་ཀྱིས་བསྐྱད་དུ་མི་ཚུགས་པ་དང༌། རྔམ་པ་ནི། སྐུ་གསུང་ཐུགས་མི་བཟད་པ་འཁྲོས་པའི་དབལ་གྱིས་གདུག་པ་ཅན་འདུལ་བ་དང༌།” ཞེས་གསུངས་པ་ལྟར་ཡིན་པར་སྣང་ངོ་།།