ཁམས་བརྒྱད་ཀྱི་ནང་ཚན་ཕྱི་མ་གསུམ་པོའི་བརྗོད་བྱ་རྫོགས་ཆེན་གྱི་ལྟ་བ་ཡིན་ནམ།

རྩོམ་བྲིས་པ།  རྩོམ་སྒྲིག་པ། དྲི་བ་འདོན་མཁན། བོན་བུ།

དྲི་བ། ཁམས་བརྒྱད་ཀྱི་ནང་ཚན་རང་རིག་པའི་ཁམས་དང་ཀློང་ཆེན་དབྱིངས་ཀྱི་ཁམས། མཉམ་པ་ཉིད་ཀྱི་ཁམས་འདི་རྣམས་ཀྱི་བརྗོད་བྱ་གཙོ་བོ་དེ་རྫོགས་ཆེན་གྱི་ལྟ་བ་ཡིན་ནམ། །

ལན། སྤྱིར་སྐབས་འདིར་ཁམས་བརྒྱད་ཀྱི་འཆད་བྱ་གཙོ་བོ་མདོ་ཕར་ཕྱིན་ཐེག་པའི་ལུགས་ཀྱི་སྦས་དོན་མངོན་རྟོགས་ཀྱི་རིམ་པ་བསྟན་པ་དབབ་ནས་འཆད་ཀྱིན་ཡོད་རྩང་། འདིར་བསྟན་རིག་ཁམས་སོགས་ཀྱི་ལྟ་སྤྱོད་རྒྱུད་ལ་ལྡན་པའི་སྐྱེས་བུ་དེ་ཚོས་བླ་མེད་རྫོགས་པ་ཆེན་པོའི་ལྟ་བར་བློ་ཕྱོགས་ཡོད་མེད་བཤད་ཁག་པོ་རེད་དྲན། དེའང་ཁམས་བརྒྱད་ཀྱི་ཕྱི་མ་གསུམ་པོ་ལས་དང་པོ་རིག་ཁམས་ནི། རྟོགས་བྱའི་ཡུལ་གྱི་གནས་ལུགས་དམིགས་ཡུལ་ལས་འདས་པའི་སྒོ་ནས་སྒོམ་པའི་ས་བཅུའི་དངོས་གཞི་མན་ཆད་ཀྱིས་བསྡུས་པའི་སེམས་དཔའི་ཡེ་ཤེས། ཞིག་དང་། དབྱིངས་ཁམས་ལ། གཡུང་དྲུང་གི་དབྱིངས་དགུ་གཡོ་རྩོལ་མེད་པ་མངོན་སུམ་དུ་རྟོགས་པའི་སེམས་དཔའི་ཡེ་ཤེས་མཐར་ཐུག དེ་བཞིན་མཉམ་ཁམས་ནི།

འཁོར་འདས་གཉིས་མེད་ཀྱི་འབྲས་བུ་ཆེ་ཆུང་མེད་པར་རྟོགས་པའི་དབྱིངས་ཤེས་དབྱེར་མེད་ཀྱིས་བསྡུས་པའི་ཐོབ་བྱ་མཐར་ཐུག ཅིག་ལ་འཇོག་དགོས། འདིའི་སྐབས་ཀྱི་རྟོགས་བྱའི་གནས་ལུགས་དེ་དག་མདོ་ཕར་ཕྱིན་ཐེག་པའི་ཡོངས་རྩེ་གཡུང་དྲུང་སེམས་དཔའ་སྤྲོས་མེད་པས་འདོད་པའི་སྤྲོས་པའི་མཐའ་བརྒྱད་བྲལ་བའི་བོན་ཉིད་ཙམ་ལས་བླ་མེད་རྫོགས་པ་ཆེན་པོའི་ལུགས་ཀྱི་གཞི་ཇི་བཞིན་ཉིད་ཀྱི་སྐྱེ་མཆེད་དམ། རང་གིས་རང་གསལ་ཞིང་རྟོགས་བྱ་རྟོགས་བྱེད་དང་བྲལ་བའི་ཡོངས་མེས་ཆེན་པོ་དེ་ཉིད་ལ་འཇོག་ན་མི་འཐད་སྙམ། འོན་ཀྱང་མདོ་སྐབས་སུ་དཔེར་ན་བྱམས་འབུམ་དང་གདལ་འབུམ་སོགས་ལས་རྫོགས་ཆེན་གྱི་ཚིག་སྒྲོས་ཡོད་པའི་ལྟ་བ་སྟོང་ཉིད་ཀྱི་རིམ་པ་མང་དག་ཅིག་འཆད་ཡོད་པ་དེ་དག་ནི་ཐེག་པ་གོང་མར་བློ་འབྲེང་བའི་ཆེད་དམ་ཡང་ན་སྐབས་བསྟུན་དགོས་པ་ཁྱད་པར་ཅན་ཞིག་ཡིན་ཀྱང་སྲིད་སྙམ། །