རྩོམ་བྲིས་པ། རྩོམ་སྒྲིག་པ། དྲི་བ་གཏོང་མཁན། བོན་བུ་མོ་ལ་དགའ་པོ།

དྲི་བ། མཁྱེན་ལྡན་རྩོམ་སྒྲིག་པ་ལགས། ནམ་འོད་བསོད་རྒྱལ། ཞེས་པའི་ནམ་འོད་དེ་རྟོགས་ལྡན་ནམ་མཁའ་འོད་ཟེར་ཡིན་པའི་གདེང་ཚོད་གང་ནས་བརྙེད་དམ། མེ་ལོང་ཡེ་ཤེས་དྲྭ་བར་(འགྲོ་མགོན་བློ་གྲོས་ཀྱི་ས་ལམ་ལས་གསལ་བའི་མཁས་པ་མི་འདྲ་བ་དག་གི་སྐོར་གླེང་བ།) ཞེས་པའི་རྩོམ་ཡིག་དེའི་ནང་དུ། “ བྲུ་ནམ་མཁའ་འོད་ནི་བྲུ་ཤ་ཁྱུང་གི་རྒྱལ་མཚན་དང་དུས་མཉམ་ཡིན་པའི་བྲུ་ནམ་མཁའ་འོད་ཟེར་ཟེར་བ་ཞིག་འདུག་དེ་ཨེ་ཡིན་ན་སྙམ། གཞན་མཚན་ལ་དེ་ལྟར་ཞུ་བའི་འགྲོ་མགོན་གཡས་གཡོན་ཙམ་གྱི་གཡས་རུའི་ཁྲི་འཛིན་ཁག་གི་ནང་དུ་ཡང་མེད་ལ། དབེན་ས་ཁའི་ཁྲི་འཛིན་མ་ཡིན་པའི་བྲུ་ཚང་གི་སྔགས་འཆང་མང་པོ་ཡོད་པའི་གསེང་དུ་ཡང་མཐོང་རྒྱུ་མི་འདུག” ཅེས་པ་ཞིག་བྲིས་གནང་འདུག་པས་འདིའི་སྐོར་ནས་གསལ་བཤད་ཅིག་ཡོད་པ་ཞུ། །ངས་མཐོང་བའི་དཔེ་ཆ་ཞིག་གི་ནང་དུ། ནམ་འོད་བསོད་རྒྱལ། ཞུ་བ་ནི། བྲུ་རྒྱལ་མཚན་འོད་ཟེར་དང་མཐའ་བྲལ་བསོད་ནམ་རྒྱལ་མཚན་གཉིས་ཡིན་པ་ལྟ་བུར་གསུངས་འདུག་སྙམ། །

ལན། གུས་པས་ཁར་སྔོན་ “ ནམ་འོད་བསོད་རྒྱལ་ ” གྱི་ “ ནམ་འོད་” ཅེས་པ་ནི་རྟོགས་ལྡན་ནམ་མཁའ་འོད་ཟེར་རེད་ཅེས་ཞུས་པ་ནི་མཁས་དབང་འགོ་བ་དགེ་བཤེས་བསྟན་འཛིན་འབྲུག་གྲགས་ཀྱི་གསུང་རྩོམ་(སངས་རྒྱས་གཡུང་དྲུང་བོན་གྱི་ངོ་སྤྲོད)ལས་དྲངས་པ་ཡིན། དེའང་དེ་ཉིད་ཀྱི་ (གྲྭ་ས་གོང་འོག་ཁག་གི་མཁན་རབས་བླ་བརྒྱུད་ག་འདྲ་བྱུང་ངམ།) ཞེས་པའི་སྐབས་སུ་གཡས་རུའི་སྟོན་པ་བཅོ་བརྒྱད་ཀྱི་མཚན་རིམ་པར་བཀོད་འདུག་པ་ལས། “ ༩) མཉམ་མེད་འདུལ་བ་རྒྱལ་མཚན། ༡༠) བྲུ་སྟོན་རྒྱལ་བ་གཡུང་དྲུང་། ༡༡) རྟོགས་ལྡན་ནམ་མཁའ་འོད་ཟེར། ༡༢) མཐའ་བྲལ་བསོད་ནམས་རྒྱལ་མཚན།” ཞེས་གསལ་པོར་གསུངས་འདུག་པས། ངས་ཀྱང་ཁོང་གིས་ཁུངས་ལྡན་ཞིག་ལ་གཞི་བཅོལ་ཡོད་པའི་ཡིད་ཆེས་དང་།

དེ་དང་འདྲ་བར་(རྒྱལ་རིགས་བྲུ་ཡི་གདུང་རབས་རྒྱས་པ་) ནང་དུ་ཡང་། “ བླ་མ་རྒྱལ་བ་ནི་(བྲུ་སྟོན་རྒྱལ་བ་གཡུང་དྲུང་)དགུང་ལོ་བཞི་ལ་ཡི་གེ་མཁྱེན། བརྒྱད་ལ་མཛོད་ལ་གཟིགས། བཅུ་ལ་དྲང་སྲོང་བསྒྲུབས།”  སོགས་ནས། “ དེ་ནས་གདན་ས་བསྐྱངས་ཏེ་སྨིན་གྲོལ་རྒྱ་ཆེན་པོ་མཛད།” སོགས་ནས། “ རྟོགས་ལྡན་དད་ཤེས་སོགས་བུ་སློབ་ཕྱོགས་བཅུར་ཁྱབ། སླར་མཁས་གྲུབ་ནམ་འོད་ལ་གདན་ས་གནངས། འཁོར་སྤངས་དགོན་པར་བཞུགས། ཆུ་ཕོ་སྟག་ལ་འཁྲུངས་ནས་ལྕགས་སྟག་ལ་གཤེགས་སོ། །མཁས་གྲུབ་ནམ་མཁའ་འོད་ཟེར་ཞེས་ལྔ་བརྒྱའི་སྐྱེས་གཅིག་རྩོད་དུས་ཀྱི་སྟོན་པ། བཀའ་རྒྱུད་ཀྱི་སྲོག་ཤིང་བསྟན་པའི་མངའ་བདག རྐང་གཉིས་ཀྱི་དམ་པར་གྱུར་པ་མཁས་གྲུབ་ནམ་མཁའ་འོད་ཟེར་ཞེས་མཚན་ཐོས་པ་ཙམ་གྱིས་འཁོར་བའི་འཆིང་བ་མཐའ་དག་ལས་སྐྱོབ་ནུས་པའི་མཉམ་མེད་སེམས་དཔའ་ཆེན་པོ་དེ་ཡི་རྣམ་ཐར་ཟུར་ཙམ་ནི། སྐུ་བལྟམས་མ་ཐག ”   ་་་་ ཞེས་སོགས་ཀྱིས་བྲུ་སྟོན་འདུལ་བ་གཡུང་དྲུང་གིས་བྲུ་ཡི་གདན་ས་གནང་སའམ་གཡས་རུའི་སྟོན་པ་བཅོ་བརྒྱད་ཀྱི་ནང་གསེས་བཅུ་གཅིག་པ་དེ་ནི། རྟོགས་ལྡན་ནམ་མཁའ་འོད་ཟེར་རམ་མཁས་གྲུབ་ནམ་མཁའ་འོད་ཟེར་ཡིན་པ་གསལ་པོ་འདུག་སྟབས། གདེང་ཚོད་དེ་དག་ནས་རྙེད་སོང་ཞུ། །